神奇藥煲 (260)

「財多身子弱」係至理名言！後生時候就龍精虎猛但係荷包多數無乜水，到左事業上左軌道又有樓又有股票後，就唔經唔覺積勞成疾變左長期病患者，所有因為亞媽生得自已基因唔好、又或者祖先遺傳、又或者前世唔修既 Symptoms 通通出現，例如三高〔高膽固醇、高脂肪、高血壓〕、糖尿、心血管、鼻敏感、白內障、痛風、脫髮、坐骨神經痛、風濕、關節痛或卡卡作響、肩周炎、心律不正、老花、怕冷、多夜尿等等，多不勝數！

西醫睇病只重「控制」 Symptoms，出手就係止痛、止咳、消炎、Anti-biotic等，治標不治本，而「調理」長期病患大家都知一般都係中醫中藥較佳，但係煲中藥從來都係上班一族最頭痛既事！

「哎唷！夠鐘出門口啦！仲點可以等佢四碗半水煲埋一碗呀！」

中藥雖然出左 D 「農本坊」藥粉沖劑，又或者代煲藥液既真空包，但用藥材即時煲出既藥總係新鮮 D 及原汁原味 D！而家煲中藥既睇火難題終於解决左啦！市面有個用電既神奇藥煲，只要放入藥材及四碗半水，一插電制，一個鐘頭後就會自動煲埋一碗並且出聲叫你去飲藥！嘩！簡直神奇！最正係可以晚上睡前用慢火掣煲定藥〔約四小時〕並以 70度C保温，到天光返工前可以即飲，簡直方便到暈！因此上次我去睇中醫，先至第一次感到煲中藥都唔係難題啦！我地 D長期病患者應該頒個 Nobel Prize 俾呢個神奇藥煲既發明人！此煲屈臣氏有賣，只係 $198，好抵！

有篇 Blog 文講對沖基金爆煲時可能帶來既禍害，有空不妨一看！〔對沖基金有難：Hedge Fund Research Inc統計顯示，直至月中，全球對沖基金平均已輸了3%。美國專門投資股票的對沖基金更損失5%，只好沽貨套現，屆時又會不會展開新一輪「真正」的沽貨潮？= 股災？〕

「低買高賣」 (259)

係人都知要從股市中賺錢好「簡單」，就係「低買高賣」！

但係真正能夠「做好呢份工」既人唔多。反之，心中想住「低買高賣」而結果隻手卻以「高買低賣」收場既人更多，我既土瓜灣租客陳女士就係其中之一！我唔知佢 19.50 追入既 857，能唔能夠捱得過上週插落 9.58 果一刻震盪，如果過唔到呢關、同埋如果守唔到最少六個月，佢 857 既錢實行凍過水矣！

上週低位，我嘗試去了解一下有邊 D人能夠做左「低買」既動作，初步觀察所得有以下幾位：

EW 於跌 2,300 點當日下午 3:30 左右大手買入，估計己經係「低買」水平，或者入左 100 萬貨都未定；

LP 於 $121 買左一手中移動 (941)；

「紅猴股評」Blog 主 22 Jan表示於「股災」中作組合重整，確實買賣就唔知，不過佢開始減少左短炒二三線，重視長線持有 2800 及 2828，思路開始有 D 同我殊途同歸啦；

多月未有出手既市場先生自語 Blog 主 於 21 Jan 以 32.85 買入 4 手中國人壽、於 22 Jan 以 28.8 買入 4 手中國人壽及以 25.3 買入 4 手 3968 招商銀行，並表示「未來會繼續加碼買入金融股, 名單包括: 945, 2318, 2628, 3328, 3968. 邊隻跌得多就加邊隻, 直至現金水平降至0%」！

MY亦於 $118 先買左一手 941，之後再跌有無再買就唔多知啦；

而據 PC 傳聞 22 Jan 亦有 D 機構決定入貨，多少就不得而知，估計都唔會係少數，分分鐘以百萬千萬計啦。

而我，雖然好不幸因為「乾水」唔能夠成為「低買」既一份子，但上述例子顯示左唔少小股民都係愈來愈成熟、愈來愈膽大心細、愈來愈有知慧，咁就唔會咁易中 D 大行妖言或受害於大鱷既陷阱了！各位親愛既股友，你又係唔係「低買一族」呢？係就恭喜你啦！記住 Buy & Hold 啦！

美國股市仍弱，臨近議息〔或者再减 0.5%〕，期指淡倉大戶於結算前仍興風作浪，無符！恆指中午跌 1,000 點，但可以不理！今日又有飯局，去Hilltop Country Club 嘆番個 Lunch 再算！

