幾則國家統計局參考 (104)

看看幾則國家統計局消息，然後睇下對我地有乜野啟示：

消费品销量调查显示：消费趋向名优 品牌引领市场

名优品牌在市场中具有较强的竞争能力，获得了六成以上的市场购买力。

在全国八十余种主要消费品中，销量前十位品牌的市场平均占有率达62.61%

蒙牛 (2319) 在冰淇淋、液态奶市场继续处于领先位置

在白酒市场，五粮液 (000858)、茅台酒 (600519) 占据了60%左右的市场销售额份额 〔代理好像是華潤 (291)〕

燕京 (000729) 在竞争激烈的啤酒市场中表现突出，拥有15%以上的市场购买力。

女内衣市场集中度为62.25%，安莉芳 (1388) 在这一领域继续保持领先，占据了10%以上的市场份额

金利來 (533) 以接近15%的份额遥遥领先于领带市场

黄雅萍：我国贸易顺差创历史新高的因素分析

综上所述，我国的贸易顺差主要是由国际产业转移、国内经济政策调整、生产发展与消费需求相对不足的矛盾等长期性、结构性因素决定的，顺差将在相当高的水平上长期存在。短期内能够使顺差大幅度下降的经济因素是人民币升值的速度，由此推断，当人民币币值上升到一定高度后，我国顺差的增长趋势将出现拐点。

1- 2月份全国规模以上工业企业实现利润增长43.8%

1-2月份，全国规模以上工业企业（年主营业务收入500万元以上的企业，下同）实现利润2932亿元，比上年同期增长43.8%。工业经济效益综合指数186.51，比上年同期提高20.65点。

1月份全国居民消费价格同比上涨2.2% 农村上涨2.6%

1月份，居民消费价格总水平比去年同月上涨2.2%，其中城市上涨2.0%，农村上涨2.6%

首域基金做緊乜 (103)

我好中意間中參考下首域基金既持股，因為 (1) 佢 Update 得快，三月中就己經睇到二月尾既報告，唔似有 D 基金，網上只可以睇到舊年十一月既料，乜都明日黄花，跟都無鬼用啦； (2) 佢好鬼老實咁有講過去一個月買入同沽出乜野貨〔當然只係最主要果一兩隻〕，同埋點解，等你可以考慮跟唔跟，唔似有 D 基金故作神神祕秘，事後都唔肯講做過乜； (3) 最重要既係，首域既基金〔包括香港增長基金、中國增長基金、大中華增長基金、鐵橋基金〕表現都好好，劉國傑主理果隻首域中國增長基金，曾經勇奪一年、三年既最佳表現獎，同謝清海主理既宏利中華威力基金，可以話係一時瑜亮！

睇睇首域基金二月尾 (28/2) 既報告有乜啟示：

中國增長基金 --- 二月購入吉利汽車 (175)、新奧燃氣 (2688)。十大持股係中海油 (883)、 招行 (3968)、 平安 (2318)、 華潤 (291)、 中電信 (728)、 華潤電力 (836)、 蒙牛 (2319)、 華潤置地 (1109)、 中油服務 (2883)、 建滔 (148)；

香港增長基金 ---二月購入吉利汽車 (175)。十大持股係利豐 (494)、長江 (001)、華潤 (291)、中海油 (883)、太古 B (87)、思捷 (330) 永亨 (302)、渣打 (2888)、建滔 (148)、領匯 (823)；

2007年睇好增長將來自 (a) 內地消費股及 (b) 出口股，並表示即使減息，香港地產股既增長都好有限。

2007 - Week 13 (102)

部署入貨 (101)

唔經唔覺，寫 Blog 經己衝破 100 篇，呢篇係第 101 篇。

中石油 (857) --- 借油價回升消息，重拾升軌，連續升破 10 天、20 天、50 天同150 天線。即將派息 0.154699 元人民幣，4月12日除淨，今日收 9.27，如升破 9.55 既 100 天線，可望重上 10 蚊 補回一月初既下跌裂口。能否重上 11 蚊歷史高位，唔知！但如果你問我 9.27 仲買唔買得過，我唔多敢講，我只可以話先排跌到 8.51 你都無買，即係你對石油股無乜信心啦，即係你唔多信股神巴菲特既眼光啦，咁既情況下，都係你自己再稔下啦！我就因為已經持有呢隻優質股在永久組合中，自然要留意一下啦。當日升到 11 蚊我都無賣，你估我認為 9.27 算係平定貴丫？我就喜歡佢有成接近 4 厘既息收，如今唔易有咁既股架啦！好似中糧控股 (606) 只係炒「再生能源」概念，一上市就升到亞媽都唔識，連「再生」都咁勁秋，咁你話「原生」既石油得唔得呢？ 如果美國個傻佬布殊一按制派飛機去炸伊朗，你估到時 D 「原生」既石油股係升好呢定跌好呢？你估到時 D 「再生能源」究竟出得世未，趕唔趕得切用來做飛機燃料呢下？

利豐 (494) --- 我仲未有機會睇「利豐百年」呢本書，不過我識左利豐隻股都好多年，愈來愈發覺佢係好野。我有眼無珠，兩年前做過佢既股東，在 11 皮左右買入，但我無好好珍借佢，如今悔之已晚啦〔對高堂父母亦應該好似對利豐咁珍借就無錯啦〕！ 3 月 29 日機構投資者以每股 23.3 - 24 港元, 配售利豐 6,188.45 萬股, 套現 14.42 億 - 14.85 億港元，較當日收市價 24.5 港元, 折讓 2.04 - 4.9%。配股一般利淡，大股東要 Cash 唔要股票，不過我又嘗試從好既方面去解構一下，大家睇下又通唔通。

(1) 利豐全年純利 22.02 億元，升 23%，每股盈利 67.1 仙，末期息增至 39 仙；營業額升至 680.1 億元。佢既增長能力之勁度係真野，唔係炒概念；

(2) 利豐由今年 29.55 歷史高位回落 17% 到今日收市既 24.55，而呢個價位係恆指於舊年 12 月尾同今年 3 月初 18,500 既水皮，即係話今日個市恆指雖然收 19,800，但其實利豐個市價 24.55 只係 18,500 既價位，係米好超值呢？

(3) 今日利豐成交額 22.76 億，除左配售既15 億上板之外，都比平時兩億幾多幾倍，一定仲有大動作跟尾；

(4) 即將派息 0.39 元，5 月 4 日除淨，而家入市連息都賺埋。利豐無疑係優質股，不過經萬大上大落，要心臟健康既股友至合適，而且只派 2.24% 股息，仲要經常驚美國經濟衰退等不利因素存在。

創科 (669) --- 今日 3.57 pm 臨收市前三分鐘，偶然望望創科，見佢仲係死下死下做緊 9.22，今日最低 9.15，當我仲稔緊創科係米見底既時候，忽然間有大盤殺到，狂掃沽盤，由 9.22 三分鐘內掃到上 9.48，然後突然又會定左響 9.42 收市，三分鐘內成交由 2,800 萬變左 3,300 萬，足足用左 500 萬既銀彈做野，從圖表看，創科己做成一個好靚既見底回升格局，兩個幾月無見過啦！我估短線炒作，係好有機會上返 10 蚊既水平，如果能再向上，下一步就睇可唔可以回補 2 月尾 11 蚊既下跌裂口。不過由於隻股係弱勢，圖表好可能未必可以盡信，分分鐘仲係陷阱，試唔試就要稔清楚啦。

瑞安房地產 (272) --- 隻隻內地房產股都升，係隻瑞安跌，又會咁既！過去六個月，瑞安最高試過五次超過 7.00，最低試過五次跌到 6.40 反彈，只係三月初跌 777 點果次插左落去到 6.20，好快又上返 6.40。瑞安於 2006 年 10 月 4 日以 5.35 新股上市，至今 6.47 只係升左 20.93%，比起其他房地產 IPO 例如世茂房地產 (813) 升 147%，上海集優 (2345) 升 70%，綠城中國 (3900) 升 69%，瑞安似乎仲有無限既上升空間，因此有炒落後既衝動〔中國地產 (1838) 係混水摸魚既雞股，至今 –13%，但無乜參考價值〕。Tony Measor 一直睇好瑞安，仲話羅康瑞係好老板，Management 無問題。

PC 今日話大陸 A股己炒到禾雀亂飛，爆破指日可待。各位親愛既股友，快 D 拿定銀紙去執平貨啦！ Good Luck 啦！

傷春悲秋炒股去 (100)

一見市升馬上亢奮，一見市跌立刻謝左，市升市跌都覺得同自己身家有關，呢個係一眾散戶常見既心魔。要保持平常心，令自己靜而後能安，安而後能慮，慮而後有所得，有陣時要 Stay Away From The Market 一陣，靜心觀察，智慧先至會返來。所以呢個星期，我懲罰自己，不準買賣一週。

市況仍然係咁，抽新股逢抽必賺，碧桂園又趕住塞錢入你袋，我真係稔唔到世間上仲有乜野好過咁。但係我仍然堅持一次都無抽，一毫子都無由 IPO 賺過，因為呢條唔係我打算行既路。我既實現財務自由之路，目標係要向「總資產」每年增長 15% 進發，並且能夠在餘生每年持續複式咁累積，咁至可以見到成績，咁 100 萬先至 10 年後會變 405 萬，先至 15 年後變 814 萬，先至 20 年後變 1,637 萬，先至 25 年後變 3,292萬。到 25 年後我差不多夠鐘上天堂既時候，可以將筆錢好似股神巴菲特咁還富於民。

巴菲特於 2006 年佢老人家 75 歲時，一口氣捐出左八成半身家 370 億美金〔2,800 億港元〕做善事，舉世轟動，亦帶起班美國有錢佬做善事既風氣〔Bill Gate 跟住亦宣佈不久淡出微軟，專注打理慈善基金〕，佢老人家真係我既偶像！唔係因為佢「能賺」，而係因為佢「能捨」！ 人生在世，「能捨」好緊要，實在太多野彷如鏡花水月，流逝無跡，人力有限，人生有涯，錢財可賺但帶不走，能予善用，才有義意。

近日多聞老病消息，倍覺傷春悲秋。霧失樓臺，月迷津渡，心有戚戚然。PC 高堂入院做手術，現正休養康復中，PC 亦無暇同我行山賞花矣； DW 高堂入院，相信不日 DW 自會從加拿大匆匆回港探望，近年能與遠方舊友聚面，往往基於如此，不無感既；EW 外遊三週，又放心不下老父，交托 ML 照顧，弄得 ML 變作家務助理，送橙到老人院以慰長者恨食橙之「合理」要求。

「父母在，不遠游，游必有方」。今時今日既香港，照顧年老既高堂父母，特別係患有長期病者，真係少 D 心血同耐性都唔得，而且更唔少得「蚊尼」。今時今日既醫藥費真係唔講得少，洗乜洗物既長期醫藥費條數有排都計唔清，有起急症如果等公立醫院排隊照乜照物就好大獲，等等下分分鐘連命都無埋，急送去私家醫院就一個星期 Diagnosis 連 Surgical Doctor連 Operation 辦妥休養，真係差天共地，但三幾十萬「蚊尼」就唔少得啦。但如果你仲有高堂父母供養咁幸運，「蚊尼」又算係乜呢？ 樹欲靜而風不息，子〔女〕欲養而親不在既傷感，或許只有經歷者更能感受那瀝血的痛！

