Saturday, December 30, 2006

價值投資者的行為

細心翻看舊聞,可以找到一些啟發。2006年5、6月大跌市時,鄧普頓基金在做甚麼?當散戶在恐懼、心灰意冷、扮蟹和離場(又或者突然間再次領悟「噢...Yes!還是打工比炒股安全!」) 之時,價值投資者正在怎樣藉此幾年一次的良機密密吸納,等待收成!

一同欣賞明報2006年7月3日的文章!投資者成功和失敗的分別往往在此!

http://www.mpfinance.com/htm/Finance/20060703/Invest/et1_et1a1.htm

最關鍵問題不是你「敢不敢」買股票,而是你「懂不懂在正確時機買入正確股票,然後長期持有」,年復一年,利用神奇的複利效應,讓你的財富由小變大,可持續發展地最終擁有足夠你及你所愛的人一生自由運用的金錢!

你還未做到這個投資境界吧!我也沒有。這也解釋了為何今天你仍要返工,為你的老板 (或大小老板們) 拼博。如果你告訴我今天你仍返工,因為你熱愛工作、因為你熱愛工作帶來的意義、因為你熱愛你的每一位同事,恭喜你!那你就去繼續工作多十年八年吧啦!

我只知道,每個工作崗位不論高低都一定有其意義,但我只想去熱愛我所愛的人,而如果最終我同時能夠擁有足夠一生自由運用的金錢,我可以做更多我覺得有意義的善舉,例如捐款山區建校、助學及領養等。現時我財力有限,每年最多大約捐5,000元左右就收手,那些甚麼十一奉獻更加唔好攪我,因為我己再無固定收入。而為了自己這些善舉目標而非純個人利益去投資,使我的動力更大,連投資炒股時都感覺自己頭上有光環,你話幾正!

但實現財務自主之路真的那麼難走嗎?鄧普頓基金可以做到,為何我們做不到?難嗎?買股票只要一個電話,或在網上一 Click不就可以了嗎?我不知道!但我只知我己選擇走上了這條不歸之路。終我餘生,亦復如此,因此我現在只能夠不斷努力學習,審慎行動,不懼不偏,不驕不餒,等待好日子的來臨!而行山、運動、看書、看電影、聽音樂、逛書局、甚至去想想「我仍為甚麼生存」及「何謂富有」等哲學思考題,以保持身心思想情緒的正常運作,以便炒股!

講番中石油 (857) 同中國鋁業 (2600)。中石油現價 11.02,我認為即使升到今時今日,石油股仍有可為,但亦無需高追。即使無法以鄧普頓基金的 8.00 價買入,但如果能夠等回調到 50天線 (9.47) 或100天線 (9.02)時才買,持有一年,升回 11.80 (25%) 極有可能。

至於中國鋁業,現價 7.32。鄧普頓基金當時有關增持行動由5月初時平均價7.25元降至6月下旬約5.33元,前後劇跌逾26%,但愈跌愈買,平均價每股5.8元,以當時中鋁收市價5.75元計算,鄧普頓 5次增持行動中,4次仍處於帳面虧損狀態,而該批股份市值逾9.5億元,絕非少數目,但鄧普頓對此卻好像毫無懼色,仍樂於增持溝淡。目前除鄧普頓基金持有 11.02%外,摩通亦持有 14.7% 及 Alliance Capital Management 8.06%。鄧普頓於 7.25己夠膽買入,半年後今天中國鋁業才升回 7.32,目前是否仍有可為?不過,不要忘記鄧普頓的平均價每股只是約5.8元,今天 7.32 賬面己有26%盈利,鄧普頓隨時減持亦合情合理的,跟風是否經己太遲則自行判斷吧啦!失手坐了艇亦自行了斷吧啦!

更重要的啟示是:從觀察鄧普頓基金的操作,由買入到帳面獲利,究竟有那一點是它能做到而我們辦不到的嗎?答案是:「沒有!」

是時候開始真正改變觀念,由富爸爸現金流象限圖的 E (僱員 Employee) 跳去 I (投資者 Investor),真正行動起來,為美好的將來發功了!

看書靜安智得

投資典籍之中,我喜崇洋,我獨愛外國大師們的經典作品,能真正啟發投資者的思想,例如 Benjamin Graham, Peter Lynch, Philip Fisher, Mary Buffett & David Clark, Andre Kostolany 等,因此我逛書局時,喜愛大量買入外國作者的翻譯本,而國內和香港作者的書我很少看得上眼。

原因是國內作者講股的書多討論A股市場,而且不是太技術就是太吹水,往往亦將國內市場浮誇和頗為不成熟的風氣帶進書中,鼓吹一夜發達輕而易舉;而香港作者寫的書則多是資訊數據類,例如優貨股大搜查、基金攻略之類,又或是入門ABC類如投資學堂、股壇解碼器、講錢你要識等,亦有一些大講發達經類別的書如我如何在股票市場賺到第一個1000萬、曾淵滄投資者心經、石Sir秘笈等。這些書不是不好,各自都有其可看性,就只是不再適合我!

我需要智慧!

面向2007年,我馬上就要需要部署來年的股票投資策略,來幫助我的財富資產可持續地發展!在這一刻,我只能想起一位香港作者和他的書可能對我有幫助,於是我找出他的書來,由頭到尾仔細再看一遍!智慧又好像冉冉浮升,飄進腦海!

林森池:證券分析實踐,從香港經驗認識國企前景!

從當中有何啟發,有何前瞻,稍後和你分享!

香港也有一些認真和有識見的作者,如信報的林行止、曹仁超、Tony Measor、林少陽、蔡東豪等,奈何專欄所限,深入分析令人時有不足之感,也易於重覆論點,予人以陳腔之印象。書本,仍有書本一氣呵成的 Beauty !

當然,世界潮流,浩浩盪盪,迎新者昌,逆新者亡。新書,要看!在 Knowledge Society 時代,掌握知識走先一步,就是遊戲規則,要做!打工者如是!投資者如是!

未來一個月,希望可以看完 (起碼翻閱過) 以下新買入的書本,開啟更多智慧之門:

Alvin Toffler, Revolutionary Wealth: How It Will Be Created and How It Will Change Our Lives (中譯本:財富的革命) - Future Shock (1970), The Third Wave (1980), The Powershift (1990) 的作者於 2006年的新著,要優先看!