蛇鼠一窩 (258)

法國興業銀行近日爆出欺詐醜聞，涉及該行一名交易員 31 歲的凱爾維爾 (Jerome Kerviel) 違規交易，炒輸期指，令法興輸左 49 億歐羅〔約 560 億港元〕。而最奇情在於呢條 Jerome 仔在銀行內只係一名唔起眼既低級職員，但違規炒期指就瞞天過海達 1 年之久！報章仲話佢「藉熟悉內部監控程序」，又話佢係「電腦奇才」云云。

尋日同幾個在金融界打滾左半生既師兄弟傾開，個個一邊搖頭一邊媽媽聲話：「刁那星！揾泥講！」

當中一個現職正正在法興〔香港〕做緊好 Senior 既師兄斬釘截鐵話：「一條友攪到單咁既野出來，根本無可能！」

我追問：「言下之意係……？」

法興師兄話：「梗係成班人做出來架啦！多數係一直就違規炒期指，開頭炒輸少少，於是加注想翻身，點知愈輸愈大，最後唯有揾條靚仔做替死鬼，一個人認曬佢！」

我心稔：「乜 D 橋段咁熟既…！」

另一間大行既師兄認同：「你稔稔！就算做完 Trade 可以用假盤做假平倉，但係仲有 Compliance、 Settlement 等、而且一旦個 Account 有 Active Trading 又點會睇唔到呢！」

法興師兄最 X 慶係法興法國母分司明知一定會爆大獲，但就不動聲色，連香港法興都唔通知，在 48 小時內瘋狂抛售百多萬張總值高達 700 億歐羅（約 8,000 億港元）既歐洲期指，為法國母分司減少左唔少損失，但就攪到全球包括香港在內於 1 月 2 1及 22 日出現左既小股災！

法興母分司事後出新聞稿解畫時，據說仍唔通知香港法興！結果一見報後香港法興 D 客紛紛雞飛狗走，取錢走人，攪到香港法興雞毛鴨血！好難收科！利字當頭，甚麽自已友都不顧！為免走漏風聲，你香港死好過我法國死！

此情此景及法國母分司的所作所為，你會唔會相信呢單野只係 Jerome 仔一條友既事呢？我只覺蛇鼠一窩！

唉！ 所謂「銀行業監管」或「証監會監管」往往唔係廢話連篇就係賊過興兵！前排香港証監會先至大大聲譴責左一間三年前經已執左笠既上市公司既父子董事！真憨居！

要在兇險既股海達致財務自主，唯有嚴守紀律、戒貪戒噪、自求多福！阿彌佗佛，阿門！

H股ETF (257)

H股ETF (2828) 過去三個月既走勢係一浪低於一浪，形成左一個又清晰又美妙既下降趨勢。而每次反彈到趨勢線既上限即下跌，而每次下跌到趨勢線既下限即反彈，即使大前日既 –2,332 點狂跌，亦係以插到趨勢線既下限即告終，翌日仲立即反彈！

因此，觀察今次趨勢線既上限來推測今次既反彈目標係在 $153 左右，亦即係 150 天線 $153.76 左右！策略上如打算增持現金，技術上在 $153 左右似乎係短線既沽貨位〔雖然仍未返回 $160 既入貨水平〕！

當然，道可道，非常道！

(a) 長線既「堅決 Buy & Hold 者」基本上可以不用理會呢類推測；OR

(b) 竟然升穿左 $153 趨勢線既上限就變左「轉勢」〔亦即臨界點〕，咁就不單止唔好沽住，分分鐘仲要加注買入，上望 $163 到 $165 既上兩次反彈高位。

所以話，「順勢而行」呢句話永遠無人敢話你錯既！

今日真凍，好彩有兩個於日本城賣 $30 既暖水袋護住任督二脈，否則震震下兼見尿急真係連 Blog 都寫唔到！你都「拿拿臨」趁有貨去買返個用下啦！

紀律第一 (256)

陸羽仁於「同一個老細」文中認為今次係一個有計劃既跌市，香港跌市只係美國政治角力既配角。假若當真，香港既跌市是否己係尾聲？

今日寒風細雨，同 PC 嘆完茶後作健步行，冷雨撲面迷糊眼鏡中的青馬大橋，別是一番蕭瑟悽美！冰冷寒雨濕透了的腦袋，思維更加清！

我們總結一下目前處景，都認同儘管我們的大市分析方向雖然沒有大錯，但在操作上仍脫不了操之過急的格局，面對急風暴雨的大升大跌，就出現了入市過早、入貨過多的景况。未來的策略重點應是：