今時今日香港既醫院，好似又返回五、六十年代既「有錢馬上醫，無錢慢慢醫」既慘況，要靠公立醫院排隊救命，急症室都慢吞吞，真係無乜信心，有 D 醫院好似瑪麗、瑪嘉烈更加經常人手不足〔東區尤德夫人就好 D〕，唯有自求多福，放定筆救命錢於身邊，有事就急送養和、浸會、港安或法國救命去也。你話做人點可以唔投資、唔炒股、唔早 D 發達呢？

期指結算日出乎意料大升，但期指結算後，我仍看淡，仍在等待跌返 1,500 點到 18,500 才考慮較大注入市。原則上，我係跟從上次所講既「指數上落程式買賣」作為買賣既操作機制，排除受大波幅上落市既情緒所影響。

Kingsway MPF 選股 (99)

我一直驚嘆於 Kingsway MPF 既選股能力以及操作技巧。

於 2007 年首季既波幅市中，當唔少人〔甚至基金經理〕損手爛腳既時候，該 MPF 卻能夠以 +23% 既成績鶴立雞群。我有幸〔亦好醒目〕咁將我既 MPF 於 2006 年 12 月底時，全部亳無保留咁以身相許，許配時既所有禮金係 190,424大元，如今三個月都未夠，帳面銀碼經己係 226,214，幫我生養左足足 35,789 大元，升值 18.79%，米話唔厲害！ 如果Kingsway MPF真係一直都咁勁，一年算佢升 35% 咁計，到我 65 歲可以動用呢筆嫁妝既時候，筆錢己經變左 1,271 萬！ 嘩！ 好和味呀！ 保守 D 計 30%， 都有 750 萬，再保守 D 計 25% 啦，都有 433 萬。如果佢三個月都未夠就做到 18.79%，到年尾做到 25% 係絕對有可能既事！

Kingsway MPF 有咁好成績，當然一定唔可以靜態咁靠長期持有匯豐同宏利〔咁係穩陣，但一年最多升 15% 左右經己盡啦〕，而係要好似 Peter Lynch 咁買出買入 D 優質成長股，先有可能咁升法。 我希望分析佢既買賣，有機會跟佢上車落車，食下 D 便利大茶飯。 以下係 Kingsway MPF 最近兩個月十大持股既改變同觀察：



(1) MPF 既「膽股」係 392、165、506、270 呢四隻紅籌，過去半年升市跌市都無沽，即係表示長線睇好，價低應該可以買 D 長期持有。特別近日中國糧油 (506) 因分拆左個仔中糧控股 (606) 上市，自己反而低沉左，於 6.40 到 6.50 左右應可考慮買 D 長期持有；

(2) 二月既時候，MPF 增持返已沽出既中信資源 (1205)，中短線可留意；

(3) 二月 MPF 亦增持首都機場 (694)、中國水業 (1129)、長城科技 (74) 等，鳳凰無寶不落，中短線可留意。

咁跟法，雖然係有 D 時間差，但 MPF 唔係 Day-Trade，作為中長期持有既選股方法，仍有參考既價值。

仲有，唔知你有無發覺，Kingsway MPF 十大持股，係完全唔買果 D大熱既中資股〔五行、三保、半新 IPO 股、亞洲股神既龍尾股、龍屁股等〕，即使唯一既國壽，亦於 2006 年尾最高位既時候減持至唔再係十大，呢招咁冷靜同咁醒目既 Trading Operation，真係值得我去學習。

市場中，當人人都追逐熱門股既時候，佢就反其道而獨行，唔通呢 D 就係 Kingsway MPF 有咁好成績既秘訣？

四月仍要耐心等 (98)

作病，無乜力寫 Blog。

(1) 建滔 (148) 己由 30.00 反彈至 35.00，建滔層積板 (1888) 升回 8.00 以上指日可待。

(2) 大市仍要跌，等回到 18,500 以下才好買，耐心才可賺錢。

(3) 抽新股仍然人人賺，即是仍然可炒半新股。候低考慮入以下任何一股，賺 10% 到 15% 為目標：



(4) 三、四月，少做少錯，但一出手要例不虛發。

零售商機處處 ( 2007 --- Week 12 ) (97)

我返來啦……！

意大利既郵輪真係多野玩，早午晚下午茶連宵夜食足五餐，又忙於睇歌舞 Show、意大利 Opera、Sexy Show、打賭場老虎機、打太極、學意大利文、做 Gym、化裝舞會、打麻雀……結果無精神睇書。惟有股繼續炒，書後補看啦。

今次上船去行海南三亞，發覺地方雖然市容落後，並無太多高樓大廈，但感覺零售業商機處處，百貨店內供應充足，電器、衣服、食品、電腦各種商品齊全，價錢亦唔平；商場又有車展，Toyota 及 Honda 十一、二萬一部，反映內地消費力既強勁唔差得過 HK。用 Peter Lynch 既「行公司選股理論」，呢一兩年應該要買零售、百貨、消費股。我睇好恆安 (1044)、永恩 (210)、福記 (1175)、百盛 (3368)。而且 1175 及 3368 都已經公佈業積， Confirm 係好野，但要等恆指跌回 1,200 點 18,500 至買安全 D。



大市連升多日，按照「升降機理論」，下星期要跌。好股不及 Cash，今日除建滔層板 (1888) 外，全部沽清，鎖定利潤！但稍後價低我會買返呢 D 好股。
交通銀行 (3328)，7.88 沽清 10,000 股，賺 2,100 ( +2.74%)。
上海置業 (1207)，2.14 沽清 30,000 股，賺 10,310 ( +18.74%)。
招商銀行 (3968) ，16.06 沽清 3,000 股，賺 2,940 ( +6.50%)。

2007 --- Week 12 帳面利潤升回 34,316 ( +7.39%)，Cash / Stock 比例 47 : 53，非常健康。市升，建滔層板幫我賺銀；市跌，Cash 可再入市執平貨。

上郵輪去 (96)

上週六同 PC、SK、FU 等人於深圳逛書城，我又買多左幾本投資書。午餐於中森明菜享用鐵板燒，用大家樂既價錢，就食到香港要千幾銀既鐵板燒服務，所以難怪人家深圳既經濟愈來愈旺，香港就愈來愈水，只識迫 D特首候選人派最低工資、派綜援，年輕人玩隱形、無上進心，鬥心仲比唔上隻精英大師！呢一代既人真係唔好怪人家 D尖子南下，霸住香港D大學既學位，更加米怪人家邊沿化香港，先要自已照照鏡先。

講完番偏激既話，馬上上郵輪去。本週唔睇個市，順其自然。

我會在郵輪上睇完本「美國人怎樣炒股」，下星期將D精華同各股友分享。

出門口的心情如下：

　　莫聽穿林打葉聲，何妨吟嘯且徐行。
　　竹杖芒鞋輕勝馬，誰怕？一蓑煙雨任平生。
　　
　　料峭春風吹酒醒，微冷，山頭斜照卻相迎。
　　回首向來蕭瑟處，歸去，也無風雨也無晴。

2007 – Week 11 (95)

2007年 --- Week 11，跌市後，組合盈利率減至 +1.54% (+7,156)，同期恆指 +0.82%，本組合暫仍跑贏恆指 0.72%。

組合內的 1888、3328、1207、3968 皆優質股，暫時受壓，靜待反彈。

買賣操作機制 (94)

除左 (1) 你買到一隻股神巴菲特所講既超值優質價值股，可以永遠持有唔使賣出；或 (2) 你沽期指、沽空股票、買認沽輪等等，令你於跌市都可以賺錢之外，「低買高賣」仍然係股市賺錢千古不移既真理。

但係「低買高賣」唔易，因為人既判斷力經常受到真假消息、大行妖言惑眾、及市場情緒化所影響。電腦程式買賣係補救既一種操作機制，我地一介小股民，唔識電腦程式買賣，但我估計用一種類似既「指數上落程式買賣」作為買賣既操作機制，排除受大波幅上落市既情緒所影響，可能於 2007 年中可於股市賺到錢。

我心目中既買賣操作機制如下：

(1) 先假設 2007 年既大市波幅上落係於 18,000 到 22,000 點之間；

(2) 預早選出 5 隻心目中既增長股，每隻平均投放 20% 資金。建議可考慮 941、1175、2628、330 及 1800 〔005、857 及 945 於 2007 年已經唔算係增長股，增長股即係盈利有 25% 到 30% 年增長率〕；

(3) 買入區：跌到 18,500 買入 30% 資金，跌到18,000 再買入餘下 70% 資金，再跌都好少理；

(4) 持有區：18,600 到 21,000 之間，上上落落，一於少理，長期持有，不再買亦不沽；

(5) 沽出區：指數升到 21,200 沽出 30%， 21,700 再沽 30% (共沽 60%)， 22,000 沽清餘下 40% (全面沽清)；

(6) 操作機制排除上落市既情緒影響，一切買賣以大市指數水平作決定，而非個別股票既價位；

(7) 例外：個別股票既價位假如升幅超過 50% 〔即比指數由 18,000 升到 22,000 既 22% 仲多左一倍有多，有權即刻沽清呢隻股票，先收錢落袋〕；

(8) 目標：2007 年 賺 30%。

各位股友，想唔想用 10 萬或 20 萬試試，2007 年賺返 3 萬或 6 萬？

請假一週 ...... 忘記它 (93)

過多兩日，東主有喜，請假一週！

因為我要去享受人生，出發去一個據說「滿載意大利風情」既海上假期！ 登上 28,500 噸既歌詩達郵輪 (Costa Allegra Cruise)，嘆其六天五夜世界，日日飲飲食食，夜夜行行企企，晚晚睇 Show 唱歌，打牌玩老虎機，游水 Sauna，做 Gym 按摩，跳舞玩 Game，上岸遊歷亞洲勝地，三亞椰林海岸，下龍灣珊瑚礁探秘，吟風弄月，吟詩作對，此時此地，此情問天，如此這般，之乎者也……

總而言之，19/3 起本 Blog 暫停一週，26/3〔或者早一 D〕再啟市開爐，敬告各位親愛股友、鄉親父老、四方仁人君子…..！

〔Music… Fade in….〕
忘記它. 等於忘掉了一切.
等於將方和向拋掉. 遺失了自己.
忘記它. 等於忘掉了歡喜.
等於將心靈也鎖住.
同苦痛一起.
從來只有它 .…..