Jim Rogers, Hot Commodities (中譯本:熱門商品投資 )

Harry S. Dent, Jr.. The Next Great Bubble Boom, How To Profit From The Greatest Boom in History 2005 – 2009 (中譯本:下一個大泡泡 2005-2009)

Thomas L. Friedman, The World Is Flat. A Brief History of The Twenty-First Century (中譯本:世界是平的)

Steven D. Levitt and Stephen J. Bubner, FREAKONOMICS: A Rogue Economist Explores the Hidden Side of Everything (中譯本:魔鬼經濟學 )

劉詩平著, 匯豐金融帝國: 140 年的中國故事

Chris Anderson, The Long Tail (中譯本:長尾理論 )

丁志可著, 普京大傳 (Putin Biography)

2006年 Blog 上組合總結


自2006年11月29日開 Blog 以來,講講寫寫,買買賣賣,不知不覺間開始了一個投資組合,埋年尾睇睇成績點先。

一共入市成本是 320,970元,開倉至2006年底前後約共一個月的時間,目前盈利是 22,770元,帳面賺 7.09%,成績中規中距。

希望組合到 2007年3月左右可以有大約 25% (80,242元) 到 30% (96,291元) 的盈利,就算對自己的努力有個交代了!

Friday, December 29, 2006

馬鞍山鋼鐵 (323)

熱門中資銀行股唔敢再炒,惟有研究一下D金銀銅鐵股。最近見大行密密收集馬鞍山鋼鐵 (323),令我有D想了解多D既衝動。

(一) 基本因素普通:邊際利潤率 9.07%, 資產回報 7.47% , 股東權益回報 15.72%,流動比率 104.26%, 長期負債/股東權益 46.29%, 債項/股東權益 58.13%, 週息率 3.58%,股價/賬面值1.52 倍,市盈率 9.91 倍,各種數據表面一般。除息高一些及股價/賬面值好D外,整體及唔上江西銅 (358)。

(二) 技術走勢:唔聲唔聲,馬鋼 (323)由九月中約2.30 升到十二月52周最高位 4.46,升左 92%,目前市價 4.33,走勢頗強,企在所有線之上:10天 (4.22),20天 (4.10),50天 (3.58),100天 (3.08)。

(三) 盈利預測:馬鋼盈利平穩,EPS 2003年41.19仙 (人民幣)、2004年55.65仙、2005年45.08仙,2006年盈利下降,上半年16.99仙,綜合盈利預測06年到 08 年 EPS 分別為 31, 39 及 52.95,都算 OK,屬谷底回升格博2007年反彈。

(四) 2007年中國國民經濟將持續平穩較快增長,GDP增長持續在9%至10%間,社會固定資產投資持續增長,居民消費結構的升級、工業化和城鎮化步伐的加快, 將繼續提升鋼材的市場需求。但鐵礦石及燃料、電力價格仍將在高位運行,仍將壓縮了鋼鐵企業的盈利空間。經濟發展加快,建材金屬股應有需求,周期股大上大落,不宜永久持有,但可以炒波幅,看圖低買高賣。

(五) 大行動靜 (聯交所資料顯示)

最近買賣:
12月20日 - 摩根大通以每股$4.36,減持6685萬股,其持股量已由12.7%減至8.85%。
12月11日 - 德銀增持211.84萬股,惟未有披露作價,其持股量已由5.46%增至5.51%。
12月11日 - 大摩於增持123.68萬股,惟未有披露作價,其持股量已由11.74%增至11.84%。
12月11日 - Halbis以每股$4.114,增持507萬股。
12月5日 - 大摩以每股$3.928,增持560萬股,其持股量已由10.94%增至11.23%。
12月1日 - Alliance Bernstein以每股$3.825,增持馬鋼34.4萬股至9%。
11月29日 - 摩根大通則以每股平均價$3.47,增持馬鋼483.2萬股至12.04%。

最近大行目標價:
12月18日 - 瑞銀將馬鋼目標價由3.8元調高至5.6元,評級維持「買入」,預期馬鋼07年平均銷售價格升15%,相應將其07-08年每股盈利預測由0.41元及0.56元,分別調高至0.58元及0.7元人民幣。
12月11日 - 美林表示, 反映鋼材價格提升、馬鋼火車輪業務的增長潛力, 以及其集中生產高價值鋼材, 因此調高該公司07-08年股盈預測, 將目標價由3.5調高至4.8港元。
11月8日 - 摩根大通表示, 馬鋼未來兩年受惠鋼鐵價格上升, 盈利將錄得強勁增長, 給予「增持」評級, 目標價由3.6港元調高至4.25港元。

(六) 分析: 馬鋼2007年前景似有轉佳趨勢,除了摩通於11月以每股平均價$3.47增持及於12月20日以每股$4.36大幅減持6685萬股套利外,其他各大行似乎仍在收集中,收集平均價在 3.80到 4.10 之間,這個水平可作為近期支持價。

(七) 結論:馬鋼暫時只可以觀望,不宜高追。但中線進取者可以考慮在 3.70 到 4.00 買入,持有三個月,博 2007 年3月宣佈2006年全年業績時炒上。如以2006年 EPS 34 仙及16倍計,目標價 5.44 (賺36%)。

但須留意目前馬鋼市盈率只有 9.91 倍,同類股鞍鋼 (347) 則可高至16.35 倍,反映市場對二者估值之參差態度,馬鋼市盈率能否於短時間內追上,仍然有待小心觀察。

不過,一個對大行摩通並不科學的觀察,或許有些少啟示和心理支持。摩通於11月以每股平均價約 $3.47增持,及於12月以每股平均價約 $4.36大幅減持6685萬股,套利水平約在賺 25% 位置。如以類似方法估計其他以較高水平入貨之大行的食糊位,他們收集平均價在 3.80到 4.10 之間,那?套利目標平均價應在 4.75到 5.12 (25%) 之間了。

應否跟風呢?

回顧進度

首都機場 (694) 尋日回番 5.87,但未跌返我的目標溝貨價 5.55,無理佢。今日又升返 6.00。

江西銅 (358) 比較慢熱,今日收 7.95,成交金額 1.33億,普普通通。但我睇 Technical同最近大行D動靜,我有直覺短期佢可能會炒番上 8.55,即保力加通道頂;然後再看能否升破 9.75創新高。我想增持多 10,000 股,但先睇個大市能否企定 20,000點之上,再算。

創科 (669) 反覆幾日始終跌唔穿 9.84,今日收 10.08,成交 2.81千萬。如果成交量回升,大戶沽完貨後,有機會一口氣上返 10.58 D位,甚至一個月高位 11.58或兩個月高位 12.60。弱股但賺錢股,無理由唔升番既。

今日無需買賣,睇住個市升就夠。

短炒投資者的總結

個市又升,期指結算日,大戶真係技術高超,恆指果然衝破二萬點,剛剛停響20001點,收放自如,服未。

今日開市即掃上再掃落,風高浪急,PC 雖然心口有個勇字,但台灣地震之海嘯似乎將佢D膽汁沖淡左D,眼見個市忽然間氣勢如虹,大藍籌 (001, 016, 023, 941)同落後中資股 (347, 323, 525, 914) 等猛升,點知佢既短炒組合 (991, 1398, 3988, 358, 386)竟然氣定神閒,斯斯文文咁紋風不動,開始有D面青。跟住發覺D沽盤如排山倒海掛出,終於十點半急忙跳艇逃生,在兵慌馬亂中全數沽貨清場,最後埋單叫做微賺 3,700,不過經紀就猛叫多謝佣金,PC 就得番個生果叫做桔!