〔一〕買賣嚴守紀律，未跌到價或指數水平堅決不買；

〔二〕嚴格保持起碼 30% Cash 作操作上的平衡點；

〔三〕堅信每次跌市尾段「恐慌性沽售」必會出現，才是入市良機；

〔四〕忍無可忍的時候，要再忍一忍；

〔五〕像一個機構投資者般的心態去專業操作；

〔六〕趁今次回升重整 Stock 及 Cash 比例；

〔七〕上半年仍看淡美國經濟，隨時準備面對因美國引起的香港跌市，可以是下一浪的入貨良機〔假設有 Cash〕！

今日個市好反覆，趁上午抽上 570 點時以平手價 $6.01 沽出餘下的 10,000 股 939 增持 Cash，下午收市倒跌 550 點，來回 1,100 點，真玩野！

控制入市資金 (255)

從恆指圖表看，今日強勢反彈 +2,332 點重上 24,090，營造左一個美妙既島型見底反彈，加上 1,563 億既大成交，技術上似乎最凶險既日子己過。不過，由於現時既市況人為味重，不可盡信 D 技術圖表！島型見底反彈後，我估計會再升多兩日！

現時減息 0.75% 己公佈，要再看美國佬下一招出乜花款，再定去向。恆指上落咁大，一彈就遠離 250 天線，尋日狂叫「股災到啦」及「熊市黎啦」既言論，今日又己過時！所以千祈唔好「尋日話今天」，因為於大戶既炒作市中，「話今天」準極都只係 50%！應該要似葉劉咁講：「你地放長雙眼睇啦」！咁就唔會俾今次既「準股災」一下嚇親！

由於今次大戶有力一野將尋日個市插到落 21,757，遠低於初初我所估計既 25,000 ~ 23,000，因此要重新估計後市再插落 18,000 或以下既風險〔雖然我認為今鋪經已見底〕。亦由於今次我於 27,000 「高位」已入市買 2828，因此經己貨多錢少！

策略上應趁今次反彈減磅增持 Cash，以防不測！應以控制入市資金既比例為首位，成敗關鍵在此！畢竟，CASH IS KING！有 Cash 就有的是機會，最怕機會來時無 Cash！

尋日就係一個好好既例子，下午時份跌得最慘時，隻隻股都平到你笑呀！可惜我己乾水了！尋日只聽聞得 EW 一個又有水又敢大手入貨，的確好野！呢…呢…呢…呢 D 就係 Winner 既行為，於人地血濺街頭屍橫遍地時入貨！至於其他人，多數唔係扮蟹就係扮 Chicken 或者哭股喪！

趁今次反彈，於 5.80 先沽出 10,000 股 939增持 Cash，微蝕 –$2,050〔-3.4%〕。

對今次狂跌暴升既市況，我認為最好既策略係 Stay Away，多用平常心，升完總會跌，跌完總會升，我呢幾日都故意唔買經濟日報，以免受妖言所傷〔前兩日己有間大行既分析師話美國經己步入好似 1929 年既大蕭條！XYZ！正一 Bull Shit！〕。反而唔少 Blog 上文章，仲有更高參考價值！

一些參考 (254)

其他 Blog 值得一看的文章；

未來中國黃金十年的投資方向(1)

未來中國黃金十年的投資方向(2)

解讀平安保險集資1700億

點解中國經濟會高速增長?

鞍鋼系列 – 中國式工業革命

買入中國人壽

買貨良機 (253)

以為唔會出現既「終極一跌」終於都出現左！

成交得果 1,175 億，大戶借美股插港股既人為味道仍然好重，但大戶就係有本事「日插千點」又的確要服佢！無符！今日又跌 1,383 點去到 23,818 既低位，睇來期指淡倉大戶要 Show Show Quali，穿一穿 250 天〔23,490〕既所謂「牛熊分界線」至肯收手，到時市場一定傳言股災到啦、熊市到啦！相信散戶輸清之日，亦就係大市重拾升軌之時！

今日既狂跌，的確好慘烈，唔少短炒散戶，恐怕己血濺街頭！而咁悲慘既氣氛，亦就係買貨良機！今日我終於決定將「棺材本」既加拿大 RRSP 都用來入貨，全數盡買 2800 盈富基金 〔$24.30〕及 2828 H股ETF〔$138 及 $136〕！RRSP 要 65 歲至可以取回，到時希望舊錢可以變大十倍八倍就好啦！