2007 年既 Fantasy！ (92)

香港股市有趣或者乞人憎既地方，就係無幾耐又整一單大升或大跌幾百點既日子俾你嘆，考考你既應變方式或者定力。今日恆指又 Sir 聲跌 496 點到 18,836 點，國指跌 266 點到 9,002 點，仲成交 516 億。

我既部署俾佢打亂左少少，雖然明知呢個又係入市既好機會。我今年決定要走位靈活些少，在波幅市中以保本行先，賺多賺少其次。

上午指數急跌，蒙牛 (2319) 下沉到 19.90 我既入貨位以下，此情此景，我急忙於反彈到 20.45 沽清 5,000 股，暫避風頭，微賺 2,350 元落袋走人 ( +2.35%)。尾市蒙牛竟能在大跌市中逆市大升 3.81% 到 21.80 收市，萬萬始料不及。蒙牛的確好野，而且好過我既期望好多，今次走寶我相信無問題，稍後或可於低位 20 蚊以下再買回。大家可趁機去超市都買盒蒙牛奶飲下，睇下正唔正，話過我知你中唔中意飲，等我作為蒙牛值唔值得持有既參考！

至於恨左好耐想買既 招商銀行 (3968) 一直覺得太貴，今日終於等到跌近 15 蚊邊，就以 15.08 先買入左 3,000 股，尾市收 15.22。我既想法係如果跌就於 14.50 以下再買，但如果突然升得急， 於 16.50 就要考慮先沽貨，待回落低位15.00 蚊以下再買回，總之平均入貨價愈低愈好。升跌市一定要咁玩，持盈保泰。

我既經驗係，Cash 真係 King，跌市中有 Cash 就隨街都係平貨可以任買。

李兆基「股神」話 2007 年恆指於 18,000 到 22,000 點之間上落。嘩！如果大家信佢， 即是話18,000 到 18,500 點之間大市已經見底，咁就快 D 好買貨啦 〔聽朝起身跌多 336 點就已經係 18,500 點啦〕；而今年如果升到 21,500 點既時候，就好快 D 全面沽清存貨〔包括匯豐、宏利、五行三保、半新股〕，收回 Cash 放美元定期收 4.5% 息。然後……買張機票去加拿大，欣賞 Montreal 既 Mount Royale 山上淒美既血紅楓葉，登上 Columbia Icefield 既千年冰川，發情迷洛磯山脈之思古幽情， 坐坐 Alaska Cruise 深入北極去看北極光，然後南下坐 Western Caribbean Cruise 暢遊加勒比海曬陽光，回程更可專程到東京既上野公園席地而坐，邊喝清酒，邊看漫天花雨飛舞既櫻花，擊鼓高唱大江東去念奴嬌，夜幕下於露天風呂既溫泉中，抬頭數數晚空閃閃既繁星，懷想金風玉露一相逢，便勝卻人間無數既詩意。

玩足半年後，如果又見跌市到 18,000 到 18,500 點之間，又可大舉入市，再戰江湖！呢 D 就係我 2007 年既 Fantasy！

上車落車 (91)

今日經濟日報何車既「上車落車」專欄推介隻上海置業 (1207)，又講得幾好，我決定做個小實驗，照跟！

於 1.81 買入 30,000 股上海置業，三至六個月目標價 2.20。

今日去玩！股票不是人生，人生不止工作，人生要吃飯，人生要去玩，人生要有愛。中午去吃飯，跟住同班太極班師兄去打其十二圈衛生麻雀，做做陪客。點解？因為太極班中有個六十歲既亞伯師兄，為左慶祝佢個六十歲既太太生日〔佢又都係我既太極班師姊〕，決定俾個神秘驚喜佢太太，拉大隊太極班既同門師兄弟去攪大個 Party，又麻雀、又 Karaoke、又 BBQ…… 然後突然間D燈熄左，有人馬上推個生日蛋糕出來，我地班二打六馬上圍住個主人翁高唱 Happy Birthday To You……Happy Birthday To You……女主角就在男主角充滿柔情既目光中，好似小公主咁含羞答答閉上雙眼許個願……！

嘩！….好浪漫呀…..！Oh….My God….!

人生就係咁啦，做做陪客，最緊要係一切免費，咁就男人老狗陪人家浪漫一下，算做日行一善啦，義意大過十一奉獻！

講開又講陰陽燭 (90)

今日行山，PC笑對我話：「尋日睇完你個Blog既陰陽燭夜話，發覺你一夜之間經己唔再係價值投資者，而係徹徹底底既 Technicalist！」

「嘩！大佬，乜咁講呀！咁我豈不是一夜之間變左股神巴菲特祖師爺既叛徒？」〔嘩！條「罪名」仲大過一夜之間脫髮變光頭〕當然唔係啦！

連忙大叫：「非也！非也！」我之所以大講陰陽燭，乃係尋找發達之輔助工具而矣！其實每次選股時，我仍係小心翼翼，依足 Buffettology Workbook 〔見參考 1，2〕所講咁做，奈何今時今日要找隻 Intrinsic Value 低過 Market Price 50% 既價值股都幾難，有些少 Margin of Safety 經已唔錯啦！ 2007 年個市大起大落係意料中事，所以用 Peter Lynch 尋找優質增長股既方法可能更合適，因此監察波幅大起大落既增長股，陰陽燭圖表應該在短線觀察「幾時轉勢」會有助一臂之力！並非背叛左祖師爺既價值投資法，只係靈活變通變通罷了！

今日恆指升、國指升、成交跌。剛剛優化左組合既做法似乎幾正確！

蒙牛乳業 (2319) --- 今日隻蒙蒙地既蒙牛唔使講乜理由就收 21.05 彈升左 5.36%。美林老早2007年2月27日就發表妖言或眾既研究報告，話維持蒙牛「買入」評級，目標價睇 28.52 元，即管聽其言、觀其行啦。

建滔層板 (1888) --- 今日續跌，於 7.73 再買入 15,000 股，平均價已降至 8.07。呢隻半新股，上市價就正係 7.73，如今唔使抽唔使爭可以用上市價任買，為乜唔要？我信佢好快會反彈返到 8.40 到 8.70 補返下跌裂口，7.73 呢個價位唔加注，我恐怕錯失良機。點解？

(a) 建滔層板暫時低沉，真正原因無謂去知，亦好難知，一般估計係受累於母公司建滔 (148) 既暫時低沉。其實母公司建滔近一個月亦由 36.00 高位回落到 29.50，今日收 31.35，如果於 30.00蚊邊買建滔亦都係一個好選擇。不過半新股較好炒，向上無乜蟹貨，等D大行收夠貨，一發功左手交右手，右手交左手時，「步步高昇」唔再係暉春，而係可持續發展既事實啦！

(b) 仲有，過去一年上市既 61 隻新股中，跌穿招股價既只得 17 隻，不少都係混水摸魚之輩，好似建滔層板呢D正正經經龍頭股唔多，所以我睇好佢！

(c) 建滔層板20天平圴成交量係616萬股，今日雖然跌到 7.73，但成交量跌到只得 278 萬股，反映沽貨力量有限，見底回升，相信指日可得。

建行(3328) --- 幾好丫！無野講！等升得啦！

參考：
1. Mary Buffett & David Clark, The Buffettology Workbook 〔中譯本：巴菲特法則實戰分析，李芳齡譯，聯經 2003〕
2. Mary Buffett & David Clark, The New Buffettology, The Proven Techniques for Investing Successfully in Changing Markets That Have Made WARREN BUFFETT the WORLD’s Most Famous Investor 〔中譯本：和巴菲特同步買進，陳正芬譯，遠流 2003〕

陰陽燭信號解釋 (89)

入市前，一般選股我點都會睇下 D 財務比率，好似 P/E、Yield、Profit Margin、ROE、ROA、P/B 等等，咁起碼唔會買到D垃圾股，跟住亦會作D同行業比較、預測 EPS 及 PE 來計算目標價，以便預算乜價位可以沽貨。

當入市後，我對圖表既使用，一般就係睇睇 52 週高低位、移動平均線〔10天、20天日線、50天週線〕、成交量、相對強弱指數 (RSI)、保力加通道等等，估計一下 D 阻力位同支持位，就係咁多！

我做左咁多野，但係最重要果樣原來就結果無做，就係睇「趨勢」同「幾時轉勢」！

識睇「趨勢」，至敢肯定係升定跌，至敢 Buy & Hold！識睇「幾時轉勢」 (Turning Points)，至識在高位下跌前沽貨，至識在低位反彈時入貨！

我終於發現，我日日睇圖表，日日吹水，但我其實係唔多明解D「趨勢」，亦唔多識睇「幾時轉勢」！唔怪得知我個組合會賺少咁多啦！我決定的起心肝，認認真真去重看所有陰陽燭既書！ 據說，陰陽燭同隨機指數 (Stochistic) 一齊睇，更準！



創科 (669)
回顧一下，創科二月初在 A 點已出現十字星，表示高位好淡爭持，後市去向可升可跌，翌日更出現射擊之星；其後在 B 點出現大陰燭既空頭吞噬，表明「轉勢」下跌既力量好大，應該要沽了，翌日既小陽燭輕微回升本朿係沽貨既好機會，應該在 11.80 到 11.90 之間可以全身而退。失此良機，翌日大陰燭已急跌到 11.40 以下，再一浪低於一浪跌到 10.30。

最近兩日，10.00 邊又出現十字星，十字星翌日更出現小陽燭輕微回升，表示低位跌定，如今看來又會慢慢上返 11.15，補回下跌裂口。但由於反彈但成交少，上升會慢。但只要「趨勢」，肯定係升，又唔怕繼續 Buy & Hold！ 但我已換左馬優化組合，只好暫時忘記創科啦！

現在邊睇邊至發覺，「哎喲！隻創科我操作得咁差，原來根本係自已 Miss 左所有陰陽燭既明確信號！」死末？無得怨人啦！



建滔積層板 (1888)
半新股，連隨機指數都無得睇。但最近兩日，跌到 7.70 低位出現十字星，翌日亦裂口出現小陽燭回升，相信表示低位已跌定，相對強弱指數 (RSI) 亦在 30 以下，反映有 D 超賣氣氛。如今看來，好有機會慢慢上返 8.60 先補回個下跌裂口，再睇上唔上返 9.00。

睇陰陽燭圖表，而家係開始「轉勢」，應該在低位〔尋日收市 7.78〕反彈時入貨！而跟住既「趨勢」係升既機會大過跌， 而家應該係 Buy & Hold 既時候啦！ 所以我換馬優化組合都保留佢！〔可惜我入貨既時候未重看陰陽燭，結果平均入貨價要 8.40〕

優化組合 (88)

優化組合
呢鋪大跌市對我既組合既影響，就係帳面利潤由「曾經擁有」既 12% ，跌返到而家「天長地久」既 2%，好彩由於一直都有風險管理既意識，所以仍無損本金，但過去兩個月就算係有D白做既感覺。總結跌市既影響原因，我覺得係我既「策略 + 操作技術」都係未夠火喉，仍有待改善既地方，大家睇下同唔同意？

(1) 對於「弱勢股」〔江西銅、創科〕或「高位回落博反彈股」〔大家樂、華潤置地、中移動〕，應該低買高沽，有 10% 至 15% 就要埋單一次，持回現金再捕捉下一次機會或下一隻股，唔應該太過堅持，一定要等到心目中既目標價至沽〔雖然從 Fundamental 睇係好有道理〕。因為「弱勢股」有名你叫，去唔到個目標價就去唔到，「高位回落博反彈股」亦一樣，彈唔到個目標價就彈唔到。

因此，順勢而行好緊要，買入前要做 Fundamentalist，買入後要做 Technicalist，睇住個圖表做人，一到「高位」回頭，唔理三七二十一就要沽，咁就唔會錯失左於 15.00 沽大家樂、於 12.40 沽創科及於 79.00 沽中移動鎖定利潤既機會；