我問PC今回好玩嗎? PC 驚魂甫定,馬上回復番一個充滿信心既短線投資者應有既表情,淡淡定定咁話:「今年買俾亞媽D缸瑤柱仲可以一樣咁大粒!」跟住,PC仲可以馬上為佢今次唔算太成功又唔算太失敗既炒作,作出有系統、充滿智慧、同對未來行動滿有啟發既結案陳詞:

(一) 短炒既行為真係好高風險架!無必要既話真係唔好隨便試呀!(但PC話今次因為要交稅,無法啦。) 股票投資始終要回歸大師既教導,至係正路,Buy and Hold 應該係真正既成功賺錢法則。

(二) 開市如果股價裂口高開,追貨短炒一定無乜水位,好易死,係好不智既行為。

(三) 過早獲利沽貨所損失既機會利潤可以非常之大,嚴重打擊整體財富增值既重大策略。例如第一舖短炒國壽收獲六萬多,當時經己覺得判斷正確;事後證明正正犯了過早獲利沽貨的錯誤,賺少左二十幾萬。幾時係適當離場時間,應該同時考慮市況及走勢,唔好單單諗住賺幾多就算。

(四) 大陸狂炒A股既唔成熟行為,將會令香港股市更為波動,而大陸資金持續流入港股,造成風高浪急,會逐漸影響香港本來較為成熟股民既心態。

(五) 今次短炒三舖,雖然都係保持不敗之身,但心理上真係有D壓力,其實都唔係幾舒服既事,令佢果幾日無左 Peace of Mind,直情扭曲左佢咁 Peaceful 同 Nice 既性格,短炒其實係要同個性格配合至會有樂趣既。

對於PC能夠即刻丟開個膽、用番個腦,並且能夠用埋個心,迅速作出咁精辟同咁語重深長既分析,我真係不由得肅然起敬,目光中禁不住流露出充滿敬佩既眼神,而且簡直感動到想喊! 仲好大聲咁喊!

「點解我輸左二十年股票至學識既心法,你可以一想就通!」

Thursday, December 28, 2006

馬鋼 (323)

尋日話想研究馬鋼 (323)都未做,今日開市就升到彭彭聲,由 4.17 上到 4.43,好無引。今時今日真係個腦唔值錢,膽汁就炒到好貴。不過我都會做埋佢既!

而家先去行山散散心!

炒回歸A股

27-12-2006 (台灣地震,今日至 Post 到)

不出所料,今日港股在中資金融股帶動下發癲,狂升405點到 19725點 (升2.1%),國企指數升665點至10282.22點(升6.93%),全日成交484億元。好耐無咁熱鬧同咁 High既感覺啦!隻隻創新高,似乎分分鐘可以響 2006年破 20,000點。

今次炒回歸A股同H股差價,基本上唔需要用個腦,用個膽去炒就得。今日炒即日鮮,任何一隻中字股都應該有D錢落袋,問題只係賺多賺少!咁壯觀同咁癲既場面,真係好多年無見過啦。如果想睇下大陸個市至決定點炒,可參考新浪股票網 (Sina)中財網

今日個市真係勇者無懼既世界,亦係短線投資者幾年一遇的好時機。如果你今日結果只係做左一個旁觀者,恭喜你,你既耐性同紀律性真係好好,又或者你份工真係好忙好忙。但我相信作為一個理性既長線投資者,2007年尾或2008年尾你一定仍然會有所斬獲,不過短炒既 Quick and Easy Money 就無你份啦,但係呢D高風險既事唔係事必要冒既,又無保證一定賺,因此心口唔需要一定有個勇字,額頭唔需要一定有個貪字,股市賺錢其實仲可以有好多策略,無必要人人短炒,不如各適其式把啦!

不過我知我 D 股友又的確幾勇。PC 今日一早博殺,作2006年既最後一擊,一口氣掃入大唐 (991)、中國銀行 (3988)、江西銅 (358)、中石化 (386) 同埋中國工商 (1398),而且打算持有 (不過可能只係三幾日),我真係要寫個服字!不過我細膽,一定唔會咁做。 ML 就跟報紙貼士炒中國財險 (2328) 同中交建 (1800),今日沽清,有兩萬蚊落袋,又過肥年。 EW 就一直持有之前 3.85 買入既中國工商 (1398)同 3.55 買入既中國銀行 (3988),賬面賺左五萬幾 (20.5%),仲未肯賣,可算係「短炒」中而又採用「長期持有」既例子。如果係你,你較喜歡用邊種方式去投資 (投機) 呢?

今日我成日睇住個市,雖然係咁升,不過我無打算沽任何貨,因為升市中往往乜都唔做係最好既,賣乜都最後證實只會賺少左。今日創科 (669) 又跌,大行仲出貨質緊,我在 9.85 又買多 2,500 股,平均成本價 9.94,收市 9.90,微蝕,但我相信好日子應該唔會太遠。我原則上盡量不去大手高追中資銀行股,因為我唔多中意咁做,但有貨在手D股票作增持溝貨則例外,風險會小好多。今日我結果等建行 (939) 企定後,於 5.06 買左 10,000股,平均成本價提高到 4.28,繼續長期持有。

我仲想增持溝D貨,但首都機場 (694) 只由 6.01 跌返 5.87 (跌 2.33%),仍未跌到心目中既 5.55 價位,要再等一會。其他超強勢股好似國壽 (2628)、平安 (2318)、工商 (1398)等暫時無興趣去理,咁升法亦都理唔得咁多。

今日隻交通銀行 (3328) 亦喪升 12.1%,一日間由 8.42最高上到 9.54,收 9.44。我手中仲有些少貨,但唔多,今日個勢就連溝貨都唔想。我有貨,應該快樂,但我一D都唔開心,因為我既好夢己經粉碎左!交通銀行係我2007年組合中既至尊股膽,我原本打算在 6.60 到 7.20 之間增持到足夠數量,然後等升到 10.00 收成 (賺45%),而家咁攪法,條數亂曬完全唔同計法,又要重新 Plan過!慘!

我對馬鋼 (323) 有D 興趣,因為起樓總要鋼材,原材料股總係週期升升跌跌,唔會永遠衰或永遠好,但炒波幅就足夠,你睇最近隻中鋁 (2600) 就係一個好好既例子。不過要睇真D再算。


回應 Wong :

多謝參與討論,我只係業餘投資愛好者,唔係專家,更加無乜高見,不過歡迎交流。

2007年及2008年中資金融股我睇仍然向好居多,宏觀經濟發展同人民幣升值、內需增加及外資湧入都係國內有利因素。但短線是否炒過龍,睇埋 2006年宣佈業績就知,但而家個勢睇黎,盈利未必一下子追得上,股價稍後調整 10% 到20%係好合情合理既事,我覺得賺大錢應該耐性D等調整入貨比較易,高追而發達既難度似乎太高。

至於炒H股回歸A股以現價買入,小注可以怡情,大注好易傷身!炒股無所謂後知後覺,高有高炒,低有低炒,你有信心及本領甩身就可以啦。

Tuesday, December 26, 2006

聖誕假後炒唔炒中資銀行股?