我認為如今係買貨既良機 because：

〔一〕市場愈跌愈無理性，而成交量又不配合；

〔二〕市場己對好消息無反應〔例如銀行股盈喜〕，但對壞消息就反應極大，係好 typical 既見底現象；

〔三〕近日指數要升就升，要跌就跌，可以不理外圍，正常反常隨心所欲，反映貨源歸邊；

〔四〕據說近日有 D 股壇資深高手，上週跌市時病緊都彈起要跑返公司入貨，免失良機；

〔五〕林森池大師近日在這水平己頻頻入貨，亦明言而家 941、2628 等都係豆腐渣價，終需有日龍穿鳳，我信佢！

〔六〕港股 P/E 不經不覺己跌返落 16 倍左右，如計埋 2007 年業績公佈後既調整，可能只得 14 倍，健康過肥彭定康，正常過黑白無常。

各位親愛的股友，無乜貨又有錢者不妨考慮一下買翻 D貨，coz 此乃買貨良機，但當然買左之後難免會有陣痛，但陣痛完既快感又會令你覺得痛有所值！當然，「投資涉及風險，買賣後果自負」既老套說話我唔多講啦！

第十一日，短線組合既浮動虧損應該不少！但由於持有既係優質股，一定不會用止蝕方法處理。反之，一於繼續持有，直至反敗為勝既時刻再算！

吃在荃灣 (252)

荃灣地鐵上蓋 綠楊坊 二樓最近翻新後，令人眼前一亮。全層打造成多元品牌食店，一洗荃灣無處好吃的污名。

除高檔的 潮江春 座鎮外，還有各式各樣的風味！板田壽司 大排長龍，廣受歡迎的三文魚壽司只賣 $9；三分鐘已坐滿人的 上海城隍廟小籠飽 半打只賣 $30，蟹糕灌湯餃 $29；雲南風味的 滇家菜 強調不含味精，汽鍋燉烏雞湯只 $28 位：品味人生中菜廚房 有七、八十種自創的中式西造點心，例如中國沙律手卷 $35、鐵板香滑雞 $42、及最正的自選 1+1 腊味雞粒飯+香煎羅蔔糕只 $11；越棧 的各式越南口味亦選擇多多，下午茶湯粉套餐只 $24；熱戀滋味生活館 強調「健康放於預防」，他們的食物 DNA 及飲品 DNA 全部不含毒素〔味精、色素、防腐劑、顏料、添加劑、etc.〕，令你的五種感覺〔視覺、聽覺、嗅覺、味覺、觸覺〕均有美妙享受；又有 Jelly World 糖果店專門招呼為食小朋友大朋友；最正的是 Euro Go Go 的下午茶餐只是 $20 起、$30 止，但有十多款精美食品選擇，而半打的法國薯蓉焗田螺只售 $29，可說是「蘭桂芳食品、茶餐室價錢」，我突然記起上次吃法國薯蓉焗田螺已經是很久、很久、很久以前的事了！

綠楊坊還有各類店鋪，例如 鐘錶店 售賣 Kenneth Cole、MEXX、Katharine Hemnett 等名牌，這些品牌在時間廊可是買不到；又有個 天道書店 吸引各區的基督徒來朝朝聖及消消費。

這裏最適合剛巧出差荃灣的同工，在等待開會前或會與會之間的空隙，可來這處消磨一下。綠楊坊對面還有間三聯書局，有品味、有文化的各位親愛股友，不愁沒地方去！

整個綠楊坊重新設計打造，很明顯花了不少心思。綠楊坊屬於誰？當然是前稱地鐵、現稱港鐵的 66 仔啦！

咁！港鐵 (66) 值唔值得買呀？你話呢？

黎明前的黑暗 (251)

各位親愛的股友，希望你們沒有給這個跌市傷害到吧！

我每日去估明天升定跌，其實心知只有 50% 估中，亦一定有 50% 估錯，估來估去其實無乜意思，更加唔係去估中鐵 (390) 定港鐵 (66) 明天會升定跌而去博短炒！我真正既意義係「觀勢」，從而去找出一個股市正常運動中的「臨界點」〔陳江挺語〕，知所行止，作出買賣。陳江挺言：「炒股是概率的遊戲，逆大潮流而動，你的獲勝概率就大打折扣了！」

股市正常運動本來就是升升跌跌，今次跌市估計係淡倉大戶借美股次按個衰樣來插低港股牟利，今日恆指上落波幅有成 1,244 點，低見 24,134點，加埋前兩日既跌幅，相信有足夠水位俾於 27,500 以上入期指淡倉既大戶，於美國殊仔今晚宣佈救市大計及稍後公佈減息 0.5% 既利好消息出台前平倉獲利！