(2) 對於「選股」，要更加更加小心D，唔衝動得，今次買晨訊科技短炒，係完全錯誤既行為，因為下跌中既「弱勢股」係炒唔起、彈唔上既，由於根本無長期持有〔即係兩年起碼〕既準備，買入呢 D「弱勢股」後遇到大跌市，實無好死；

(3) 對於「強勢股」〔首都機場、福記〕，無使用推高止賺位既方式處理，又係走寶！「選股」好野，但「策略 + 操作技術」唔好野，乃係點解賺唔得多既敗筆！



由於我相信個市仍未跌完，再落可以見 17,500 ~ 18,000點，仲有機執平貨，所以要留一手 Cash備用。但如果個市唔跌，現時既「弱勢組合」想反彈可能亦有心無力，因此趁呢幾日決定換馬去優化組合，希望反彈既時候，呢個新組合可以追返失去既帳面利潤：

大家樂 (341)，沽清 4,000 股 (13.60)
創科 (669)，沽清 13,000 股 (10.30)
晨訊科技 (2000)，沽清 20,000 股 (2.30)
蒙牛乳業 (2319)，買入 5,000 股 (19.98)
交通銀行 (3328) ，買入 10,000 股 (7.67)

建滔層板 (1888) 係唯一我想留既股，一來佢係龍頭股，二來佢上市價係 7.73，如今跌到 7.78，反彈機會好大；三來佢跌可以係俾母公司建滔 (148) 下跌所累，建滔回穩後，建滔層板好大機會重上 9.00 到 10.00 水平。

太極股友

太極班既師兄們，講開原來個個都係股友。我隨機抽樣問下佢地，跌市〔777〕果日有乜搞作？綜合結果報導如下：

梁師兄：入左貨，入乜無講，但就順手 Call 左 DL 師兄叫佢自已執生；

DL 師兄：打算分兩注入貨〔一注約 10 萬〕，第一注入左三隻貨，包括中信國金 (183)、建行(939)、中國地產 (1838) 等；第二注因為個市反彈經已買唔到。中國地產持有兩日後反彈微賺即沽〔因為知佢唔係好野，只能短炒但唔可以 Buy & Hold〕；

肥佬師兄：無買任何野，對個市有戒心；

BB(baby) 師兄：今次無打算買任何野，但以前就以 10 蚊買左匯豐，放到而家〔你無眼花，真係 10 蚊！不過唔知係幾多年前！〕；

大師兄：無買任何野，只係持有基金；

Jacky 小師弟：我就於 208 蚊買左 300 股渣打 (2888)，加入我既「永久組合」。

保持觀望 (87)

今日恆生指數全日下跌 777 點, 收報 18,664 點，成交 724 億，幾日跌市加埋，可算作一個小股災吧。如今點算好？

(1) 如今如果仲有貨未沽者就無謂理啦！因為你一定係睇「長線」既人，如今只需要信心、耐心及決心；

(2) 無貨者則可保持觀望，快做功課，就要決定入乜貨啦！君不見如今隨街平貨？ 20 蚊樓下既國壽 (2628) 要唔要？穩建者可在 17 蚊樓下才考慮未遲。

(3) 匯豐 (5) 話衰話衰，又發盈警，但一公布 2006 全年業績，見佢賺左 157.89 億美元，升 5%，每股盈利 1.4 美元，以現價 133 元計，P/E = 12.53，非常超值！就算 2007 全年業績都係只升 5% 既話〔以往平均業績可升 10% 至 12%〕，每股盈利都有 1.47 美元(11.466 港元)，以非常保守既 P/E = 14 倍計，都值 160 元啦〔即潛在升幅有 20%〕！因此，如今應該係買，愈跌愈買至係！我估最多跌至 130 都見底啦。

(4) 渣打(2888) 已公佈全年業績，成績幾好， 3月7日除淨，跌到 208 蚊我覺得有 D 過份左。

(5) 恆生指數仲要跌幾多？我估大約 17,891 (50週線) 都應該見底啦，即係可跌多 773點！如果明朝又跌 777 點，應該要買D貨啦！匯豐又好，宏利又好，士但啦！

(6) 跌左 2,400 幾點，因為始終持貨 70% 以上，我個 Blog上組合都要打回原形，但仲未使死！組合盈利率 +1.78% (+8,255)，同期恆指 -0.72%，本組合跑贏恆指 2.50%。

(7) 有本書講，選股要睇 D-I-V，即係 Dividend、International、Valuation，如今可有乜股符合呢？匯豐(5)？宏利(945)？渣打(2888)？思捷(330)？中石油(857)？

馬拉松結果
43,000 多人熱烈參加，6,000 多人感到不適，26 人需要送院，1 人情況危殆既城中盛事，滿城盡是長毛腿，我不但止有份，不但止在其中，仲可以活著回來！勁呀！至於成績，到此……已經唔重要啦！係米？

點解咁勁？點解我可以跑完全程？唔係靠天主經，唔係靠聖母經，唔係靠心經，唔係靠日經﹝指數﹞，而係靠我既超強意志力，全程不斷咁喃喃自語：「我要做好呢份工……我要寫好呢個 Blog！我要做好呢份工……我要寫好呢個 Blog！」

唔覺唔覺，咁就衝左線啦！所以話呢，各位股友就係我既精神支柱、就係我既形而上既力量泉源！細佬在此講聲多謝啦！明年馬拉松見！

2007 – Week 9 (86)

2007年 --- Week 9，大跌1,400 點後，組合盈利率 +5.96% (+27,655)，同期恆指 +3.41%，本組合跑贏恆指 2.54%。

期間，以 14.00 沽出 6,000 股大家樂 (341)，又以 10.18 買入 3,000 股創科(669)。

基金經理工作
哈！呢個真係講解基金經理工作性質既最好教材。假設上述組合係由「中華賺死你基金」主理，基金經理又係叫 Jacky，而閣下就係該基金既尊貴客戶！ 家陣大市狂跌，由於基金經理呢個星期心情好 Moody，無心機返工，又無「先見之明」，唔識預早清倉沽貨，鎖定利潤。結果過去五日，轉眼間，閣下既銀包急急縮水，盈利率由 +12.66% 跌到得翻 +5.96%，而帳面盈利亦由 58,790跌到靜翻 27,655，認真慘啦！

點知呢個時候，基金經理Jacky 好開心咁走黎同你講：「恭喜！恭喜！ 我地『中華賺死你基金』今年表現好好，組合仲跑贏左恆指 2.54% 呀！哈哈！」

跟住，基金經理Jacky 個老板為左表揚佢既表現能夠 Out-Perform 恆指既 Benchmark，今年仲特別派 Bonus 俾佢，以示獎勵！

上述就係一個你以為佢好好野既基金經理既工作情況啦！

咁你，仲敢唔敢買D成日賣廣告話自已好好野既基金呢〔好似 JF基金 咁〕？

馬拉松
3月4日星期日去跑10 公里既馬拉松！ 呢一秒鐘之後，就集中全力最後備戰。如果中途無因天氣太潮濕或空氣太污染而暴斃，相信可在指定既2小時內跑完既！

如果下星期個 Blog 仍然有人 Update，咁我就尚在人間啦！

Bye Now！

中華威力基金 (85)

過去五年，宏利資產管理 (Manulife Asset Management) 既中華威力基金 (China Value Fund - A)，係基金界既 Top Performer，佢唔收入場費〔係全港唯一既所謂 No Load Fund〕，但投資成績又好好，後來因為實在太勁，結果於2004年決定唔再收新客，除非你肯付出 200,000 美金既新投資額，咁就受埋你玩。

不過，佢同時推出隻新既中華威力基金AA股招呼D失望既街坊，5,000蚊可以入場，但就跟返行規收最高 5% 認購費，咁就無引啦！

我於 2003 年買左些少中華威力基金，結果而家升左兩個開，一蚊變左三蚊！真後悔當時無放全副身家落去〔無錢就真〕！

今日收到中華威力基金既 Annual Report，仔細分析一下，睇下有乜好股可以跟住買。中華威力基金既謝清海1998年間始創辨呢個基金，係著名既價值投資者 (Value Investing Approach)，跟佢買股實無死！

此時此刻大跌市，除左匯豐同宏利外，其他股未使擒擒青，謀定而後動，冷靜觀察，做功課，更加緊要！

我從中華威力基金找靈感，主要考慮以下幾點：

(1) 基金中已經升左幾倍D股，無論幾正都無謂要，人家謝清海對該股係「識於微時」，我而家跟風經已太遲，e.g. 偉易達(303) 基金買入後已升左六倍；

(2) 我主要挑選一 D 基金買入後，於 31-12-2006 結算日仲未升好多既股份〔甚至係買入後跌左〕，我假設呢批就係基金最近剛換馬既入貨股，必定睇好佢地既前景，因此而家跟住買，仍未太遲，因為價值投資者既基金要睇長線，目標價起碼睇五成，甚至五倍；

(3) 由於 31-12-2006 與 28-02-2007 經已有兩個月時間差，因此基金既當時買入價一定係低 D，但近日剛好大跌市，價位回落。如果一 D 股份於 28-02-2007 既價位仲低過 31-12-2006 個價，咁就一定抵買，因為今日個價分分鐘平過當日既基金買入價啦！


分析結果如下：
基金持有國企股 31 隻及香港股 54 隻，其中 9 隻符合上述條件二，當中 5 隻符合上述條件三，即今時今日既價位仲低過基金買入價，可以考慮！

六隻股係 813、291、203、3、1888。

但係，我仍然覺得而家係貴，未買得住。等恆指跌多1,000 到 1,500 點，跌近 17,500 到 18,000點，就差不多啦！其他三隻跌多 D，亦要考慮。我會 Monitor 住呢六隻股，等個市跌定D，再定去向。

我會先選 1888、3983、291、813等。我相信，2007年要買中國野，全世界都係咁做，只要買入價夠平，長期持有，不會錯！

只要信，不要怕！

可以入市了 (84)

好啦！好啦！各位股友，等左咁耐按兵不動，都係等今次跌市 o即，連跌三日，係時候可以入市啦！

仲怕？咁再等下啦，跌到 19,000 點，咁你會安樂D卦，到時至買啦！OK？

買乜好？ 仲使問？ 匯豐(005) OR宏利(945)，是但一隻都得！

乜價位？ 匯豐 135 蚊以下，宏利 260 蚊以下啦！仲怕？ 咁匯豐 130 蚊以下，宏利 255 蚊以下啦！

邊有咁平呀？ 係呀！等下啦！ 要安全，就要等。價錢唔夠平就一於唔買，又唔係奉旨要買既！ Cash Is King！ 有 Cash 幾時都可以買。係無？

我今日以 8.20 增持左 6,000 股建滔層積板 (1888)，博反彈。

個市點方向，仲要見步行步。我估仲有 1,000 到 1,500 點跌，咁就係下一個升浪既入市良機啦！

總結失敗 --- 第一季 (12/06 – 2/07) (83)

投資比打工困難既地方，就係要認衰認錯，經常主動總結失敗、自我檢討，才能保持住較為冷靜清醒既頭腦，控制貪念，得到合理利潤 (10% - 30%)，就好收手，持盈保泰，唔好再理D報紙佬同大行財經演員日日推介既 Number，咁響股海中條命至會長 D！