PC 問:假後開市趁唔趁機炒短中資銀行股?

報載如下:【明報專訊】藉內外資企業所得稅稅率將統一消息刺激,上海A股指數昨天大升近4%,銀行股更是氣勢如虹,工行(601398、1398)甚至因升近10%而停板。工行市值亦因一日進帳近2000億而力壓匯豐控股(0005)晉升全球第三大市值銀行,而中國銀行(601988、3988)亦超過日本的三菱UFJ金融集團排名全球第六大。有分析員指A股股價?升,明日港股開市,中資銀行股定掀新一輪升浪。不過亦有內地學者擔憂,內地股市炒作瘋狂,泡沫已很厲害。

內地前日宣布最快明年7月會合併行之有年的內、外資企業所得稅稅率,當中內資企業稅率會由現時的33%降至25%。憧憬內地企業盈利增長會因而多7至8個 百分點,A股昨日大舉炒上,上證指數更一舉突破2400點關口,收報2435點。滬深兩市成交總額737億元(人民幣)。

我上網一看,發覺所有 Fundamentals 經己對中資銀行股再無意義,可以不理。心中也有貪念,好想 27 號一開市就依價買入 10 萬或 20 萬股工行(1398)、中行(3988)或建行(939),升 3% 到 5% 即日沽清,即日賺 3萬到 5 萬蚊係有可能既事。

不過,我好耐無咁炒法啦! 上次己經係 15 年前既事啦 (結果點?唔再講啦!)。

我都係決定散下步行下山好過,趁今日 Boxing Day 下午去長洲曬太陽同埋行下小長城,食返件出名既南瓜糕。 再算。

Monday, December 25, 2006

投資要練 (引自投資者日記 22-12-2006)

請唔好過分相信資產負債表或走勢分析,多D信自己既直覺,許多時你既直覺較唔少專家分析更好。唔好相信運氣,大部分成功者背後係努力工作既結果;清晰頭腦配合一?定資本、嚴守紀律、學曉風險管理、勇於止蝕、抵受得住獲利回吐既引誘,你已接近成功。

成功既投資唔使記住,失敗既例子卻唔好忘記,以免日後重蹈覆轍。只要努力避?免犯嚴重錯誤,蚊年便會滾滾而來。

唔好成為群眾一分子,唔好被眼前利潤吸引,學習從相反角度諗問題,因為成功永遠屬少數人士,樂極生悲既例子經常發生,常常記住「Too good to be true!」既教訓。

留意警告訊號,所有大災難發生之前都有先兆,唔會突然發生,只係人們唔留心。請向「諾亞」學習,響晴天之時造好「方舟」,而唔係響船沉之時?才搵救生艇。鐵達尼號沉沒既理由,係因為船長過分自信。

請記住,一天未獲利回吐,你所擁有?都只係紙上富貴,唔好沾沾自喜,多D留意股價動向,必要時採取行動。?市場只酬勞果D方向正確及時機把握得準既投資者,而唔係每周工作六十小時既勤力者,勤力既人只宜打工,不宜做投資;做投資要「練精學懶」。

投資唔係群體工作,許?多時需要?係獨立思考能力,保持獲得資訊;上述都唔係最重要,最重要係分析能力及決定能力。每天有大量資訊既各種媒體上出現,獲得資訊並唔困難,困難係點樣分析?及作決定,有時減少D資訊反而係好事。

分析力與決定力來自清晰頭腦,如你有位吵鬧既伴侶,一定影響你既分析力及決定力。如你有一班豬朋狗友令你夜夜笙歌,每天起?床唔在狀態,都影響你既分析力及決定力,因為疲倦的腦袋一定唔係清晰既頭腦。

Sunday, December 24, 2006

總結 2006 年投資結果

要總結,先睇下原先有無定下年初目標 (即係 Mission, Vision, Value & Objectvie 之類東東),又有無認真跟足去做。 如果根本無定下過目標,只係年頭炒到年尾,隨心所欲,蠅頭小利又買買賣賣,報紙貼士又試,新股又抽,連身旁好心老友既貼士都信。咁算吧啦!唔使好似我咁認真講乜鬼總結,以下果 D 就當笑話睇算吧啦! 最緊要賺錢就得啦!係咪?

不過我份人可能做工果陣時做壞左個腦,聽到「研究」兩個字就鬼咁喜歡,見到數字圖表就計來計去,又話比較研究,又話趨勢分析,一味吹水寫野,攪到而家己經戒唔甩呢個遺害一生既壞習慣。而股票市場又正正係吹水樂園!

回顧 2006年表現,我的股票成績是 20.1%,基金成績是 23.7%,Equity 部份總成績約 21.6%, 但連現金計算在內的總資產成績則降至只有 11.1%,強差人意。但我一直堅持要保持 50% Equity 及 50% Cash 比例的風險管理原則,即使大牛市中也如是,因此今年 Equity 部份雖有斬獲,但 Cash 部份則自然損失了很多賺錢機會 (利息港元只是 2.5% 美元 4.5%)。但是,如無 Cash在手,跌市來臨時無法增持 Equity,Market History 告訴我們這個損失一定更大!

所有城中富豪之有今日,不是他們的基因比其他人好,也不是他們比其他人聰明,更不是他們勤力 (講勤力我相信大家最勁,由朝做到晚,我最懶,靜係日日寫 Blog ),而只係佢地有 Cash,響每次大跌市時陰陰嘴笑地執平貨! 而你同我?係囉,變左大閘蟹啦!然後誓神劈願話斬手指唔再買股票,之後牛市重臨,又好似而家咁開開心心,隨心所欲,蠅頭小利又買買賣賣,報紙貼士又試,新股又抽!

不過你有無發現,最後到如今你仲未發達,仲日日返緊工;而李兆基就話佢而家炒股好過做地產。分別響邊?分別在:
(一) 跌市時佢有 Cash 買貨,而你多數變左大閘蟹;
(二) 佢長期持有,而你喜歡買買賣賣。

發達祕訣就係咁多,絕對唔係單單因為李兆基有好多錢。事實上,股票市場既 Beauty 就係可以大有大做,細有細做,絕對唔係大一定可以蝦到細。李兆基由500億開始,我由 50 萬開始,可以一樣咁得!

MPF都話,如果肯由 25 歲起每月供 2,000 元,以 8% 回報率計算,到 65 歲都有 350 萬啦!就係一樣道理。 Money game 就要用 Money game 既邏輯去運作。

講番我地D股友既成績,據說 DW 係 16%, ML 係 4.5%, PC 淨計成本同收益就有成 20% 啦。但聰明既人一定跟住問:點至算達到目標呢?