最近大摩突唱衰叫沽大笨象，瑞銀陸東由唱好 42,000 突然高調改口唱 28,500 見頂，明顯都是大戶打手造勢所為，別忘記陸東始終是瑞銀手下，他的言論一定有利益衝突，過往市場過份吹捧他的測市能力，近乎忘記了他並非中立的身份，今次陸東在跌市關鍵時刻再加一腳唱衰，相信可為瑞銀在背後賺回不少！各位親愛的股友，希望今次市場的大時代精采演出，令我們在將來都可更有智慧、更能明辨市場忠奸黑白、分真與假、人面險詐，學懂趨吉避凶，作出更獨立和明智的投資決定，達到財務自主的境界！

大戶翻雲覆雨，既平淡倉，就會反手做期指好倉，因為股市正常運動本來就是升升跌跌，大戶只係人為製造更大上落波幅圖利，等月尾好消息出台又炒上獲利！

由是觀之，最近三天都跌而不穿 24,000，應該確認見底，黑暗跌市告終，下星期反彈黎明將至！

因此，我個人認為，24,000 ~ 24,500 水平已是近期的股市「臨界點」，可以作買入決定〔例如 2800、2828、941、2628、2318 等〕，但如今己升回 25,202 水平，未知下週是否仍有日插千點的低位入貨機會了。不過，如果你仍是 30% 貨及 70% Cash 的話，於 25,000 水平增持多 10% 貨風險仍然有限。

反彈目標我估〔無錯！又係估！〕最終會到 100 天線的 27,280，咁大戶 24,000 入貨既期指好倉就可以有 3,200 水位賺，應該滿足卦！而初步於 26,000回補下跌裂口後或會反覆有阻力。不過係好正常丫！上上落落，升市好少一鼓作氣既，係要反反覆覆同地心吸力對抗〔其實係一路面對蟹貨既沽壓〕，耐心！耐心！耐心！

我既中線策略仍係反彈到 27,000 減磅，靜待二月尾三月初另一次更大跌市入貨〔不過未必一定出現〕，然後 Buy & Hold 等 2008 甚或 2009 收成！

起來！各位親愛的股友，不願做奴隸的人們，為我們美好的明天努力！奮鬥！歌唱！並記得今晚天寒地凍保暖，唔好凍親背脊！

初步見底 (250)

今日恆指午後抽升 664 點回到 25,115 水平，己遠離 200 天線的 24,313，只差 456 點便可回到150 天線的 25,571。綜觀各股圖表走勢都好相近，我認為現時是初步見底了！

假若恆指明天收市能站穩 150 天線之上，我相信一個似樣 D 的反彈應指日可待，目標是 100 天線的 27,257！

因此由現在計仍可有 2,142 點的上升空間，昨天看了本 Blog 的親愛股友們假若有膽買入盈富〔2800〕 或 H股ETF〔 2828〕，今日收市大概可以好 Sweet 咁同自己講句：「Oh！ My God...! I feel SO GOOD…！」然後去中環 Lane Crawford DO THE SHOPPING！

恆指午後抽升亦令我的浮動盈虧回升不少，收市是 –$48,495 〔-5.31%〕。

等月尾 (249)

大時代中，做了些少買賣。沽出 133 招商中國基金〔$36.5〕，再買了少少 941 中移動〔$125.4〕、 2828 H股ETF〔$150.5〕、820 匯豐翔龍基金〔$9.91〕。

大時代後，浮動盈虧是 -$79,375 〔–8.68%〕。

等月尾，等布殊宣布救市政策，等美國減息，等期指淡倉大戶離場〔參考〕，等個似樣 D 既反彈！

大時代 (248)

人生幾何？今天又見自「九˙一一」以來恆指單日跌 1,386 點及國指跌 983 點的大時代！

「九˙一一」令我痛傷浮生若夢，今日的暴跌我只冷眼旁觀，感覺不深，儘管我亦難以置身事外，亦是蟹貨滿襟，送禮自用兩皆宜！

怕嗎？一丁點兒也沒有！「跌到 25,000 / 23,000 入貨」不是口口聲聲講了很久的話嗎？今天都到眼前來，不是大大好事嗎？可惜的是，原來真真正正當 24,450 / 14,016 出現時，人人已是「扮蟹」多時了！前後的人如 PC、DL、ML 等等皆如此！原來大家都只口講 25,000，實則 27,500 己開始入貨，一是缺乏耐性、二是對 25,000 以下能否出現從來都是半信半疑，因此早些入貨以防走寶，講一套、做一套，「扮蟹」有因必有果。