打工比投資容易既地方，就係唔需要經常主動認衰認錯，直到你老細好唔Like你，要出到媽媽聲，你就會「主動」改正，宏觀調控到符合老細佢老人家既心意〔微觀就仍然按自己本子辦事〕，就可收手，持盈保泰，然後每個月既糧又照出！響職場中基本上條命可以會好長，只要做人醒少少，千祈唔好做D好醒同好有性格既人〔佢地一般都做唔長〕，咁一般黎講一直做到退休都應該無問題！

投資困難既地方，就係做錯野荷包會受傷！而且，基本上，日日都有「錯」！例如：140.5 買到匯豐平貨，以為好正，點知第日又可以 137.70，買「貴」左，錯！又例如：6.46 沽首都機場賺唔少啦，點知無耐就 8.60 啦，賣「平」左，又錯！所以話，股海中既特色原來就係人人都做錯野，所以做錯野千祈唔好大驚小怪，呼天搶地，買「貴」左就叫笨，賣「平」左就哭股喪，如果抱住咁既心理質素，投資就會變左係負擔，唔再係樂趣，咁又何苦呢？

老實講，我寫 Blog 就講到天下無敵，做就有心無力，日日都有「錯」！我做「錯」Trading In and Out 既次數，相信會多過雞婆食雞既次數！

投資成敗，唔係靠蕭河，而係靠心理質素，主要睇「耐性」同「紀律」。因此，我?定除左做 Weekly Update 成績外，亦要加上每季「總結失敗」，希望對自已有D提醒既作用！

總結失敗--- 第一季 (12/06 – 2/07)

(1) 選股：問題不大，都係有潛力同升幅既好股，買入時機及價位都OK，e.g. 首都機場、創科、大家樂、江西銅、福記、建行、中行、華置、中移動，而建滔層板和晨訊就投機性質多 D；

(2) 成績：盈利 +59,650〔盈利率 +12.85%〕，逐步上升，跑贏同期恆指 3.76%；

(3) 沽貨時機：相當差，首都機場、江西銅、福記、華置、中移動等一共五隻股，都因為缺乏「耐性」，沽貨太早，計算損失既獲利共有 92,770 咁多！由此可見，選到好股唔係太難，但係點樣把握「沽貨時機」，賺到應有既利潤，就需要非常高超既技巧同心理質素。今次，我只能賺到 59,650，但賺唔到我應得既另外 92,770，分別完全在於我缺乏「耐性」、亦無遵守「紀律」，唔肯堅持等落去見已設定既目標價，呢個「失敗」我係必須要記住同改過既！

(4) 展望下季：第二季我估個市風險更高，大上大落，持盈保泰似乎好 D，見步行步最好！

今日期指結算，利淡！一跌在所難免，入市執平貨未使咁早！

一於同 PC 去行山，呼吸大自然既空氣，同時繼續去想想「人為乜要生存」及「人可以點生存」呢D咁重要同有意義既問題！

2007年 --- Week 8 (82)

2007年 --- Week 8，組合盈利率 +12.24% (+56,850)，同期恆指 +10.17%，跑贏恆指 2.08%。

一些分享〔四〕 (81)

報章雜誌講股測市既專家多多，日日都起碼有十隻八隻股票推介，攪到你心旭旭，又想買又要驚。其實呢 D 反應好正常，人人都想投資致富，但 D 講股專家最唔好就係將「投資」當左「賭博」，日日俾「貼士」〔可能只係山埃〕，攪到 D人愈來愈唔使用腦、愈來愈依賴、愈來愈唔獨立思考，長遠而言，咁好易變左大戶既點心，令投資致富變左輸身家！

因此，睇報章雜誌既專家言論，一方面要帶眼識人，另一方面亦要選取一D較符合你既投資風格既文章，先致睇得順眼、聽得入耳、跟得落手。

我個人既睇法係，以下 D 作者較為「口岩」Key，較符合我既投資風格。

(1) 陸羽仁 --- 實戰經驗豐富，言之有物，唔講號碼，但俠義心腸，敢於踢爆大戶操作奸招，害人殺局，今時今日仍有這類人物，令我肅然起敬。陸羽仁在頭條日報有專欄，企業 CEO 既 Blog，書本有【股俠創富】，必讀！

(2) 曹仁超 --- 分析以數據為主，主要睇佢既思路，對大形勢大格局既分析，信報既專欄「投資者日記」現時翌日上埋 Blog 任睇，六皮都省埋！

(3) 何車 --- 經濟日報〔上車落車〕專欄，專教短炒，日日俾貼士！我其實一次都未跟過，我之所以留意佢係最近既事。2月15日畢流香有篇專文講何車，介紹佢自資近10萬元影印過去近百篇〔上車落車〕股評免費送俾讀者。我好奇怪今時今日仲有咁?既人？睇完畢流香篇文，得知何車乃資深投資人士，石鏡泉係港大學生時，佢已經係新鴻基証券研究員。如今早已上岸，係真真正正既自由撰稿人，背後無特定老板。因此，參考佢既貼士，唔怕有利益沖突，較少機會中 D 奸人佈定既局！

(4) 張士佳 --- Money Times 週刊〔高手過招〕專欄，專教短炒期指及股票，我其實又係一次都未跟過佢，但我有興趣係佢既出身，曾經幾番上落，對市場既觸覺同敏感性特別強。佢仲發明左一套炒賣法，長期開班授徒，據說期期爆滿。我主要都係睇佢對大形勢既分析，作為看好看淡既參考。

(5) 陸東 ---- 瑞銀研究部，間中講野。據說2006年睇市全港第一，即管又參考下。陸東估 2007 年恆指高位可上 23,000 點，但要先跌 1,500 點，而家所以日日D人都等跌至入市，唔多唔少都係多得陸東既言論！

(6) 龐寶林 --- 東驥基金專家，我唔多識佢，但係知佢都係中大畢業，間中會返母校回饋教人投資基金，趨吉避兇。覺得佢都唔係壞人奸人，都肯教人小心投資。我主要都係睇佢對全球新興市場同資金流向形勢既分析，作為買基金既參考。

市場資訊往往太多，資訊本身亦往往隱藏了發放者的陰濕動機，因此，小心過濾，小心解讀，小心分析，小心應用，才有利於自己的投資事業。否則，隨便吸放和輕易相信了「有害」的資訊〔往往以貼士或推介形式出現〕，很易最後弄得車毀人亡，財息兼失！

一些分享〔三〕 (80)

點樣睇住個市？真係無乜正方，成者為神，敗者為蟹，可以話各師各法。最簡單係話「恆指」升左定跌左就算，如果買左中資股，會睇埋「國指」升定跌。但呢D係賊過興兵既數據，無乜預測能力，你只係相信有「趨勢」，但「統計」分分鐘係會陰你既，如果「Technical」可信，係人都一早發左達！

(一) 新興市場全球資金流動狀況
我會參考一D第三者機構做既數據，較為客觀。例如每星期既「新興市場全球資金流動狀況」，我會睇 EPFR Fund Data Monitor，(Click to View)，咁會有 D 啟示。附上最近一期 Sample：
Feb 20, 2007
US investors still favor value over growth; China losing luster
Investors steered clear of China for a second straight week in mid-February, shifting their focus to smaller, more defensive regional markets as Chinese authorities talked down their country’s equity markets and stressed their willingness to curb excessive valuations. But Asia remains their preferred corner of the emerging markets universe: Asia ex-Japan Equity Funds took in $664.1 for the week ending February 14, accounting for 94% of the net inflows into all emerging markets equity funds.
睇完之後，唔多唔少你會稔下，短期內〔即一兩個月內〕好唔好對中資增長股仲咁樂觀？人家好似經己在走資啦！

(二) 上日未平倉合約既「認沽/認購」比率
另外，港交所 (Click to View) 好多有用既資料，例如從「上日未平倉合約」既「認沽/認購」比率，反映左沽/購力量對比，好似恆指(HSI) 認沽未平倉合約總數有215,291張，認沽/認購比率係1.290，而國指 (HHI) 認沽未平倉合約總數有100,519張，認沽/認購比率係2.193，仲勁！ 咁係米意味2日27日結算係向淡多過向好？ 好合理既猜想啦！

市場總覽 - 指數期權
最後更新: 22/02/2007 10:53
所有價格延時最少 30 分鐘


(三) 免費訂閱上市公司訊息
另外，又可以免費訂閱個別股份既最新消息，經常有Update既電郵收到。舉例：
上市公司訊息提示：
00945 宏利金融<00945> - 業績公告 (Click to View)

我估，股神同股蟹既分別，就係識唔識使用資料同埋獨立思考啦！

一些分享〔二〕 (79)

初三，唔少人既最後一天假期，明朝又要掛上專業笑容，以無比燦爛既心情返工，再戰江湖。

股市中不愁資訊，日日報紙總有好 Number 介紹，經濟、信報D專業報送埋分析唔在講，其他好似生果報、方向報更加貼士滿天飛，傳統老報亞島又出〔投資王〕專刊，公信第一報其實都好多說三道四既貼士，有無公信，事後你就會知！

作為尊貴〔但經常幾無知同埋輸錢〕既小股民，究竟將我地既血汗錢，投放在邊個 Number 好呢？

我觀察左好耐，得出以下既個人結論：

(1) 股票行D財經演員，日日開市、午市、收市都可以有野講，都有好多理由去解釋果日點解升及點解跌 --- 呢D全部係 Bull Shit，佢地出鏡目的係Promote公司產品及建立個人知名度，但對我地既投資係完全無真正既參考作用既〔你信佢就祝你好運〕；

(2) 大行既報告、目標價、買沽建議等 ---- 小心！記住！大行即係大鱷，係我地經常輸錢既小股民既真正敵人！佢地既專業係炒高個市佈定個局，等我地無知既小股民放錢入去，然後插低骨水走人。報告、目標價、買沽建議等係佢地既「謀生工具」〔如果唔係，點解三九唔識七登報公開D買沽建議益你！你估佢同係好 Friend？ 你只係路人甲乙丙，又唔係佢既客！〕；

(3) 專欄老編及記者，介紹 Number ---- 75% 不可信！點解？第一，佢係記者，所介紹既甚麼十大必勝股，我相信其實用個網上既 Stock Screening Software 一掃，按十個八個Criteria挑選就得，你跟佢買好牙煙，旺市十大必勝隻隻中，滿街股神，市跌馬上轉口，叫大家執生止蝕，關人！一個例子就係一月初跌市時，經濟報既林X芬轉口好快，如果你跟左佢，舊年的確做過股神，但一月初跌市時就要做番次股屎啦；第二，佢既工作就係介紹 Number，但係同佢工作 Performance 無掛鉤關係，無需為言論負責架！

(4) 專欄作家，人人俾 Number 加貼士滿天飛 ----小心！記住！呢班人之中，唔少係為某D莊家寫野，佈定個局等你去死！你最好下次先睇作者個名，後睇內容，再用「相反理論」去思考分析，或者，咁 D 專欄作家可能會幫到你！記住！我既個人結論係專欄作家奸既多、忠既少，要帶眼識人！

你話我上面呢 D 係個人偏見都好，我都想講，因為我有輸過錢，所以有發言權！又都好想免費同你分享一下！點解？因為投資輸錢D滋味一D都唔好受，所以我希望你投資只會賺，唔會蝕！呢個就係我既心願啦！

各位親愛既股友，願豬年共勉！共創財富！造福世界！安享晚年！

幾則分享 (78)