呢類咁有哲學理念既問題,我認為隨便一 D 答都可以啦,大致有三種計法:

(一) 實賺幾多:如果你打算 2007 年在股票市場賺到 10萬、20萬或 50 萬,咁年尾做到就得啦!

(二) 要好過定期存款:美金定期 4.65%,紐元定期 7.08% (永亨銀行係全港最高息啦),如果買股票好過定期存款大約一倍,即係做到 9% 到 14%,都算係咁啦!

(三)好過恆生指數表現:大行多數用這方法, 2006年恆生指數升左 29.8%。回顧我地D股友既表現,全部都差過恆指表現!理論上應該係做到好過恆生指數表現才算好成績 (即係 Peter Lynch 所講既 Beating the Street )。

總結 2006 年投資結果,對2007 年有何啟示? 先睇下個圖,再聽吹水。



分析 2006 年,恆生指數升左 29.85%:

(一) 如果你乜都唔做,只係買隻恆生指數ETF (2883),你的收獲就有 29.52%,佢理論上同恆指表現同步,好過我地所有股友既努力;

(二) 如果你買入 Tony Measor 長年推介的超級優質龍頭股匯豐 (5) 同宏利 (945),你好穩陣咁賺硬大約 14%,但比唔上恆指表現;

(三) 如果你買左盈富基金 (2800),你都好穩陣咁賺硬大約 29%,因為佢理論上亦同恆指表現同步;

(四) 如果你買左恆生國企H股ETF (2828) 或恆生新華富時25 (2838),恭喜你,你的收獲就有 76.02% 或 56.58%,遠勝恆指表現!

試想一下,2006 年國企股狂升,但好怕買錯唔升個隻。但買恆生H股ETF (2828) 就簡單得多,它代表所有國企股,只要國企指數全年向上升,你根本不用傷腦筋去選股!最適合時間有限的上班一族,既可食盡國企股升浪,又可以懶到股市都唔睇!嘩!幾正!

有一種講法話,長遠來說,買指數基金 (或 ETF) 的表現總是勝出的,2006 年成績有目共睹,但信不信由你!

2007 年又會如何呢?

2007 年投資部署

本星期忙於短炒,現己告一段落。趁假期靜一靜,認真想想 2007 年的投資部署。 PC 有乜見解?

Saturday, December 23, 2006

超賣股 (over-sold)

再講多兩句,而家個市只得三兩隻超賣股係處於「大跌至不合理的低水平」,它們是江西銅 (358) 同創科 (669),而匯豐 (5)亦接近近期低位。詳細之前我都討論過了,唔再重覆。依圖直說 (with the compliment of AASTOCK.COM) :

創科 (669) 可於 9.81 買入,12.56 沽出,賺 28%。


江西銅 (358) 可於 7.86 買入,8.86 沽出,賺 12.7%。


匯豐 (5) 可於 139.5 買入,152 沽出,賺 8.96%。匯豐是超級好股,現價 (141.6) 買入應無妨,初步看 152 蚊 (賺 7.34%),2007 年有望 160 蚊 (賺 13%), 2008 年上望 200蚊 (賺 41.2%)。呢個唔係無可能既事,最困難係出面 D 消息風風雨雨而你對 5 號仔有無信心、自己有無耐性同紀律,同埋你會唔會突然等錢使要沽股票做第件事。

首都機場 (694) --- (二)

明報馮成章先生於舊文回歸中間值指標報捷 預報大反彈」表示準確預測納指反彈。學無先後,達者為先,於是抱著恭敬之心去睇睇。他於另文詳細解釋:

納指700交易天 僅10日嚴重偏離50天線

筆者是用「回歸中間值理論」(mean reversion theory)來測試市場的投資情緒。這個理論假設了資產價格會隨著市場情緒變化而時高時低,當市場一面倒看好時,資產價格會被炒高至不合理的高水平,亦 即出現超買(over-bought) 的情況,結果惹來拋售,令價格回落至較合理的中間值

同樣,當市場情緒太過悲觀,資產價格會大跌至不合理的低水平,亦即出現超賣(over-sold)的情況,結果惹來識貨之人趁低吸納,令價格回升至較為合理的中間值

筆者假定了50天移動平均收市價足以代表一隻股票或一個指數的中間值。所謂50天移動平均收市價,是指把當天的收市價加上之前的49天收市價,然後求取他們的平均值。

最後是計算每天的收市價跟當天的50天移動平均價的差距,即把收市價減去50天移動平均價,然後除以50天移動平均價。姑且稱之為「偏離度」,當偏離度愈大,回歸中間值的機會也就愈大

嘩!發達啦!如果咁講,只要找出一些股票的市價大跌至向下偏離於中間值時買入,然後等到大升至向上偏離於中間值時沽出,咁唔發都幾難!

天下武功,殊途同歸。佢講 D 野同保力加通道 (Bollinger Band) 其實差不多,不過保力加通道一般用 20 天平均線同 2 個正負標準差 (standard deviation) 做上下限。我即管改做 50 天平均線了解有乜分別。

拿拿聲去研究一下首都機場 (694),一睇之下,慘!而家正係「被炒高至不合理的高水平」,市價一支箭咁升左上天堂!




點好?咁既環境,當然唔好完全信曬馮成章啦! Technical 始終係 techincal嗎,只可作為基本分析的參考。

「股價可升可跌,過去業績並不代表將來表現,投資涉及風險,詳情請參閱銷售文件......」入貨前是否己經停一停、想一想......?

其實我之前的入貨價 4.97 己經好靚,好接近通道下限的 4.89,證明我的做法完全正確。至於隻股升得咁鬼急,炒到出曬界升穿上限,唔係我錯,唔關我事,我無必要急於全部沽出。買股票一定要經常練習長期持有優質股的氣度,處變不驚,而非處驚不變,才能有成。切忌賺少少、心急急;蝕少少、慌失失!

還是決定相信自己的感覺和分析,繼續依計行事,三天後 (即 2006年尾) 或三個月後,就知結果如何啦。

首都機場 (694) --- (一)

尋日隻首都機場 (694) 狂升到高位 6.03,收市 6.01,PC 就急急沽清貨,收錢落袋關人。我都唔執輸,響 5.99 個靚位沽左 6,000股,暫時部份獲利共 6,000 蚊,濕下個口。不過,大師教落,升市沽貨唔好一次沽清,要用『倒金字塔式沽貨法』,就唔會再升都變左有得睇無得賺。

現時,我仍然睇好首都機場,應該未炒完,原因如下:

(一) 奧運概念股,長炒長有,首都機場長時間響5蚊橫行整固,現時剛炒上6 蚊,應該未升完;

(二) 目前熱炒A股同H股差價,首都機場又話發A股,真好假好,總之多個理由去炒;

(三) 首都機場基本因素是優質股,08年奧運盈利大增,因此預期目標價應該唔止6蚊 (PE=25.8),但可以升到幾多就好難講,但如果以PE=30來計,應該可以升到7蚊。