我從來說：「一是資金控制、二是買賣操作」，辦好這兩點才是股市必勝之道！至於挑選三、兩隻優質價值股或增長股，看這個 Blog 的各位親愛股友們，誰個不會那個不曉呢？

昨天我剛估計短期見底，今日就一把掌打得我人仰馬翻！今日再反思，我仍傾向短期見底的想法，而底可能是 250 線的 23,427，即跌多 1,000 點就收工及開始反彈！樂觀點看，甚至 200 線的 24,286，即跌多 164 點就見底，今天可能己是終極一跌的前夕了，今日成交增至 1,451 億亦有此跡象。

我覺得美股次按勁蝕是舊聞，花旗又有中東油王又有中國投資基金打救，點都唔會執笠，至於今晚內地又調高銀行準備金，明天又可當做壞消息沽內地銀行股，至於內地銀行盈喜可以兩日就忘得一乾二淨。今次大跌，人為味好重〔參考陸羽仁：陽謀〕，我唔相信係災！三兩個星期後反彈時候，大家又對股災忘得一乾二淨！

我目前的對策及分折是：

〔1〕不懼、不憂、不止蝕、不加注、冷眼旁觀，靜待 3 ~ 12 Weeks 後風暴過後，組合重上有盈水平時，再都署下一步；

〔2〕我認為 250 線的 23,427 是今浪的底，如此計算，恆指從 32,000 回調己有 8,500 點，佔升幅 66% ~ 70%，差不多了；

〔3〕手上如果 Cash 仍比股票多的親愛股友們〔e.g. 70% 比 30%〕，應把握 24,450 水平入貨，不懼、不憂，即使跌到 23,000 也不用理，甚至再買少少。中線約 3 ~ 12 Weeks左右反彈上回 26,500 或以上是合理發展！

〔4〕長線而言，3 ~ 12 Months，你於恆指 24,500 水平入了貨，向下風險跌到 20,000 是 4,500 點，向上盈利升到 32,000 是 7,500 點，值博率是 1 比 1.67，但這是悲觀的計算；樂觀點看，向下風險跌到 23,000 是 1,500 點，，向上盈利升到 35,000 是 10,500 點，值博率是 1 比 7 倍！

〔5〕最好買盈富 (2800) 或 H股 ETF (2828) 與指數同步共舞，上述的計算就一定會實現，絕對不受盈喜或盈警影響！

〔6〕今日圖表，恆指雖然跌近 200 天線，但不少板塊仍強勢，連 50 天線都未跌穿，如 11、728、1818、390、1088 等，夠膽博反彈者或會挑強勢股，希望率先反彈；另一種博反彈者或會挑弱勢股，貪其夠殘夠賤，反彈起來也有水位，甚至博長線食大茶飯！不少板塊的弱勢股經巳跌穿 250 天線以下，已是「熊股」，如 1398、5、3988、2777、2007、763、945、2600、135、330、494 等！有錢真唔憂無優質股買！不過，我個人始終認為盈富 (2800) 或 H股 ETF (2828) 最簡單，亦唔會買錯。

總括而言，大時代後總有美麗陽光！我信！升有時、跌有時、扮蟹有時、賺錢有時、財務自主有時、行善最樂有時！死有時！

短期見底？ (247)

恆指自去年 11 月於 32,000 點回落，兩次跌近 26,000 時即反彈，首次反彈到近 30,000，第二次反彈亦到 28,300，今日又插到 26,458 收市了，是否意味著短期見底？又一次反彈來臨？

近日全人類都睇淡，全城唱到一定會跌落 25,000 甚至 22,000，陸東又話 2008 年 28,500 己見頂。我本來一直都有近似睇淡想法，直至兩日前見到一 D 現象，我開始有 D 改變：

〔1〕前日落街，見到住三樓個矮佬駝俠股神，又挽對拖鞋赤腳兼手持經濟日報向看更亞伯教路，指點下佢長揸短炒之道。往時看更亞伯會任駝俠股神講，佢就耐心受教。今次卻見看更亞伯口若懸河，大大聲話：「我知！而家日日跌，就係要震死 D 好友！等跌到25,000 甚至 22,000，就可以入貨啦！」我心內一震！嘩！嘩！嘩！連看更亞伯都可以咁「專業」幫個市批命問前程，簡直係打開口牌！大戶有無咁蠢會咁昜俾你估到下一著？