年初二，雨水，希望今年各股友路路水源充足，做工 Project 有生水，打牌唔怕抽水〔有糊食果個至有水抽〕，荷包經常有水〔人民幣更佳〕，連塊面都容光煥發、滿滿是水〔SK2、Neutrogina、H2O、FANCL、Sewame 乜都好啦〕！

(一) 匯控全售平安銀行 (Click to View)
2007年2月17日平安保險 (2318) 宣布，平安保險集團旗下的深圳市商業銀行，將斥資約 2.287 億元(人民幣?下同)，向匯豐控股 (0005) 收購平安銀行 27％ 股權。原本由平安信託持有的 73％ 股權，亦同時會將平安銀行股權轉移至深圳市商業銀行旗下。

匯控突然沽清平安，我覺得應該有利匯控，因為出售平安的盈利，雖未必能入今年帳，但一定可以抵銷一下北美 Household International 既負面消息。我維持 140 元以下可以增持既想法，但要有心理準備匯控可以落到 130 元，再加注可也。始終匯控係 2007 年可以穩陣賺 10% 既優質明星股。

3月5日匯控宣佈未期業績，就知盈利。

(二) 陸羽仁既〔?巴經濟學〕五篇文 (Click to View)
要深入D 了解香港股市既真正運作〔唔係你心目中天真既想法〕，一定要推介你睇陸羽仁既〔?巴經濟學〕。聽君一席話，勝讀十年書，係真架呢！

(三) 強積金 No.1 (Click to View)
你知唔知香港既強積金 (MPF) No.1 成績既係邊個？唔知？唔出奇！因為仲收開 10% 或 15% 舊制 P. Fund 既人對 2000 年至出世既 MPF 無乜 Feel 係好正常既事！不過，最差既〔大部份人既印象起碼係咁〕MPF 係獅子銀行 HSBC 怕且你會知掛？因為最多老板開初都用 HSBC 既 MPF，所以最多打工仔俾佢不知所謂既 Super-Under Performance 害死，由 2000 年一直媽到 2004 年，我係其中一個受害者！

香港 No.1 成績既 MPF 叫做匯富強積金 (Kingsway MPF Master Trust)，一年 (+83%)、三年(+137%)、或自開售起(+163%)，全都 No.1！ 唔簡單！最好笑係，Kingsway MPF 原來仲係獅子銀行既 Subsidiary，換左個 Management 同 Investment Strategy 就脫左胎換左骨！

我全部20萬既 MPF 全部轉去 Kingsway MPF。大家都知，MPF要65歲至可以取回，我計過，如果Kingsway 做到每年平均 18% 既回報率，到我收錢果日可以有 228 萬，足足賺 11 個開！D錢真係怕臨老使唔完，不過我都有左好多做善事既 Program Plan，只係等 D 錢佢繼續來！講真，Kingsway 一年 (+83%) 真係超曬班，排第二果個成績只係一半約40%，但其實係經已好好。


(Click to Enlarge)
有咁好既成績，主要來自 Kingsway 既香港特區基金 (HK SAR Fund)，佢既十大持股就係： (1) 392、(2) 165、(3) 291、(4) 1138、(5) 506、(6) 270、(7)1083、(8) 3368、(9) 152、(10) 83。

細節可參考 (Click to View)：
http://www.kingswayfm.com/frame.asp?topframe=topframe_mc.asp&display=6&content=mc_content.asp

豬年靜夜反思 (77)

每個人投資股票，本來目的都係為左增加財富，但往往事與願違。親朋戚友中，投資股票而真正賺到了錢的所見不多〔抽新股賺果三兩千銀D唔算〕，而做 Investment、Finance、Banking呢幾行既亦唔多，因此無乜投資股票高手既 Role Model俾我學野。

我一直在想，做乜投資股票賺錢會咁難？到底中間仲有乜野秘訣自已未攪得通？

回顧今生，我自從1980年大學畢業己開始學人買股票，股齡可算幾長，初期只係買一萬幾千銀，賺一千幾百就走人，但一跌就長期持有，蟹貨唔少最後都變左牆紙〔好似隹寧、益大之類〕。1987年移民加拿大，無錢再買股票。

1991年自加拿大回港，即全情投入股市，並且開埋孖展戶口炒賣股票同窩輪，希望一朝可以致富。皇天不負有心人，剛好被我趕上91年既升市，但見升市雞犬皆升，貪念大起，拼命孖展入貨，結果被大戶夾上震落，唔使幾下散手，經已打殘出局，一年半載蝕左三、四十萬，一Q清袋。對於打工賺錢唔多既我，蝕左咁多錢係一生中最大既教訓。

可惜，我並未因此真正學精到，1993年有左份安穩同好有意義既工作後，仍然不忘投身股海，並且繼續炒窩輪為樂，結果由93年到01年八年之間，不但從未真正從股市賺到過錢，埋單計數可能有D輸突。尤幸一直有工做有糧出，輸左就都唔多覺痛。

但如果我響2001果年就不幸瓜直左，蓋棺論定，咁就一世人可算未贏過股票，20年黎投資股票簡直係多Q餘既事情，完全浪費精神、浪費日晨。

2001年後，我開始萌生慧根，覺得人既然遲早難免一死，人生有錢無錢已經唔多重要，唔係因為我當時變有錢左，而係因為我對人世間既事物經已無乜興趣，睇得好淡，對追逐金錢成敗更加唔願多想花心思。但人始終要食飯，唔做工日日等死唔係辦法，好彩當時有份人工幾高但係無乜意義既政府工，幫到我儲返D錢。我好憎做呢份無乜意義既工，日日都想劈炮，但唔開工會無飯開，惟有照做落去，咁就迫住我去稔，我幾時可以唔做呢份度日如年既高薪厚職呢？

2002到2003年，我終於肯真真正正睇書，我相信學習投資股票，要從知識入手；我相信Knowledge is Power，投資股票係「有得學」同埋「可以學得識」既野！以我既有限資質，既然以前可以從「自學」中學識影相、學識籃球、學識橋牌、學識圍棋、游水、單車、溜?、電影製作、電腦、網頁設計等等學問，我相信我一樣可以從「自學」中學識投資股票！

我開始看 Warren Buffett、Peter Lynch、Phillip Fisher、Benjamin Graham、Tony Measor、Robert T. kiyosaki、Andre Kostolany、林少陽、錢可通、古鎮?、Benchmark等等，慢慢地我開始明白更多投資股票既知識，對於在股海中如何趨吉避兇既信心亦有所增加。

2003年開始，我正式重返投資股票既行列，主要買股票及基金。雖然成績只係一般過一般，平凡過平凡，但對於20股齡從未能於股市賺錢的我已經好滿意。因為在2003年的宏觀調控中，我無輸錢，其後至今亦從無輸錢，我己經初步堅持做到投資股票既第一金律「不要輸錢」！

事實上，由2003年至今，我係在賺錢，不過好慢！但我經已賺回所有我在1991年蝕左既三、四十萬。如今要做既，係點樣繼續落去。

雖然我錢唔多，距離真正財務自由既銀碼仲有一段距離，但我好想早日回復自由身，行行企企，就算等死都好。我終於膽粗粗在2006年7月劈炮，離開左果份無乜意義但做左六年既工，自我宣佈「退休」。我無兒無女，一個月食大家樂三千蚊都夠啦，餓得我死咩！況且香港仲有好好既綜援我從未享受過。

因此，2006年7月開始，我才算係真真正正以投資股票為生。我經常稔，人工作辛勞一生，點都有退休果一日，有D人成世打工，都仲驚退休D錢食唔過世，又或者驚唔夠錢養大D仔D女，又或者驚唔夠錢俾個幸福?暖既家俾佢地。我睇見就好可憐佢地，做人做到成世做金錢奴。我覺得最主要既錯誤觀念係：(a) 人太過相信由「打工」賺到既收入，一切都靠這個收入來源，但我見得太多人無左份工跟住無左所有福利既慘況，人有三衰六旺，份工可以無左，可以因為病、因為工傷、因為上司唔Like你、因為經濟差等等；(b) 人太過低估由「投資」賺到既收入，因此一生中在打工既時候從無好好安排，等到退休無收入既時候又話怕投資風險高，結果明明50歲有能力可以退到休，但仍要仆心仆命谷住度氣做到65歲去服待老板，箇中苦處我早有所領略，可以同聲一哭！

其實，打工才有退休年齡，投資反而無退休年齡，這個對投資收成既重要性，好多人都忽略左。即使你50歲退休先至開始投資，只要中規中距，每年投資有 10% 回報，你的一生根本已無憂！不信？算一算就知！

假設你50歲時只要有 100萬 Provident Fund 在手，每年投資有 10% 回報，55歲有161萬，60歲有259萬，65歲有418萬，70歲有673萬，75歲有1,083萬，80歲有1,745萬，85歲有2,810萬，90歲有4,526萬，95歲有7,289萬，100歲有11,739萬！

數字係唔會騙人既，只有自已既偏見至會令自已始終唔信上面既數字。結論好清楚，聽唔聽得入耳係每個人腦袋既 Frame of Reference問題，係可唔可以Change of Mindset既問題，而唔係任何其他投資既問題。
(1) 每年投資有 10% 回報係可能既；
(2) 你50歲退休先至開始投資根本一D唔遲；
(3) 你有 100萬閒錢在手做投資既Seed Money係可能既；
(4) 除左Set Aside 100萬做投資，你仲有錢開飯。

因此，如果有人話驚太長命驚退休D錢食唔過世，我話你知，你主要係腦袋受制於「打工仔手停口停」既舊觀念，投資世界中，時間係你既朋友。

如果你100歲果日都未上到天堂，你不如去擔心一下你果1億1,739萬點用好過啦！

因此，我「退休」後，只擔心將來年紀愈大，錢愈多，唔知點用好；從未驚過退休D錢〔雖然我無乜錢〕食唔過世既問題，就係基於上面條數咁計出來。

至於條數通唔通？ 信者得救啦！始終果句，食大家樂，餓得我死咩！

祝各股友豬年發過豬頭啦！

2007年 --- Week 7

(Click to Enlarge)

2007年 --- Week 7，組合調整後變作持有 341、669、1888 及 2000，全部持股帳面皆有正面進帳。組合盈利率 +11.76% (+54,620)，同期恆指 +9.40%，跑贏恆指 2.36%。

由於本 Blog 速度回復正常，即日起停止於 Yahoo(HK) 的 Mirror Upload。

歲晚整合

上午趁市升，再執整組合。

中移動 (941)，74.35 沽出全數 1,000 股，賺 1,450 (+1.99%)。

創科 (669)，11.54 再買入 2,500 股，增持至 10,000 股，平均價 10.34。

晨訊科技 (2000)， 2.87 買入 20,000 股。

就以這個面目過年，迎接可升可跌的美好明天。

恭祝各股友身體健康、青春常註、股運亨通，阿門！

調整組合

大市輕微反彈，但不少股份升幅可觀。上午以 8.19 全數沽出 6,000股華潤置地 (1109)，微蝕，沽後才抽上 8.30 以上，無可奈何，但沽出較安全。

另以 8.54 購入 9,000 股建滔層績板(1888)，希望短期重上 9.00 以上。

宏利金融(945)公布，截至去年底止第四季度業績，錄得純利11億加元，按年增長21%，每股盈利0.71加元，季度息每股0.2加元。期內營業額91.9億加元，升9.5%。截去年底止年度，宏利錄得純利39.85億加元，增長21%，每股盈利2.53加元。宏利2006年業績不俗，但無驚喜，賺錢但股價跌回 271。