總結:下星期如果再升,就繼續持有,繼續累積利潤;如果由高位 6.03 跌番 8% 到 5.55,再買入 10,000 股,平均成本價 5.26,初步目標價 7.00 (賺 33%),希望 3 個月可以達到,到時再決定是沽出還是繼續持有到 2008 年。

Friday, December 22, 2006

江西銅 (358)

個市升到咁經己無乜好買,惟有研究落後股,博遲下可能有機炒上。我 33 隻愛股之中,似乎江西銅 (358)值博率唔錯。原因如下:

(一) 基本因素過得去:邊際利潤率 14.20%, 資產回報 14.36% , 股東權益回報 22.47%,流動比率 185.11%, 長期負債/股東權益 15.34%, 債項/股東權益 36.01%, 週息率 2.37%,股價/賬面值2.74 倍,各種數據表面幾健康。

(二) 技術走勢:52周最高為 9.75,目前市價 7.83,短期跌穿10天 (8.16),20天 (8.28),50天 (8.36),100天 (7.95)所有線,都算幾弱。暫時可以150天 線 (7.65)當支持位。

(三) 盈利預測:今年八、九月於 7.30 到 7.60價位,幾間大行叫買入,目標 10.00 到 11.30 左右,06年到 08 年 盈利預測 EPS 分別為 151.81, 155.2 及 148.0,都算 OK。過去四年盈利基本年年上升, 67.70 (2005), 41.60(2004), 19.00 (2003), 6.40 (2002)。

(四) 2007年經濟發展加快,金屬資源股應有需求,周期股大上大落,不宜永久持有,但可以炒波幅,看圖低買高賣。

結論:可以在 7.65 到 7.80 買入,持有三個月,博 2007 年3月宣佈2006年全年良好業績時炒上,目標價 10.00 (賺28%) 到 11.30 (賺44%)。

我口話離場,但今日以 7.83 買入左 10,000 股江西銅 (358),靜待明年初收成。

短線投資者又贏一鋪

唉!短線投資者又贏一鋪!世事雖末必往往如煙,但卻往往如此!

不相信高風險高回報的我,又上了寶貴的一課!

PC 昨天入市狂炒 3968, 3328, 694 同 763,我其實好擔心佢今年衰收尾,不過個口就緊係話「係呀,隻隻優質股呀!衰左可以長期持有!」結果今朝一開市,除左隻 中興通訊 (763) 上唔番 35 皮 外,其它三隻就係咁喪升!果隻首都機場 (694) 至嚇死你,我一邊同 PC 講緊電話,佢就一路由 5.47 掃到上去 5.70,我叫 PC 好快收線,唔係走寶唔關人事!佢靠有線電視報價無咁貼市既!結果佢轉身 5.75 沽左,之後隻 694 仲繼續掃到 5.92 至肯停。

PC十一點就 一口氣沽清四隻「優質股」,又袋兩皮落袋!前後唔夠 24 小時。真係行起運來唔恨得咁多!呢 D 咁進取或者叫豪放既買賣策略 (其實唔知佢係米有策略),真係只可以遠觀而不可以褻玩,兼且要肅然起敬。PC 就無你咁好氣,前後兩鋪合共八萬大元落袋,當出雙糧兼渡過一個悠長的肥聖誕假期!

我話 PC 你使唔使做到咁進取同咁大既驚嚇作用?

佢話:「今年我買俾亞媽 D 缸瑤柱要大粒 D 嗎!」

死末!

美股買賣

網絡投資的第一本書 (黃偉齡、許勝雄)
Call No.: 563.5 0874

(一) 美股買賣
- New York Security Exchange (http://www.nyse.com/)
- Nasdaq (http://www.nasdaq.com/)
- Technology Stocks (http://www.redherring.com/)
- 報價 (http://www.quote.com/)
- 新聞 (http://www.news.com/) (http://hk.finance.yahoo.com/gainers?e=aq)
- 熱門股排名 (http://www.marketguide.com/)
- 投資推薦 (http://investor.news.com/Engine?Account=cnet&PageName=MARKETSUMMARY)
- 搜尋引擎 (http://moneycentral.msn.com/investor/research/wizards/SRW.asp)

(二) 基本分析 (Fundamental Analysis)
News
(http://www.news.com/)
(http://www.hoovers.com/)
Stock Basics (close, high-low, ratios, industry average, company comparison, financials…)
(http://www.hoovers.com/)
(http://www.edgar-online.com/)
Analyst Recommendations
(http://www.justquote.com/)

(三) 技術分析 (Technical Analysis)
Charts
(http://www.bigchart.com/)
(http://moneycentral.msn.com/investor/research/wizards/SRW.asp)

(四) 買賣
- E*Trade (http://www.etrade.com/)

(五) 組合追縱
(http://www.entrypoint.com/)
(moneycentral.msn.com)
(http://www.cnetinvestor.com/)

這本書不是有何特別之處,不過作為一個 Reminder 也好。其實,用同樣方法分析港股也是一樣,但要換上免費香港網站,這方面就遠比不上美股了!

Thursday, December 21, 2006

年尾開始離場及看書

群鶯亂舞,今日唔少股份升到不亦樂乎,有人快樂有人愁,視乎你有無貨及有乜貨。埋單恆指跌左 17 點 (19,223) ,國企升左 70 點 (9,500),成交 463億,動力麻麻地。

今日埋單我的組合升了 8,900 蚊,但我並不特別開心,而且有些悶。因為現時個市,買賣都難,炒賣風險又太高,沽貨則每次都證實是錯誤,因為在升市中太早沽貨會令過去所有心血付諸東流。問題是 19,223 的資金市是否還會一口氣掃上 21,000 點?調整 10% (跌回17,300) 至 20% (跌回15,400)幾時出現?會唔會真係出現? 如果不調整而能在較低位入貨,恐怕我 2007 年的目標 (40%) 好難達到,因此有些納悶。

我對現時個市,感到參與不易,因此打算年尾離場及看書。暫時離場原因如下:

(一) 現時個市幾乎買乜都升,個個係股神兼賺錢,抽新股隻隻得;大師的智慧教落,太 Easy 賺的錢背後一定殺機重重,我只打算做一個快樂的投資者,每年資產做到每年 15% 至 20% 增值己心足,然後運用 The Power of Compound Interest 去番兩番,時間才是我的真正朋友。而家個市明顯風險太高,不利於我的長線穩健策略。Easy Money 留番俾有賭博基因的股友賺,我要嚴守自己的紀律!