〔2〕林森池大師跌市話數腳，佢話跌到第三隻腳係可以開始入貨，因為第四隻腳、第五隻腳未必一定會出現！林森池大師於 37.75 開始入國壽，又話 130 元買中移動係合理價，125 元買中移動就係豆腐渣價！今日個市不少愛股經已到達入貨低位，你話「信林森池大師」好定「信自己」好丫？

〔3〕近來壞消息除左「Dow Jones 跌近 12,000」之外，無乜更大單衰野，「次按」經已麻木；但好消息就陸續有來，例如「美國減息 0.5%」、「H股陸續宣佈盈喜」、「國家宏調壞消息盡出」、etc. 因此我較為傾向相信 26,458 之後唔係一沉不起直落 25,000 甚至 22,000，而係短期見底、又一次反彈上 28.000 左右〔50 天線 = 27,995〕，然後再定斷 (a) 再跌、 (b) 橫行、或 (c) 再升！

如此這般，今日於 131.10 又買入少少中移動 (941)。

第七天，組合浮動盈虧因跌市減至 +$6,015 (+0.66%)。

分辨有用信息 (246)

幾年前看過一本好書：【陳信得 : 1小時成為股票精算大師】，當中論及「有用」及「無用和有害」的信息部份，今天記憶猶新。

陳信得說：投資降低風險一種有效方法是透過信息的分折，信息分為：

(i) 無用而有害 的信息：例如
1. 股票交易、價位上落的信息；
2. 解盤信息，專家永遠亙相矛盾；
3. 跟自已投資無關的信息；

(ii) 有用 的信息：例如
1. 跟個股投資有關，但跟總體經濟無關的信息；
2. 跟已投資、或擬投資的個股有關；
3. 個股的長期信息 （e.g. 未來三年營運計劃）。



我總結一下我週圍的信息，大概可分為十類如附表。

看來，參考林森池的建議〔按此〕，以豆腐渣價錢集中買入中移動〔941 = $125〕及國壽〔2628 = $37〕，再加上我喜愛的 H股ETF〔2828 = $140〕，然後 Buy & Hold...Hold…Hold，相信就是 2008 ~ 2010 年「三年規劃」的致勝之道也！

至於財經演員及大行在電台電視每天的推介，就以歌詞「難分真與假，人面多險詐...」來回應吧！

一動不如一靜 (245)

第四天了！大市反覆向上，我的分析暫時仍沒有大錯。

組合之浮動盈虧為 + 30,155 〔+ 6.30%〕，仍在吃這小小反彈！

一動不如一靜，仍要等 28,276 〔50 天線〕；升不升穿，定以後方向！

十大活躍股票仍有 939 及 1398 的份兒，氣數未盡格局，反彈應該未完；5 分鐘圖亦見爭持局面，應有餘力殺上！ 2318 仍弱，但正路升完中資銀行股後，就到保險股發圍！

要趕 12 點車去同 PC 飲茶吹水行山，今日就此打住！

等待短線收成 (244)

港股今日開始出現「孤身走我路」之象，視 Dow Jones 前一晚跌 238 點如無物！港股尾市 15 分鐘更人為地抽上至 27,615／16,139 升 502／479 點，站穩 100 天線上，吉兆！

今日同 PC 行山，亙嘆 Pacific Coffee 之餘，分享短炒之道，英雄所見均認為：「反彈未完！」

點睇？第一目標先看 28,276 〔50 天線〕；如升穿，第二目標將在 28,500 ~ 29,500 之間，到時要靠「嗅覺」了，隨機應變！總之「嗅」到「見頂」氣味，則快全面清貨、短線收成！

然後？下一站：靜待二月底、三月初下一次更慘烈的大跌市來臨！到時再跌 3,500 ~ 4,000 點後，再在 25,000 以下水平開始入貨，一直買到 23,000 吧！〔預期中的跌市底部〕。然後 Buy & Hold 長線 3 ~ 12月，2008 年的收成盡在其中矣！

想法如是，是否成真，上看天，下看地，中看我心！

「零八第一炒」兩天買入各股之浮動盈虧為 + 22,395 〔+ 4.68%〕，剛好吃到這兩天的反彈！

上置 (1207)：昨天於 $1.82 急急沽出，證明判斷正確，因為昨天已覺得走勢極弱，今日真跌落 $1.73！但如果上置跌落 $1.70 到 $1.66 左右，其實可再炒一轉。不過炒弱勢股風險極高，回報率、值博率、乜率都低，不如隨便炒隻強勢股如 939、1398、728、358、2600、2777、2328、2318、2628、857…容易得多！係米？

我的「短線」仍是指 3 ~ 12 日內的一個操作，今天是第二日。

趁有賺，今日又捐少少錢去助養一些兒童啦！對香港世界宣明會我認識不多，但有個靚女叫周慧敏做助養大使，我信心就馬上大好多啦！况且 ...哈、哈、哈、...佢董事會主席個大名係叫做 Dr. Rosanna WONG Yick-ming 喎！怕且我炒股 D 血汗善款都唔會俾 D 印度、非洲貪官污吏落左格卦？

再買少少 (243)

恆指國指各升 300 餘點至 27,500／15,900 水平，昨日買入的建行 (939) 及招商中國基金 (133) 亦有升幅。

上午再買少少，買入兩股： 工行 1398〔$5.39〕及平安 2318〔$78.8〕。

沽出上置 1207〔$1.82〕週轉及套利 $600。

打算恆指國指反彈至 29,000／17,500 水平沽出套利。反彈理據：炒美國 1月 30 日前減息 0.5%。

零八第一炒 (242)

在零八年的一、二月，在 26,000 ~ 29,500 的水平，我决定作一些短炒〔3 ~ 12 日的 in & out trading〕，謀取約 10% 的利潤。風險管理倚靠控制注碼不超過持股資金的 20%。

今日共購入三股： 939 〔$6.005〕、133 〔$32.85〕 及 1207 〔$1.76〕 。

買少少 (241)

Dow Jones 跌 256 點到 12,800 點，造就了星期一開市恆指裂口低開 900 ~ 1,000 點的局面。

這水平可買少少，博反彈〔指 3 ~12 日〕或長揸〔指 3 ~12 個月〕均可。到位可買少少，不到位就不買算了，下次可能仲會跌低 D！

我的首選：
2828：$152 以下；
941：$130以下〔$125以下更好〕。

其他各適其式：
保險
2628：$38；
2318：$78；
電訊
728：5.60；
銀行
1398：$5.00；
939：$5.80；
內房
2007：$8.70；
813：$17.60；
煤
1088：$40~$41；
基金
133：$33；
820：$10.00

二零零八。無想 (240)

〔1〕零七零八之交，與傷風感冒咳嗽為伍，腦交織，吃藥喝水睡眠。面對二零零八，空白，隨想，隨念，隨緣，無想，無念，無緣，也罷。

〔2〕恆指在 27,500 的 +/- 500 點內橫行，國指亦在 16,000 的 +/- 500 點內橫行，距離心目中的入貨水平仍要多跌 1,500 點，但在未來 3 ~ 12 週內應出現，三月底前是考驗耐性的日子。

〔3〕心癢手癢者可留意碧桂園 (2007)，三個月低位在 8.70，今日恆指升 632 點它反倒跌到 8.85，不過內房股要面對宏調政策，太短線未必有運行。

〔4〕西京劉央說她 Buy & Hold 佔 50%，要有三年升五倍的股才合格，另外 50% 做 Trade-in Trade-out，賺 30% 就走一轉。幾年間西京投資基金 (Altantis Investment) 由5 億美元增長至 20 億，劉央聲名大燥。

〔5〕參考劉央做法，原則上我的 50% Buy & Hold 就以上 Blog 239 的其中一款組合做代表，至於 In & Out 的 Trading 就選擇多多，隨機隨緣吧。

〔6〕母校華仁辦校友籃球賽，一呼百應，港九共有八隊參加，兵分兩組初賽。估不到我們這支全場最高齡的七十年代「長者隊」，竟能過關斬將，先以兩分險勝二千年代的年輕隊，再以三分小勝九零年代的青壯隊，昂然進入半準决賽。隊友明則慨嘆今日年輕人之不濟，心實暗喜寶刀未老，仿似沉底仙股一朝暴升的威勢，足以告慰子孫也。

〔7〕土瓜灣陳女士是我的租客，相處甚歡。四個月前得知她初入股場，己替她擔心。昨日得知她在九月十月升浪中賺了十多萬，但其後摸頂買入中國遠洋、中外運、中石油、財險等，倒蝕了三十多萬。現仍手持 10,000 股 19.50 買入的中石油和 12,000 股 16.20 買入的財險，欲哭無淚。看見她這個被大戶布局殺得滿頸鮮血的盲俠，仍只懂自怨及以為只輸在「經驗不夠」，內心只感到一絲絲痛！

〔8〕二零零八，前路如何？順意而行，足矣！