計劃假如宏利跌回 266 (20天線) 到 263 (50天線)，可買入。

目前宏利 PE=19.79，以2006年 EPS 2.53加元 (即 16.95 港元)計算，2007年目標價約在 288 (PE=17) 到 305 (PE=18)左右。如PE升到 20倍，目標價可達 339，上升空間有 +25%。

你怕不怕跌市？

呢個問題既答案真係因人而異。老實講，個市話左跌都有成個月，不過上回只係集中跌五行三保，今日恆指跌左461點到20,132點、國企指數跌222點到9,711點，加埋仲有500億既成交量，俾人有一個「今次黎真」既感覺，而且大部份股份都跌，頗為「全方位」及「多角度」，驚嚇既作用真係都幾大！

但睇真D，恆指仲係在20,132點，而國企指數剛開始跌破10,000點，正係風雨飄搖、山雨欲來，其實又仲未開始真跌。但年晚收爐，內地春節仲休市一週，有貨者擔心係有道理既。

股友 PF 最近分享短炒她短炒方面的經驗，不妨一聽。佢以約40萬本錢，於一月份賺左超過 70,000 蚊，主要炒三隻股：中移動 (941)、建滔層積板(1888) 及玖龍紙業 (2689)，取其波幅大，亦係優質股，上上落落走好多轉，就有咁既成績。我雖多謝佢分享成功之道，聞之固然心動，想落亦有心驚，但用之於大波幅既市況，又似乎幾合適。各位股友，請問你又點睇呢種策略呢？

溫故知新，一月初當五行三保初跌既時候，我當時既想法，覺得今日仲係適用。1月4 號話「恆指…如果真係調整，技術上恆指要先跌…到19,321 回補上升裂口，進一步可以跌…到19,005既50天線支持位。…國企指數…調整技術上要先跌…到9,600 回補上升裂口，進一步可以跌…到9,425既20天線支持位，甚至可以跌…到8,589既50天線支持位。」 1月16號又話「…或許農曆年前後…我認為一個更具深度的調整必將出現。我等待！」

過去一向做好友既PC， 在呢個市況中經已轉身成為大淡友，今日仲表示「經已全線離場」，並向各股友「恭賀新禧」咁話！

有人睇淡，就有人睇好。短炒好友 ML 今日趁跌市以 73.50 買入 3,000 股中移動 (941) 及以 87.8 買入 1,000 股港交所 (388)，風高浪急，沙塵滾滾，惟有祝佢好運啦！

今日跌市對我既 Blog 上組合無乜大影響，我以 72.90 買入 1,000 股中移動，打算短炒，如反彈到 78 蚊沽出，如跌到 68 蚊就再增持 1,000 股，如再跌到 60 蚊就再增持 2,000 股，長期持有。

2007年 --- Week 6

2007年第6週， 組合帳面盈利 $54,190，升 11.67% 。同期恆指只升 9.98%，本組合跑贏大市 1.96%。

沽貨後既 Equity 與 Cash 比率返回 53 比 47 既理想水平，持有現金 $245,270，等待機會再執平貨。

呢個 Blog上組合本來開始時有D「玩玩下」，純粹為左寫Blog有 D 細藝，點知買下買下真係變左個「組合」出來！既然由於兩個半月時間〔29/11/2006 – 10/2/2007〕組合既盈利己有 11.67%，我決定為呢個 Blog上組合定下更清楚既以下十大目標！

十大目標：

(1) 本組合2007年既盈利目標係 30% 至 50% ；

(2) 本組合跑唔跑贏大市一D都無緊要，同恆指比較只係愛黎睇，扮下D專業財經演員個款咁解，真正重要既係達到項目 (1) 既真金白銀盈利；

(3) 本組合性質屬「高風險」既「中短線」「炒作」「投機」遊戲；

(4) 本組合投機，但只以優質股為入市對象；

(5) 本組合經常朝令夕改，精神分裂，只適合在動物園外欣賞，不宜模仿；

(6) 本組合中既「長線投資」即係炒作投機失手後變左「蟹貨」既同義詞；

(7) 本組合運作時會參考所有股友既「小道消息」及「心水」，敬請告知；

(8) 本組合不抽新股；

(9) 本組合持股可以幾分鐘咁耐，或者真係要好耐、好耐、好耐、好耐；

(10) 本組合係真正有誠意、真正好想賺錢既組合！唔係講笑既組合。

按計劃逐步沽貨

「相逢方一笑，相送還成泣。祖帳已傷離，荒城復愁入。天寒遠山淨，日暮長河急。解纜君已遙，望君猶佇立。」潮起潮落，股升股回，「野老與人爭席罷，海鷗何事更相疑？」

匯豐(5)借一個所謂增加撥備既「壞」消息，跌個四腳朝天。未知各位親愛既股友，係咪經已於140 蚊樓下悄然入了貨？如果經已做妥，我首先衷心咁恭喜你今年大豐收，早日享受財務自由既人生！我見到你發達既成功同歡喜，我亦會感同身受架〔雖然係你既錢唔係我既錢〕！匯豐係香港既發鈔銀行，年年賺錢，派息四厘，如果你仲擔心，那又何必再傷神睇股票呢？ 無錯，匯豐係慢吞吞既蝸牛，但呢個亦正係你既保險線，唔通你中意大上大落驚心動魄既刺激？平淡如開水既匯豐，每年可令你既資產增加 12%，你仲點可以怪 5 號仔呀！

我今日以 140.50 增持 400 股匯豐，加入原則上只買不賣既永久組合。

另外，我既 Blog 上組合，大家樂 (341) 近日陰乾陰乾，被花旗銀行及瑞銀華寶等壓住陰陰沽。上次升到 14.50 高位既沽貨機會經已舊價不須記，而家只在 13.50 浮沉。但大家樂係好料， P/E 22.73倍算係OK，年息有 4.22%，進可攻退可守，因此賺多賺少，只係一個「堅持三心、打走兩心」既遊戲！

「咁，即係點解？」即係話要做到堅持「信心、耐心、決心」，打走「擔心、傷心」咁解！ Understand？

就快又有隻「中國地產」IPO排隊上市任抽，潮流興炒影子股，希望可以帶旺我組合內既華潤置地 (1109)。

平安(2318) Ａ股IPO定價在 31.80 到 33.80 之間，睇來呢個可以當做短線既合理入貨價位，記住啦！ 跌到就好趁手啦！

今日以 8.17 沽清手上 4,000 股江西銅 (358)，微賺 $1,400 (+4.48%)；以 19.84 沽清手上 6,000 福記 (1175)，微賺 $2,980 (+2.53%)。

決心再次集中 Cash 火力，以面對大幅度上落的市況。

面對大波幅市況

過去個幾月，面對股市時，發覺自已總係有D唔多老黎同好憨居既感覺。稔左好耐，更年期唔應該咁播，究竟有乜唔妥呢？ 今日腦袋靈光一閃，彈左個答案出來：「原來自已仲未好適應面對大波幅既市況！」

今日個市，無錯係升，但係好多隻股都係以較大波幅咁彈上插落，好似手中既福記(1175)、江西銅(358)、華潤置地(1109)等都係，一日上落5%-6%閒閒地，又無乜理由同方向。我感覺而家面對股市似乎隨波逐流，易過堅持已見。例如大家樂(341)，初步目標14.66，但在大波幅市況中，它不是逐級而上，而是急彈上14.50然後幾日又插回13.50。面對這個大波幅市況，我有以下既睇法：

(1) 為穩陣計，各股友現時無謂入市。除左140蚊左右買買匯豐(5)博得過外，留錢在袋中等跌市好過。一等可能要等一兩個月至有機會，因此未來一兩個月可以連我呢個講股Blog都唔使睇，一心一意等大跌市，咁係上策〔我都打算咁做〕；

(2) 如果各股友錢在袋中又身痕，可以考慮買D 股票掛勾票據(ELN)收下「息」，或者抽下新股過日辰，應該幾安全同穩陣，咁係中策 ( 對抽新股既睇法，今日的我否定左昨日的我，不過我只係話各股友可以考慮抽，我自已則仍然唔會去抽新股 )；

(3) 至於Keep住個組合，照顧住五、六隻彈上插落既股票，雖然有高D回報既可能，但亦有高D蝕本既可能，對於各位穩陣既股友，咁係下策。

因此，我都要調節一下自已，點去在2007年適應面對大波幅既市況。

今日以 8.12 沽出 4,000股江西銅(358)，提高Cash 比例，即係多番D子彈。Cash Is King！ 有Cash 至有得傾！

銀行經理貼士

「峽裡誰知有人事，世中遙望空雲山，不疑靈境難聞見，塵心未盡思鄉縣。」小弟雖則歸隱山林多時，對前塵世事心如止水，「扁舟從此逝，江海寄餘生」。但凡緣已盡，股緣未了，而要知股事，不可不八卦收風。今日趁好春光，到中環市中心既旺地，坐定定同一位相識多年既銀行經理 CK 打打牙較，虛心聆聽高人指點，睇睇佢講既係堅料定流料！

除左例行收到銀行既精美大利是封及換到今年非常搶手既直版新鈔票外，同CK既一番談心既言談之間，仲收到以下既獨家貼士，可以同各位親愛既股友分享分享。各位股友收到料後，就即管分析過濾後，作個人既投資參考，但為存私隱，大家就無謂去估CK係乜野銀行既經理，亦無謂再將CK講既野四處唱，以免可能無意中影響左人家既仕途，善有善報，阿彌陀佛，阿門。

(1) CK 話2007年第一季股市未玩完，仲係上落市，國企會在9,500至11,500點之間，無大跌。如果有調整500點既日子，仲係入市既好機會；

(2) CK既銀行設計既股票掛勾票據 (Equity Linked Note – ELN)非常成功，係同業之冠。2006年記錄係10次做ELN，10次Call返，D客完全無因為股市下跌而要被迫接貨，因此深受D又保守又安全又穩建既投資者歡迎！如果拿住20萬或50萬或100萬而又想好低風險咁一年收到 10% 息 〔其實係認沽期權金〕，呢個係幾好既選擇！因此CK 話好受D師奶歡迎。
「點解師奶？」我唔多明。
CK話：「師奶至係真正既又保守又安全又穩建既投資者，男人唔係！」
「唉……！」

(3) 內地A股尚有可為。A50指數 (2823) 最多再跌 10%，跌到100蚊樓下可以考慮入貨；

(4) ELN股票掛勾多數係優質股，如匯豐(5)、國壽(2628)、港交所(388)、中交建(1800)等，但最近就無做平安(2318)。我既猜測係平安未見底，可能真係要見30蚊至係合理價；

(5) 國壽(2628) 既合理價係內地A股IPO既上市價，即係18蚊左右，可以考慮入貨；

(6) 中資銀行股平靜下來後，各基金公認建行(939)最好，紛紛納入基金十大持有股之一，長線持有者可考慮建行。

另外，ML申請IPO武夷藥業(1889)以招股價 1.80 得2,500股，上市以 2.33 沽出，賺 $1,325 (+29.4%)，恭喜恭喜！ 由此可見，只要有錢賺，散戶心不死，IPO不死！今年我一定要買港交所(388)了！