巴菲特教落:「......離開股票市場,進行獨立思考。......在股票市場中勝出的人,並不需要很高的智慧或學識,但必須具有無比的耐心及嚴守紀律......!」

(二) 今日不少股份都創 52 週新高,例如恆隆 (10) 最高 22.00、恆生 (11) 最高 105.60、大酒店 (45) 最高 12.80、康所傅 (322) 最高 7.50、浙江滬杭涌 (576) 最高 5.85 、聯通 (762) 最高 10.58、中國海外發展 (688) 最高 9.26,這些非熱門股都開始創 52 週新高,我覺得個市隨時可以玩完,係時候離一離場睇定的;

(三) 新股熱潮終於開始反覆,優劣出現,陽光房產 (435) 一上市收 2.43,跌穿 2.60 招股價,連香港股神李兆基大爺都無面俾;另外炒左兩日隻中煤能源 (1898)主席經天亮剛誇口有能力似中國神華 (1088) 兩年番一番,今日只能收 4.98,微跌 0.6%,即係炒唔起。係股民 IQ高左,定新股神話後力不繼?

(四) 現時炒大陸A股和香港H股差價,但隻 A50中國基金 (2823)今日就跌 3.3%,收 102.00,急升急跌,短炒隨時中招;

(五) 我每天睇實果批我可能再買的優質愛股,唔少炒上曬新高,而且一山還有一山高,例如中國神華 (1088) 收 18.14,中鋁(2600)收 7.61,交行 (3328) 收 8.26,建行 (939) 收 4.56,國壽 (2628) 同平安(2318)更加唔使講啦!無貨在手但升到你有得睇無得食!不過其實泠靜 D 睇睇個走勢圖,我覺得似乎現時應該係鬆人既 Timing,年紀大左,小心駛得萬年船,血汗錢要小心 D 好;

(六) 老友 PC 唔夠兩日前先至沽左國壽收水入袋,猛話無貨一身鬆過聖誕,今日轉身又入市狂炒 3968, 3328, 694 同 763;另外 ML 又入場炒 397 (一隻過去五年中四年蝕大本剛剛改名的垃圾仙股) 同埋 728,而且又想追番 694,似乎個市日日塞錢入你袋。而家個市日日都迫人在貪婪同恐懼中生活,唔多棧鬼;我係膽小如鼠之輩,不如離場去南丫島曬太陽飲下午茶,Keep 住個 Peace of Mind 同埋 清醒既腦袋。

至於睇左 D 書既有乜心得,稍後會同各股友 Blog 上分享。

Tuesday, December 19, 2006

買落後股

望穿秋水,今日恆指終於跌228點,成交有544億。芬佬歲晚收爐,睇黎要跌多幾鑊才對瘋狂股民有些少阻嚇作用。不過,有錢無貨又貪心,可以做乜?買落後股也!

今日一口氣入左三隻股,睇下零七年支上上簽靈唔靈。

(一) 以 9.99 買入創科 5000 股。今朝 10.26 開市,一直被人質低到 9.97 才反彈。隻股近期仍被各大行唱淡,並且齊齊出貨。隻股己經跌足一年多,我認為己經衰夠,2007年應會改變方向。最好笑係有大行一邊出貨 ,瑞銀又一邊唱6-12月之目標價見 13.80- 14.20。我主要係買佢基本因素唔錯,P/E 13.8 倍,週息率 1.88%,ROE 16.7%,P/B 2.43倍,邊際利潤率 4.56% 就差的,不過唔係又點會插水插足一年! 曾經何時,創科是升了十個開的優質股,由 01 年到 06年 升足五年,2蚊升至20蚊,幾時買都有錢贏,似足如今的思捷。事實上,過去五年甚至 2006 年上半年,創科都在賺錢,因此我有理由相信佢會否極泰來,要唔要等到 2008 就難講。

2007年,保守D目標係 25%,升番到十一月中時 (唔係好耐前架) 既 12.60。進取D希望 45%,升番2006年二月到六月 14.50 既橫行密集區。

保力加通道下線於 9.50,如果跌到呢個水位,我會再加注買入5000股。

(二) 以 4.97 買入 16,000 股北京首都機場 (694)。奧運概念股,但係實質既機場股,飛機升降愈多就會賺。過去五個月在 5.00 橫行,係時侯買入第一注。基本因素唔錯,P/E 21.7 倍,週息率 2.38%,ROE 11.1%,P/B 2.13倍,邊際利潤率 29.36%,唯一唔好係近 52 周高位 5.65。

概念股目標係難估,希望升至 7 蚊 (40%),甚至 10 蚊 (100%)。2008年會有可能。

假若 2007 年頭跌市,在 250 天線 $4.74 以下考慮再買 10,000 股。

(三) 以 3.80 買入 10,000 股中國銀行 (3988)。主要短炒,因為中國銀行從近期高位 4.00 回落 5%,買些少博博,再跌再買多D,短線升 10% 後形勢唔好會考慮沽,跌又會長考慮期持有,講得好聽 D 叫進可攻退可守。

如果信大行講,2007 綜合目標價 4.56 (20%),2008 目標價 5.18 (累積 36%)。

結論:大市位高勢危,買優質落後股 (中國銀行唔算落後) 然後耐心等運到,勝算較高。

Monday, December 18, 2006

雞糊 IPO



新股上市集資 (IPO),超級大戶身家多了過百億,小股民爭相認購,個個有錢落袋,銀行一口價催谷做 Margin,明年首季又有三十幾隻國企排隊上市抽水。究竟 IPO 是否必贏?

總結一下十二月的 IPO,可能對各股友有些啟示:

(一) 想發 IPO 橫財,絕不可「得失朋友」!否則學不到亞洲股神李兆基身家多了四百億。生意人長袖善舞,自有成功之道。不過可惜我就無朋友俾我得失,更加無塞錢入我袋的所謂朋友;

(二) 銀行一口價猛說你做 Margin,我唔敢話唔得,但是否有肉食,你稔你啦;

(三) 上市首日短炒,陸羽仁在企業CEO個Blog有詳細討論,但以三注錢入市,向上博10%,向下可能蝕20%或27%,似乎值博率不高。而且:
(a) 第一注開市即入,但分分鐘買不到低位,原因是開市五至十分鐘內己升至全日高位,摸頂機會極大;
(b) 一旦首日摸頂後,股價拾級而下,即使有可能買入第2注及第3注,之後上唔上得番去高位,真係祝你好運。

看看十二月上市後的 IPO,全部都在上市的第一天大升,好似好勁,但之後點?

(a) 到今日仍可以企穩響第一天收市價的其實只有奧普集團(477)及中國通信服務(552);

(b) 其他所有 IPO 都拾級而下,一日低過一日,包括安徽天大石油(8241)、建滔積層板(1888)、招金礦業(1818)、金達控股(528)、中國交通建設(1800)、中國交通建設(1868)、上海錦江國際酒店(2006)等,是否優質股也好,無一倖免。安莉芳(1388)今日上市升到 5.10,但明天是否企穩,開市就知。

(四) 用黃表抽新股,首日即沽,食雞糊,餐餐清!

結論:新股IPO 必勝之道,其實仍然是堅持用黃表只抽一手,上市當日即沽!密食當三番!絕不可以「長期持有」,要分清楚IPO絕對絕對是投機,而非投資!

