M 巴星撩叉卵住時 (458)

香港過癮之處，在於時不時有 D 好過鬼癮既野，例如一 D 睇到你會「Kit」一聲忍唔住笑出黎既文章。因為睇到「M 巴星撩叉卵住時」，實在如果再唔笑出聲，一定會谷壞度氣！

我認為游清源大大聲咁恥笑此陳克勤君係完全應該既，因為後者質素實在太差（起碼公開場合），一 D 都唔值納稅人俾佢咁既價，特別係在「康港」（大班語）既 Context，英文太過水皮肯定係一種羞恥，表示佢從未為自己既英文真正努力過（中文太水皮就仲係應份兼應該，而且唔係自己既錯，只係政府教育當局既錯，因為如今會考教育局話中文唔使識孔孟李杜，但就要知 O 嘴屈機就可以攞 A，大家有乜法子唔 O 哂嘴呢）^o^！

老實講，我話「香港過癮」其實仲有一個「更深」「更高」「更學術」既層次，就係香港仲可以大大聲咁玩「口音」，而且仲係你情我願，一個鄭大班願打，一個克勤仔願捱。

仲有更「過癮」之處，就係平機會班廢柴，見到克勤仔因「口音」被人恥笑，竟然唔走出黎「主持公道」、乘機「宣揚平機文化」，唔知係扮盲睇唔到「頭文字 Y」定係怕左鄭大班把臭口？

我識咁吹水唔係為講笑而講笑，而係因為我「有國際視野」、「有料」、「有見識」，假假地叫做響「艱難大」住過五年，知道響 D 講「人權」既社會，如果你大大聲咁恥笑人地「口音」或者 accent，針對人地「講英文唔準」，特別對方係「非我族類」時（例如死亞差、死黑鬼、死白鬼等等），分分鐘可以好大鑊。輕則可能被人告上「人權法庭」，重則可能被人即時打鑊金，視乎該隻鬼係米有文化而定。我話「有料」亦唔係吹水，因為當年我響「艱難大」既工作就係幫 D 「受害者」去告 D 「恥笑者」既人權工作，而且又有個 LLB，所以對呢 D 課題既 Sensitivity 係自然較有反應、較「有識見」既！

如今，「康港」仲可以繼續玩「口音」，玩「恥笑」，當然係反映左「康港人」（同埋鄭大班）既「人權觀念」有幾先進，以及「康港」既「人權執法單位」有用定無用。

又或者，立法會班尊貴既議員大人，係另外一類可以制定「two legs good、four legs bad」既動物，生出黎本來就係俾人恥笑既啦！

當然，以克勤仔之質素、民建聯之質素，又實在死不足惜！試問克勤仔代表住民建聯大大聲咁話要「搓 our breast」喎，誰又能接受呢？