2007年 – IPO

舊年新股上市 (IPO)，人人賺到見牙唔見眼，但 07 一到，就時移勢易。各股友今年又有無去抽新股呢？

2007年三隻新股上市，怕且各股友連佢地乜名都叫唔出，報紙D專家又都突然失憶，唔多提IPO。三隻新股，兩勝一負，美維控股(3313)靠住唐英年家族個「躲」，倖保不失升 +2.67%；武夷藥業(1889)仍有 +18.3% 升幅，可說不錯；台一國際(1808)就變潛水艇，未知何日見家鄉。

似乎2006年IPO必勝之氣勢，經己一去不復還。

但無論如何，2007年仍有好多國內股份排隊上市，當中有唔少係龍頭猛料，點做好？

我認為2007年IPO好難返回2006年逢抽必賺咁癲，而且質素參差，2007年抽IPO風險變得較高，因此我唔主張各股友再去博呢D Easy Money﹝即使你上次IPO賺到笑哈哈我都係咁話﹞。

我認為2007年必勝之道係買港交所(388)，佢係唯一升市跌市都有利既股份，只要有成交就會有得賺。而2007年，平均每日都有500億成交，如果能夠全年保持大市咁暢旺，2007年港交所就豬籠入水，應該好穩陣，無衰！至於2008，仲有奧運頂住，無有怕。可以旺足兩年！

如果入市個價位入得好﹝我強調呢點係非常非常重要﹞，我估計兩年左右﹝到2008年尾﹞可以有 60% 到 100% 既收成。但必須要在 $70 下買入，太高入貨無乜水位。如果兩年升 60% 即係 $112，100% 係 $140，兩年咁長，好有機會做到。近期港交所最高都曾經炒到 93.50，過百蚊係輕而易舉既事。

各位冰雪聰明、天資敏銳既股友當然一聽就明解，最難最難既地方就係要在70蚊樓下買入！無錯，必須要有耐性，等！在未來一、兩個月等跌市既良機一出現就買入。唔使再稔，一早稔定，一見港交所跌到70蚊樓下就買入！甚至用 e-Banking 晨早 Set 定買入價，必無走雞！

在二、三月份，我既大方向應該係陸續在有利可圖既情況下減持﹝甚至沽清﹞Blog上組合，鎖定約12% 至 15% 既可能利潤。如果由 29/11/2006開倉到 31/3/2007四個月計，做到 15% 利潤我係非常滿意啦。

假若二、三月套現成功，如港交所個價位跌到70蚊樓下，我唔排除將絕大部份組合既資金投放入港交所。因為，師父教落，認定優質股後，不用多心，一鳥在手，勝過百鳥在林。要賺60%到100%係要咁做至係。百鳥在手只會眼花撩亂，手忙腳亂，最後仲發覺百鳥中竟然有D惹左 H5N1！慘唔慘！

我認為投資係藝術，要憑直覺；亦係科學，因此要部署。成功七成係來自部署，兩成係來自直覺，最後一成係緣份，即係話：你既生辰八字同隻股票夾唔夾！

國內消費股

尋日北上深圳消費，親身去現場感受一下國內龐大消費群既真實面貌。沿華強北路電子世界漫步，遠近迎面，人頭湧湧，店鋪內外，生意滔滔。商鋪安裝大啦叭，希望以強勁音樂吸引路人；LG 專櫃則聘用大批短裙長 Boot 姐兒，打算以青春及甜笑攔路推銷手機。

橫街內，十歲小童在耍雜技，口含一塊十吋長木條，把啤頭樽拋上拋下翻跟斗；一列列露天食檔，坐滿以百計食客恣意狂擦。街道外，人流之多，多過旺角；店鋪內，數碼產品之齊，齊過豐澤 Broadway。

舉目遠眺，巨型廣告向你講解亞甲化裝品點正；低頭近望，宣傳單張向你細訴亞乙 Notebook 點勁！而 MP3、手機、Games、手袋、高跟鞋、西裝、領帶、名牌A貨等等，不斷向君招手，任君選擇。塞滿馬路的，滿城盡是私家車，而再非大巴小巴；行人路上擺滿小販地攤，由高科技的「電子狗」到亞媽至愛的「閉目穿針器」產品也有。沿途總不斷有人近身低聲向你兜售「電腦？」或「買票？」。極目人車爭路，耳畔樂韻飄飄，好一個繁榮都市的嘉年華盛況！

而這，只不過是一個平平凡凡的深圳星期六！

我等港燦北上，如不消費，豈有此理？SK 及 PC 乃識貨之人，大步衝進上海名牌專店 Louies Berry 搜購，SK先下一城，購入標價 $585 的淺色有型西裝外套，PC 不甘後人，亦搶購同系列深色有型西裝外套，我孤漏寡聞，一生中只識 Giordano 及 Baleno，但 PC 買乜我買乜，怕且無衰。點知一穿上身，SK 笑曰：「嘩！乜咁似兩兄弟！制服呀？」真吹脹！結果埋單三折都有找。跟住去 All-you-can-eat 既羊肉火鍋，食到肚脹腸又肥都只係每位 $38，單單個印度式既香蕉煎薄餅經已值回票價啦。FU 仲跟住去羅湖商業城做 Shirt 衫。

股聖 Peter Lynch 挑選高增長優質股的一個重要參考，就係逛街同行公司。有次佢老婆 Caroline 發現左有隻唔出名既蕾格絲牌絲襪好鬼好著，Peter Lynch 於是就買入蕾格絲既股票，結果幾年後賺左好多個開。而家，明白點解要北上深圳消費既重要性啦！在生活接觸中尋找靈感，其實係大師級既人 D 投資策略黎架！

國內龐大消費群的潛力真的驚人！今時今日，港燦北上的消費已無甚可觀，國內大都市亦再非一窮二白的年代，解放出來的內需，肯定才是未來的商機所在。2007年所以我睇好國內消費股。

紅猴股評係我中意睇既一個Blog，年初有篇文章提到11隻國內消費股(Click to View)，各股友可以留意。我稍作研究後，挑出其中六隻作為考慮對象，主要睇 Fundamental、EPS 增長率、Profit Margin 等，分別係恆安國際(1044)、福記食品(1175)、百盛商業(3368)、永恩國際(210)、宜進利(304)及李寧(2331)。蒙牛乳業(2319)及超大現代(682)亦在我觀察名單內，奈何股價一直高企，未係入市時機。

買國內消費股，觀察名單可以多D，但真正入市要集中，有信心果隻才買入及持有。點解？因為國內消費股好易受某些因素或政策影響，好易大上大落，因此信心及持有好緊要，唔係好似大藍籌可以亂咁買，最多買貴左放埋一邊長線收息。

我買入左隻福記食品經已係大上大落既人辦，信心少 D 經已「止蝕」左，但我既 Approach 係唔喜歡用「止蝕」，因為「止蝕」只係表示做錯左野，買錯股，蝕 10% 然後保住個本繼續玩，但作為價值投資者，應該確信買入既係優質股，遇到大跌既話，應該決定既係「靜觀其變」或「加注」拉低成本，而唔係「止蝕」。不過知易行難，我仍然係邊學邊做，摸住石頭過河。

2007年 – Week 5

2007年 – Week 5，組合帳面盈利率 +10.49%，盈利 +$48,720。

本週恆指大上大落，一D都唔好玩，如果貪念一起，入市炒賣，隨時左一巴右一巴，打到仆街。好彩以靜制動，一切結果如常。長期持有需要心靜，心動就易盲動，盲動就易做錯。股市升升降降，好似日日有無數賺Easy Money 既機會，但弔詭既係當你想賺Easy Money既時候，結果你會蝕本；但當你唔緊唔緊既時候，結果你會賺錢。

福記食品(1175)提早贖回2000萬元未償還可換股債券，藉以降低負債比率，涉及總贖回金額連利息約2155萬元，贖回日期2月8日。涉及債券2010年10月14日到期，換股價$10.125，換股期於1月30日結束。照計福記有錢提早贖回債券係好事，不過由於換股價只係10.125，而市價就19.90，可換股債券持有者即換即沽可以賺成一個開，唔怪得福記無辜辜連跌五日，由 19.90 跌到落 16.14，好似垃圾咁無人要，如今終於急彈回 18.60，當時如果醒D又夠膽加注，肯定有肉食。

2006年12月5日摩根士丹利發表證券報告, 首予福記食品「增持」評級, 目標價24港元。該行估計, 其07財年每股盈利為0.71人民幣。2006年12月6日道亨證券指福記食品現以市場預測其08財年的市盈率16.9倍交投, 估值被大幅低估, 因內地消費市場具龐大增長潛力, 故予其「買入」評級, 目標價25.5港元。

創科實業(669)漸入佳境，一浪高於一浪，DW早前表示經已入貨，恭喜荷包進帳不少！初步阻力應在 12.50，短線者可以先食糊，以防大市月中下跌受拖累。長線就有大行唱好，信不信由你。2007年1月26日 匯豐證券表示，將創科實業目標價由$12.2大幅調高至 $17.6，評級則為「增持」，以反映預計其收購Hoover可獲正面貢獻。同時，該行也調高創科07年盈利預測14.9%至14.34億元。

江西銅(358)的確軟弱無力，我打算在微利下沽出，不是不信它在2007終有一升之日，但更加相信它最先會在大市月中下跌時受拖累，因此，最佳的進攻就是防守，先沽出以保不失，比較等運到賺錢更重要。

整個組合防守性不錯，繼續持有。

太陽出來了

今日同PC去南丫島行山，輕柔的海風及和暖的陽光，迎向我們。大自然的美麗及奧妙，要用心，特別是無欲無求的平常心，才可以感覺到。想像著，某一天的下午，躺在軟綿綿沙灘席上，讓微熱的陽光灑滿背，不用上班、不必用腦、不需因工作而要和討厭的人接觸、讓殭硬的肩膀肌肉鬆弛、讓拉緊的神經放下、讓甜美的笑容回到臉上、讓高貴優雅的氣質再次從自信的眼神中散發！

太陽出來了，人生可是多麼可愛、多麼美麗！那生存才有意義，生命才有價值，生活才有目的，生死才有從容。

股市終於回歸Fundamental，恆指升324點，國指跌60點。PC做完高風險炒仙股動作，仍未細說「成交量」炒股必勝法，今日不知受了甚麼刺激，又或有高人指點，搖身一變成為一個超級保守投資法的倡議者。據佢所講，2007投資，最穩建莫過於：(1) 亞媽係女人【即係買匯豐(005)收息】；(2) 亞爸係男人【即係買中電(002)收息】；(3) 買煤氣(003)因為國內生意前景好 【但收購百江燃氣(1083)可參看陸羽仁幾篇精彩分析】；(4) 國企H股多數玩唔過，少數可考慮既有平安(2318)、國壽(2628)、上海電氣(2727)、中交建(1800)等，但入市價要低。如此這般，三年到五年可翻一翻，你試唔試？

我就話，不如等股災才入市，必有起碼 50% 斬獲，Sure Win！例如 911、64、H5N1、etc. 幾年總有一次，一次好過幾年。