明年首季那批 IPO 其中混水摸魚之輩一定不少,想要賺番餐茶錢,更要青蜓點水,走位靈活,亦要學陳馮富珍,日日食雞......糊!

其實,我唔識得有人能夠靠 IPO 發達,除左果的唔喜歡「得失朋友」既人係例外!

Sunday, December 17, 2006

2007年運程


2007年抽到一支上上簽,求財正勝,希望今年目標指日抵達。

各股友共勉之!

Wednesday, December 13, 2006

投資報刊之花果飄零

以前看經濟日報,感覺是一份有料的投資報刊,能報導世界經濟大事,分析透徹,讀者閱後自有得著。而信報的林行止及曹仁超文章亦有其觀點,珠玉紛陳。

如今我仍每天買一份經濟日報,感覺己大不如前,是可看可不看之間,購買其實只變成了習慣,內容己大大失色。老友 PC 早己索性專注信報,因為財經內容素質明顯仍高一皮。

十五年前當我開始投入炒股,仍是牛頭角順嫂及維園亞伯水平,仍是逢新股必抽、逢報章貼士必研究之時,每份報章對我分別不大,都是來者不拒。近年終於下定決心,要總結一下點解財經報刊看得愈多,炒股輸得愈勁!

經過一番努力後,我終於明白到投資必勝是要去看「書」,而不是日日去看經濟日報。其實,經濟日報只能提供「資訊」,而不能提供「智慧」。看多了一些財經經典(註),更知道炒股如運動,開始時做錯了基本動作,遺害一世,而且永遠成不了高手!

近年來,經濟日報內容的改變,令我不以為然。只略舉些少例子:
(1) 股票貼士滿天飛,日日總有十個八個 number 推介,財經演員氾濫,買中贏錢你好彩,買輸關人鬼事;
(2) 大篇幅加增炒輪內容,炒輪者大多數收場如何,以前有先例可見。辦報者太過投讀者所好,變相火上加油;
(3) 每季十大必升,怕你唔信,日日唱和;
(4) 專人尋訪,高調報導看該報貼士炒贏讀者的「新聞」,圖文並茂,加強信者得勝的訊息。

儘管部份股民或許素質如此,我覺得有份量的財經報刊,也不應太過投其所好,尤以過份豉吹炒輪為甚。現時對我來說,「經濟」日報己經只是一份副刊為主、財經為次的付費報刊,而且感覺上變成了「經濟」負擔!

其實,免費日報的專欄似乎更佳,blog友的內容亦正,我估不用很久,要付錢的財經報刊的生存空間只會更少。信報賣盤後,林行止及曹仁超相繼淡出,難免令人有「投資報刊之花果飄零」之慨嘆!

我的朋友中,大多數仍然視股票為賭馬、賭波或打麻雀同類產品,未知香港如何進一步推廣投資教育?

(註)
(1) 任何有關巴菲特 (Warren Buffett)的著作;
(2) 有關 Peter Lynch 的著作,e.g. One Up on Wall Street, Beating the Street, Learn to Earn
(3) 有關 Benjamin Graham 的著作, e.g. Security Analysis, Intelligent Investor
(4) 有關 Philip A. Fisher 的著作, e.g. Common Stocks & Uncommon Profits
(5) 有關 Andre Kostolany 的著作, e.g. 一個投機者的告白、金錢遊戲、證券心理學

Tuesday, December 12, 2006

趙世曾金句

富豪趙世曾於今期Money Times訪問中講佢炒股之道:
(1)用2億元入飛抽新股,例如中國交通建設 (1800);
(2)低價買入,長期持有,例如2元買入中石油 (857),如今10.32翻了四倍;
(3)天災橫禍時大手買入優質股,例如80元買匯豐(005)、6.95元買國泰(293)。

以上所講幾點,似乎今日己經係老生常談,無人唔知的顯淺道理。奇怪係唔知點解,咁多人明白左都唔去做,仲唔拿拿聲跟住上去做富豪,反而響度日日抽新股!

諗真的,原因可能係:
(1)無2億元 (所以日日抽新股係多餘既事);
(2)做唔到「長期持有」(自己抵死);
(3)天災橫禍時又怕死,無膽(都係自己抵死)。

點至做到?

富豪趙世曾有以下金句,可能對你有所啟示:「我都唔等錢使,我當匯豐股票係紀念品!

Monday, December 11, 2006

順龍(361)生死未卜

David Webb 今年聖誕精選推介順龍控股 (361),即使人人皆知佢持有5.01%,但金手指一出,威力沒法擋,再無人討論呢單係Conflict of interest 或者 Common interest之事,股價 4/12 應聲由 0.87 彈上1.18 收市,升 35.6%,成交 1033 萬。

呢個星期順龍股價企定唔上唔落,今日收1.10,買入買出只係兩三個價位上落,成交得果58萬。

睇番過去半年,順龍平均成交額只得果50零萬,即係話如今成交額開始回復正常。但成交咁少,究竟係股民惜貨,坐定等再升,還是跟風追入之散客經己中招?假若股價再乾升,成交又咁少,點甩身呢?

過去七年,David Webb 的聖誕精選推介從未令股民失望,但今年又會點呢? 師父教落,無成交量的股仔好難炒,分分鐘高位出唔到貨。順龍會唔會例外?

順龍己升 35.6%,是否今年目標價己達?一年的升幅幾日己炒完,再持貨仲有無意思?

Sunday, December 10, 2006

匯豐08年合理價 $200

東尼 (Tony Measor)天下第一倉組合據說平均每年升28% ,是否可以跟風?匯豐近日跌到$140.90,都幾吸引,東尼話08年合理價 $200,你博唔博?

跟東尼方式推算,07/08年以下股票之合理價:
宏利 (945):$298(07) / $343(08)
匯豐 (005):$188(07) / $211(08)
中鋁 (2600):$16.55(07) / $18.21(08)
中國遠洋 (1919): $8.16(07) / $10.78(08)

最關鍵是公司的盈利是否繼續升!

詳細計算如下:


Friday, December 01, 2006

彼德林治選股

彼德林治 (Peter Lynch) 認為,任何公司的合理本益比(市盈率, P/E),都會等於它的盈利成長率 (EPS growth).比方說,如可口可樂的市盈率是15,你會希望它的盈利成長率也是15%。

如果以盈利成長率除以市盈率,數值小於1那就不理想,如果是1.5 的話還可以,你真正要找的是數值大於2的股票。假如公司的盈利成長率是15%,加上3%的股息率,而市盈率只有6倍,計算出來的數值是3,那就非常正了!

先按以下六個條件,選出了一些股票,然後計算一下彼德林治的 ratio:
(1) 邊際利潤率 (profit margin) >= 15%
(2) 股息率 (yield) >= 2%
(3) 每股盈利增長 (EPS growth rate) >= 25%
(4) 資產回報率 (ROA) >= 15%
(5) 股東權益回報率 (ROE) >= 15%
(6) 市盈率 (P/E) <= 20倍

結果如下: