總結失敗 --- 第一季 (12/06 – 2/07) (83)

投資比打工困難既地方，就係要認衰認錯，經常主動總結失敗、自我檢討，才能保持住較為冷靜清醒既頭腦，控制貪念，得到合理利潤 (10% - 30%)，就好收手，持盈保泰，唔好再理D報紙佬同大行財經演員日日推介既 Number，咁響股海中條命至會長 D！

打工比投資容易既地方，就係唔需要經常主動認衰認錯，直到你老細好唔Like你，要出到媽媽聲，你就會「主動」改正，宏觀調控到符合老細佢老人家既心意〔微觀就仍然按自己本子辦事〕，就可收手，持盈保泰，然後每個月既糧又照出！響職場中基本上條命可以會好長，只要做人醒少少，千祈唔好做D好醒同好有性格既人〔佢地一般都做唔長〕，咁一般黎講一直做到退休都應該無問題！

投資困難既地方，就係做錯野荷包會受傷！而且，基本上，日日都有「錯」！例如：140.5 買到匯豐平貨，以為好正，點知第日又可以 137.70，買「貴」左，錯！又例如：6.46 沽首都機場賺唔少啦，點知無耐就 8.60 啦，賣「平」左，又錯！所以話，股海中既特色原來就係人人都做錯野，所以做錯野千祈唔好大驚小怪，呼天搶地，買「貴」左就叫笨，賣「平」左就哭股喪，如果抱住咁既心理質素，投資就會變左係負擔，唔再係樂趣，咁又何苦呢？

老實講，我寫 Blog 就講到天下無敵，做就有心無力，日日都有「錯」！我做「錯」Trading In and Out 既次數，相信會多過雞婆食雞既次數！

投資成敗，唔係靠蕭河，而係靠心理質素，主要睇「耐性」同「紀律」。因此，我?定除左做 Weekly Update 成績外，亦要加上每季「總結失敗」，希望對自已有D提醒既作用！

總結失敗--- 第一季 (12/06 – 2/07)

(1) 選股：問題不大，都係有潛力同升幅既好股，買入時機及價位都OK，e.g. 首都機場、創科、大家樂、江西銅、福記、建行、中行、華置、中移動，而建滔層板和晨訊就投機性質多 D；

(2) 成績：盈利 +59,650〔盈利率 +12.85%〕，逐步上升，跑贏同期恆指 3.76%；

(3) 沽貨時機：相當差，首都機場、江西銅、福記、華置、中移動等一共五隻股，都因為缺乏「耐性」，沽貨太早，計算損失既獲利共有 92,770 咁多！由此可見，選到好股唔係太難，但係點樣把握「沽貨時機」，賺到應有既利潤，就需要非常高超既技巧同心理質素。今次，我只能賺到 59,650，但賺唔到我應得既另外 92,770，分別完全在於我缺乏「耐性」、亦無遵守「紀律」，唔肯堅持等落去見已設定既目標價，呢個「失敗」我係必須要記住同改過既！

(4) 展望下季：第二季我估個市風險更高，大上大落，持盈保泰似乎好 D，見步行步最好！

今日期指結算，利淡！一跌在所難免，入市執平貨未使咁早！

一於同 PC 去行山，呼吸大自然既空氣，同時繼續去想想「人為乜要生存」及「人可以點生存」呢D咁重要同有意義既問題！

2007年 --- Week 8 (82)

2007年 --- Week 8，組合盈利率 +12.24% (+56,850)，同期恆指 +10.17%，跑贏恆指 2.08%。

一些分享〔四〕 (81)

報章雜誌講股測市既專家多多，日日都起碼有十隻八隻股票推介，攪到你心旭旭，又想買又要驚。其實呢 D 反應好正常，人人都想投資致富，但 D 講股專家最唔好就係將「投資」當左「賭博」，日日俾「貼士」〔可能只係山埃〕，攪到 D人愈來愈唔使用腦、愈來愈依賴、愈來愈唔獨立思考，長遠而言，咁好易變左大戶既點心，令投資致富變左輸身家！

因此，睇報章雜誌既專家言論，一方面要帶眼識人，另一方面亦要選取一D較符合你既投資風格既文章，先致睇得順眼、聽得入耳、跟得落手。

我個人既睇法係，以下 D 作者較為「口岩」Key，較符合我既投資風格。

(1) 陸羽仁 --- 實戰經驗豐富，言之有物，唔講號碼，但俠義心腸，敢於踢爆大戶操作奸招，害人殺局，今時今日仍有這類人物，令我肅然起敬。陸羽仁在頭條日報有專欄，企業 CEO 既 Blog，書本有【股俠創富】，必讀！

(2) 曹仁超 --- 分析以數據為主，主要睇佢既思路，對大形勢大格局既分析，信報既專欄「投資者日記」現時翌日上埋 Blog 任睇，六皮都省埋！

(3) 何車 --- 經濟日報〔上車落車〕專欄，專教短炒，日日俾貼士！我其實一次都未跟過，我之所以留意佢係最近既事。2月15日畢流香有篇專文講何車，介紹佢自資近10萬元影印過去近百篇〔上車落車〕股評免費送俾讀者。我好奇怪今時今日仲有咁?既人？睇完畢流香篇文，得知何車乃資深投資人士，石鏡泉係港大學生時，佢已經係新鴻基証券研究員。如今早已上岸，係真真正正既自由撰稿人，背後無特定老板。因此，參考佢既貼士，唔怕有利益沖突，較少機會中 D 奸人佈定既局！

(4) 張士佳 --- Money Times 週刊〔高手過招〕專欄，專教短炒期指及股票，我其實又係一次都未跟過佢，但我有興趣係佢既出身，曾經幾番上落，對市場既觸覺同敏感性特別強。佢仲發明左一套炒賣法，長期開班授徒，據說期期爆滿。我主要都係睇佢對大形勢既分析，作為看好看淡既參考。

(5) 陸東 ---- 瑞銀研究部，間中講野。據說2006年睇市全港第一，即管又參考下。陸東估 2007 年恆指高位可上 23,000 點，但要先跌 1,500 點，而家所以日日D人都等跌至入市，唔多唔少都係多得陸東既言論！

(6) 龐寶林 --- 東驥基金專家，我唔多識佢，但係知佢都係中大畢業，間中會返母校回饋教人投資基金，趨吉避兇。覺得佢都唔係壞人奸人，都肯教人小心投資。我主要都係睇佢對全球新興市場同資金流向形勢既分析，作為買基金既參考。

市場資訊往往太多，資訊本身亦往往隱藏了發放者的陰濕動機，因此，小心過濾，小心解讀，小心分析，小心應用，才有利於自己的投資事業。否則，隨便吸放和輕易相信了「有害」的資訊〔往往以貼士或推介形式出現〕，很易最後弄得車毀人亡，財息兼失！

一些分享〔三〕 (80)

點樣睇住個市？真係無乜正方，成者為神，敗者為蟹，可以話各師各法。最簡單係話「恆指」升左定跌左就算，如果買左中資股，會睇埋「國指」升定跌。但呢D係賊過興兵既數據，無乜預測能力，你只係相信有「趨勢」，但「統計」分分鐘係會陰你既，如果「Technical」可信，係人都一早發左達！

(一) 新興市場全球資金流動狀況
我會參考一D第三者機構做既數據，較為客觀。例如每星期既「新興市場全球資金流動狀況」，我會睇 EPFR Fund Data Monitor，(Click to View)，咁會有 D 啟示。附上最近一期 Sample：
Feb 20, 2007
US investors still favor value over growth; China losing luster
Investors steered clear of China for a second straight week in mid-February, shifting their focus to smaller, more defensive regional markets as Chinese authorities talked down their country’s equity markets and stressed their willingness to curb excessive valuations. But Asia remains their preferred corner of the emerging markets universe: Asia ex-Japan Equity Funds took in $664.1 for the week ending February 14, accounting for 94% of the net inflows into all emerging markets equity funds.
睇完之後，唔多唔少你會稔下，短期內〔即一兩個月內〕好唔好對中資增長股仲咁樂觀？人家好似經己在走資啦！

(二) 上日未平倉合約既「認沽/認購」比率
另外，港交所 (Click to View) 好多有用既資料，例如從「上日未平倉合約」既「認沽/認購」比率，反映左沽/購力量對比，好似恆指(HSI) 認沽未平倉合約總數有215,291張，認沽/認購比率係1.290，而國指 (HHI) 認沽未平倉合約總數有100,519張，認沽/認購比率係2.193，仲勁！ 咁係米意味2日27日結算係向淡多過向好？ 好合理既猜想啦！

市場總覽 - 指數期權
最後更新: 22/02/2007 10:53
所有價格延時最少 30 分鐘


(三) 免費訂閱上市公司訊息
另外，又可以免費訂閱個別股份既最新消息，經常有Update既電郵收到。舉例：
上市公司訊息提示：
00945 宏利金融<00945> - 業績公告 (Click to View)

我估，股神同股蟹既分別，就係識唔識使用資料同埋獨立思考啦！

一些分享〔二〕 (79)

初三，唔少人既最後一天假期，明朝又要掛上專業笑容，以無比燦爛既心情返工，再戰江湖。

股市中不愁資訊，日日報紙總有好 Number 介紹，經濟、信報D專業報送埋分析唔在講，其他好似生果報、方向報更加貼士滿天飛，傳統老報亞島又出〔投資王〕專刊，公信第一報其實都好多說三道四既貼士，有無公信，事後你就會知！

作為尊貴〔但經常幾無知同埋輸錢〕既小股民，究竟將我地既血汗錢，投放在邊個 Number 好呢？

我觀察左好耐，得出以下既個人結論：

(1) 股票行D財經演員，日日開市、午市、收市都可以有野講，都有好多理由去解釋果日點解升及點解跌 --- 呢D全部係 Bull Shit，佢地出鏡目的係Promote公司產品及建立個人知名度，但對我地既投資係完全無真正既參考作用既〔你信佢就祝你好運〕；

(2) 大行既報告、目標價、買沽建議等 ---- 小心！記住！大行即係大鱷，係我地經常輸錢既小股民既真正敵人！佢地既專業係炒高個市佈定個局，等我地無知既小股民放錢入去，然後插低骨水走人。報告、目標價、買沽建議等係佢地既「謀生工具」〔如果唔係，點解三九唔識七登報公開D買沽建議益你！你估佢同係好 Friend？ 你只係路人甲乙丙，又唔係佢既客！〕；

(3) 專欄老編及記者，介紹 Number ---- 75% 不可信！點解？第一，佢係記者，所介紹既甚麼十大必勝股，我相信其實用個網上既 Stock Screening Software 一掃，按十個八個Criteria挑選就得，你跟佢買好牙煙，旺市十大必勝隻隻中，滿街股神，市跌馬上轉口，叫大家執生止蝕，關人！一個例子就係一月初跌市時，經濟報既林X芬轉口好快，如果你跟左佢，舊年的確做過股神，但一月初跌市時就要做番次股屎啦；第二，佢既工作就係介紹 Number，但係同佢工作 Performance 無掛鉤關係，無需為言論負責架！

(4) 專欄作家，人人俾 Number 加貼士滿天飛 ----小心！記住！呢班人之中，唔少係為某D莊家寫野，佈定個局等你去死！你最好下次先睇作者個名，後睇內容，再用「相反理論」去思考分析，或者，咁 D 專欄作家可能會幫到你！記住！我既個人結論係專欄作家奸既多、忠既少，要帶眼識人！

你話我上面呢 D 係個人偏見都好，我都想講，因為我有輸過錢，所以有發言權！又都好想免費同你分享一下！點解？因為投資輸錢D滋味一D都唔好受，所以我希望你投資只會賺，唔會蝕！呢個就係我既心願啦！

各位親愛既股友，願豬年共勉！共創財富！造福世界！安享晚年！

幾則分享 (78)

年初二，雨水，希望今年各股友路路水源充足，做工 Project 有生水，打牌唔怕抽水〔有糊食果個至有水抽〕，荷包經常有水〔人民幣更佳〕，連塊面都容光煥發、滿滿是水〔SK2、Neutrogina、H2O、FANCL、Sewame 乜都好啦〕！

(一) 匯控全售平安銀行 (Click to View)
2007年2月17日平安保險 (2318) 宣布，平安保險集團旗下的深圳市商業銀行，將斥資約 2.287 億元(人民幣?下同)，向匯豐控股 (0005) 收購平安銀行 27％ 股權。原本由平安信託持有的 73％ 股權，亦同時會將平安銀行股權轉移至深圳市商業銀行旗下。

匯控突然沽清平安，我覺得應該有利匯控，因為出售平安的盈利，雖未必能入今年帳，但一定可以抵銷一下北美 Household International 既負面消息。我維持 140 元以下可以增持既想法，但要有心理準備匯控可以落到 130 元，再加注可也。始終匯控係 2007 年可以穩陣賺 10% 既優質明星股。

3月5日匯控宣佈未期業績，就知盈利。

(二) 陸羽仁既〔?巴經濟學〕五篇文 (Click to View)
要深入D 了解香港股市既真正運作〔唔係你心目中天真既想法〕，一定要推介你睇陸羽仁既〔?巴經濟學〕。聽君一席話，勝讀十年書，係真架呢！

(三) 強積金 No.1 (Click to View)
你知唔知香港既強積金 (MPF) No.1 成績既係邊個？唔知？唔出奇！因為仲收開 10% 或 15% 舊制 P. Fund 既人對 2000 年至出世既 MPF 無乜 Feel 係好正常既事！不過，最差既〔大部份人既印象起碼係咁〕MPF 係獅子銀行 HSBC 怕且你會知掛？因為最多老板開初都用 HSBC 既 MPF，所以最多打工仔俾佢不知所謂既 Super-Under Performance 害死，由 2000 年一直媽到 2004 年，我係其中一個受害者！

香港 No.1 成績既 MPF 叫做匯富強積金 (Kingsway MPF Master Trust)，一年 (+83%)、三年(+137%)、或自開售起(+163%)，全都 No.1！ 唔簡單！最好笑係，Kingsway MPF 原來仲係獅子銀行既 Subsidiary，換左個 Management 同 Investment Strategy 就脫左胎換左骨！

我全部20萬既 MPF 全部轉去 Kingsway MPF。大家都知，MPF要65歲至可以取回，我計過，如果Kingsway 做到每年平均 18% 既回報率，到我收錢果日可以有 228 萬，足足賺 11 個開！D錢真係怕臨老使唔完，不過我都有左好多做善事既 Program Plan，只係等 D 錢佢繼續來！講真，Kingsway 一年 (+83%) 真係超曬班，排第二果個成績只係一半約40%，但其實係經已好好。


(Click to Enlarge)
有咁好既成績，主要來自 Kingsway 既香港特區基金 (HK SAR Fund)，佢既十大持股就係： (1) 392、(2) 165、(3) 291、(4) 1138、(5) 506、(6) 270、(7)1083、(8) 3368、(9) 152、(10) 83。

細節可參考 (Click to View)：
http://www.kingswayfm.com/frame.asp?topframe=topframe_mc.asp&display=6&content=mc_content.asp

豬年靜夜反思 (77)

每個人投資股票，本來目的都係為左增加財富，但往往事與願違。親朋戚友中，投資股票而真正賺到了錢的所見不多〔抽新股賺果三兩千銀D唔算〕，而做 Investment、Finance、Banking呢幾行既亦唔多，因此無乜投資股票高手既 Role Model俾我學野。

我一直在想，做乜投資股票賺錢會咁難？到底中間仲有乜野秘訣自已未攪得通？

回顧今生，我自從1980年大學畢業己開始學人買股票，股齡可算幾長，初期只係買一萬幾千銀，賺一千幾百就走人，但一跌就長期持有，蟹貨唔少最後都變左牆紙〔好似隹寧、益大之類〕。1987年移民加拿大，無錢再買股票。

1991年自加拿大回港，即全情投入股市，並且開埋孖展戶口炒賣股票同窩輪，希望一朝可以致富。皇天不負有心人，剛好被我趕上91年既升市，但見升市雞犬皆升，貪念大起，拼命孖展入貨，結果被大戶夾上震落，唔使幾下散手，經已打殘出局，一年半載蝕左三、四十萬，一Q清袋。對於打工賺錢唔多既我，蝕左咁多錢係一生中最大既教訓。

可惜，我並未因此真正學精到，1993年有左份安穩同好有意義既工作後，仍然不忘投身股海，並且繼續炒窩輪為樂，結果由93年到01年八年之間，不但從未真正從股市賺到過錢，埋單計數可能有D輸突。尤幸一直有工做有糧出，輸左就都唔多覺痛。

但如果我響2001果年就不幸瓜直左，蓋棺論定，咁就一世人可算未贏過股票，20年黎投資股票簡直係多Q餘既事情，完全浪費精神、浪費日晨。

2001年後，我開始萌生慧根，覺得人既然遲早難免一死，人生有錢無錢已經唔多重要，唔係因為我當時變有錢左，而係因為我對人世間既事物經已無乜興趣，睇得好淡，對追逐金錢成敗更加唔願多想花心思。但人始終要食飯，唔做工日日等死唔係辦法，好彩當時有份人工幾高但係無乜意義既政府工，幫到我儲返D錢。我好憎做呢份無乜意義既工，日日都想劈炮，但唔開工會無飯開，惟有照做落去，咁就迫住我去稔，我幾時可以唔做呢份度日如年既高薪厚職呢？

2002到2003年，我終於肯真真正正睇書，我相信學習投資股票，要從知識入手；我相信Knowledge is Power，投資股票係「有得學」同埋「可以學得識」既野！以我既有限資質，既然以前可以從「自學」中學識影相、學識籃球、學識橋牌、學識圍棋、游水、單車、溜?、電影製作、電腦、網頁設計等等學問，我相信我一樣可以從「自學」中學識投資股票！

我開始看 Warren Buffett、Peter Lynch、Phillip Fisher、Benjamin Graham、Tony Measor、Robert T. kiyosaki、Andre Kostolany、林少陽、錢可通、古鎮?、Benchmark等等，慢慢地我開始明白更多投資股票既知識，對於在股海中如何趨吉避兇既信心亦有所增加。

2003年開始，我正式重返投資股票既行列，主要買股票及基金。雖然成績只係一般過一般，平凡過平凡，但對於20股齡從未能於股市賺錢的我已經好滿意。因為在2003年的宏觀調控中，我無輸錢，其後至今亦從無輸錢，我己經初步堅持做到投資股票既第一金律「不要輸錢」！

事實上，由2003年至今，我係在賺錢，不過好慢！但我經已賺回所有我在1991年蝕左既三、四十萬。如今要做既，係點樣繼續落去。

雖然我錢唔多，距離真正財務自由既銀碼仲有一段距離，但我好想早日回復自由身，行行企企，就算等死都好。我終於膽粗粗在2006年7月劈炮，離開左果份無乜意義但做左六年既工，自我宣佈「退休」。我無兒無女，一個月食大家樂三千蚊都夠啦，餓得我死咩！況且香港仲有好好既綜援我從未享受過。

因此，2006年7月開始，我才算係真真正正以投資股票為生。我經常稔，人工作辛勞一生，點都有退休果一日，有D人成世打工，都仲驚退休D錢食唔過世，又或者驚唔夠錢養大D仔D女，又或者驚唔夠錢俾個幸福?暖既家俾佢地。我睇見就好可憐佢地，做人做到成世做金錢奴。我覺得最主要既錯誤觀念係：(a) 人太過相信由「打工」賺到既收入，一切都靠這個收入來源，但我見得太多人無左份工跟住無左所有福利既慘況，人有三衰六旺，份工可以無左，可以因為病、因為工傷、因為上司唔Like你、因為經濟差等等；(b) 人太過低估由「投資」賺到既收入，因此一生中在打工既時候從無好好安排，等到退休無收入既時候又話怕投資風險高，結果明明50歲有能力可以退到休，但仍要仆心仆命谷住度氣做到65歲去服待老板，箇中苦處我早有所領略，可以同聲一哭！

其實，打工才有退休年齡，投資反而無退休年齡，這個對投資收成既重要性，好多人都忽略左。即使你50歲退休先至開始投資，只要中規中距，每年投資有 10% 回報，你的一生根本已無憂！不信？算一算就知！

假設你50歲時只要有 100萬 Provident Fund 在手，每年投資有 10% 回報，55歲有161萬，60歲有259萬，65歲有418萬，70歲有673萬，75歲有1,083萬，80歲有1,745萬，85歲有2,810萬，90歲有4,526萬，95歲有7,289萬，100歲有11,739萬！

數字係唔會騙人既，只有自已既偏見至會令自已始終唔信上面既數字。結論好清楚，聽唔聽得入耳係每個人腦袋既 Frame of Reference問題，係可唔可以Change of Mindset既問題，而唔係任何其他投資既問題。
(1) 每年投資有 10% 回報係可能既；
(2) 你50歲退休先至開始投資根本一D唔遲；
(3) 你有 100萬閒錢在手做投資既Seed Money係可能既；
(4) 除左Set Aside 100萬做投資，你仲有錢開飯。

因此，如果有人話驚太長命驚退休D錢食唔過世，我話你知，你主要係腦袋受制於「打工仔手停口停」既舊觀念，投資世界中，時間係你既朋友。

如果你100歲果日都未上到天堂，你不如去擔心一下你果1億1,739萬點用好過啦！

因此，我「退休」後，只擔心將來年紀愈大，錢愈多，唔知點用好；從未驚過退休D錢〔雖然我無乜錢〕食唔過世既問題，就係基於上面條數咁計出來。

至於條數通唔通？ 信者得救啦！始終果句，食大家樂，餓得我死咩！

祝各股友豬年發過豬頭啦！

2007年 --- Week 7

(Click to Enlarge)

2007年 --- Week 7，組合調整後變作持有 341、669、1888 及 2000，全部持股帳面皆有正面進帳。組合盈利率 +11.76% (+54,620)，同期恆指 +9.40%，跑贏恆指 2.36%。

由於本 Blog 速度回復正常，即日起停止於 Yahoo(HK) 的 Mirror Upload。

歲晚整合

上午趁市升，再執整組合。

中移動 (941)，74.35 沽出全數 1,000 股，賺 1,450 (+1.99%)。

創科 (669)，11.54 再買入 2,500 股，增持至 10,000 股，平均價 10.34。

晨訊科技 (2000)， 2.87 買入 20,000 股。

就以這個面目過年，迎接可升可跌的美好明天。

恭祝各股友身體健康、青春常註、股運亨通，阿門！

調整組合

大市輕微反彈，但不少股份升幅可觀。上午以 8.19 全數沽出 6,000股華潤置地 (1109)，微蝕，沽後才抽上 8.30 以上，無可奈何，但沽出較安全。

另以 8.54 購入 9,000 股建滔層績板(1888)，希望短期重上 9.00 以上。

宏利金融(945)公布，截至去年底止第四季度業績，錄得純利11億加元，按年增長21%，每股盈利0.71加元，季度息每股0.2加元。期內營業額91.9億加元，升9.5%。截去年底止年度，宏利錄得純利39.85億加元，增長21%，每股盈利2.53加元。宏利2006年業績不俗，但無驚喜，賺錢但股價跌回 271。

計劃假如宏利跌回 266 (20天線) 到 263 (50天線)，可買入。

目前宏利 PE=19.79，以2006年 EPS 2.53加元 (即 16.95 港元)計算，2007年目標價約在 288 (PE=17) 到 305 (PE=18)左右。如PE升到 20倍，目標價可達 339，上升空間有 +25%。

你怕不怕跌市？

呢個問題既答案真係因人而異。老實講，個市話左跌都有成個月，不過上回只係集中跌五行三保，今日恆指跌左461點到20,132點、國企指數跌222點到9,711點，加埋仲有500億既成交量，俾人有一個「今次黎真」既感覺，而且大部份股份都跌，頗為「全方位」及「多角度」，驚嚇既作用真係都幾大！

但睇真D，恆指仲係在20,132點，而國企指數剛開始跌破10,000點，正係風雨飄搖、山雨欲來，其實又仲未開始真跌。但年晚收爐，內地春節仲休市一週，有貨者擔心係有道理既。

股友 PF 最近分享短炒她短炒方面的經驗，不妨一聽。佢以約40萬本錢，於一月份賺左超過 70,000 蚊，主要炒三隻股：中移動 (941)、建滔層積板(1888) 及玖龍紙業 (2689)，取其波幅大，亦係優質股，上上落落走好多轉，就有咁既成績。我雖多謝佢分享成功之道，聞之固然心動，想落亦有心驚，但用之於大波幅既市況，又似乎幾合適。各位股友，請問你又點睇呢種策略呢？

溫故知新，一月初當五行三保初跌既時候，我當時既想法，覺得今日仲係適用。1月4 號話「恆指…如果真係調整，技術上恆指要先跌…到19,321 回補上升裂口，進一步可以跌…到19,005既50天線支持位。…國企指數…調整技術上要先跌…到9,600 回補上升裂口，進一步可以跌…到9,425既20天線支持位，甚至可以跌…到8,589既50天線支持位。」 1月16號又話「…或許農曆年前後…我認為一個更具深度的調整必將出現。我等待！」

過去一向做好友既PC， 在呢個市況中經已轉身成為大淡友，今日仲表示「經已全線離場」，並向各股友「恭賀新禧」咁話！

有人睇淡，就有人睇好。短炒好友 ML 今日趁跌市以 73.50 買入 3,000 股中移動 (941) 及以 87.8 買入 1,000 股港交所 (388)，風高浪急，沙塵滾滾，惟有祝佢好運啦！

今日跌市對我既 Blog 上組合無乜大影響，我以 72.90 買入 1,000 股中移動，打算短炒，如反彈到 78 蚊沽出，如跌到 68 蚊就再增持 1,000 股，如再跌到 60 蚊就再增持 2,000 股，長期持有。

2007年 --- Week 6

2007年第6週， 組合帳面盈利 $54,190，升 11.67% 。同期恆指只升 9.98%，本組合跑贏大市 1.96%。

沽貨後既 Equity 與 Cash 比率返回 53 比 47 既理想水平，持有現金 $245,270，等待機會再執平貨。

呢個 Blog上組合本來開始時有D「玩玩下」，純粹為左寫Blog有 D 細藝，點知買下買下真係變左個「組合」出來！既然由於兩個半月時間〔29/11/2006 – 10/2/2007〕組合既盈利己有 11.67%，我決定為呢個 Blog上組合定下更清楚既以下十大目標！

十大目標：

(1) 本組合2007年既盈利目標係 30% 至 50% ；

(2) 本組合跑唔跑贏大市一D都無緊要，同恆指比較只係愛黎睇，扮下D專業財經演員個款咁解，真正重要既係達到項目 (1) 既真金白銀盈利；

(3) 本組合性質屬「高風險」既「中短線」「炒作」「投機」遊戲；

(4) 本組合投機，但只以優質股為入市對象；

(5) 本組合經常朝令夕改，精神分裂，只適合在動物園外欣賞，不宜模仿；

(6) 本組合中既「長線投資」即係炒作投機失手後變左「蟹貨」既同義詞；

(7) 本組合運作時會參考所有股友既「小道消息」及「心水」，敬請告知；

(8) 本組合不抽新股；

(9) 本組合持股可以幾分鐘咁耐，或者真係要好耐、好耐、好耐、好耐；

(10) 本組合係真正有誠意、真正好想賺錢既組合！唔係講笑既組合。

按計劃逐步沽貨

「相逢方一笑，相送還成泣。祖帳已傷離，荒城復愁入。天寒遠山淨，日暮長河急。解纜君已遙，望君猶佇立。」潮起潮落，股升股回，「野老與人爭席罷，海鷗何事更相疑？」

匯豐(5)借一個所謂增加撥備既「壞」消息，跌個四腳朝天。未知各位親愛既股友，係咪經已於140 蚊樓下悄然入了貨？如果經已做妥，我首先衷心咁恭喜你今年大豐收，早日享受財務自由既人生！我見到你發達既成功同歡喜，我亦會感同身受架〔雖然係你既錢唔係我既錢〕！匯豐係香港既發鈔銀行，年年賺錢，派息四厘，如果你仲擔心，那又何必再傷神睇股票呢？ 無錯，匯豐係慢吞吞既蝸牛，但呢個亦正係你既保險線，唔通你中意大上大落驚心動魄既刺激？平淡如開水既匯豐，每年可令你既資產增加 12%，你仲點可以怪 5 號仔呀！

我今日以 140.50 增持 400 股匯豐，加入原則上只買不賣既永久組合。

另外，我既 Blog 上組合，大家樂 (341) 近日陰乾陰乾，被花旗銀行及瑞銀華寶等壓住陰陰沽。上次升到 14.50 高位既沽貨機會經已舊價不須記，而家只在 13.50 浮沉。但大家樂係好料， P/E 22.73倍算係OK，年息有 4.22%，進可攻退可守，因此賺多賺少，只係一個「堅持三心、打走兩心」既遊戲！

「咁，即係點解？」即係話要做到堅持「信心、耐心、決心」，打走「擔心、傷心」咁解！ Understand？

就快又有隻「中國地產」IPO排隊上市任抽，潮流興炒影子股，希望可以帶旺我組合內既華潤置地 (1109)。

平安(2318) Ａ股IPO定價在 31.80 到 33.80 之間，睇來呢個可以當做短線既合理入貨價位，記住啦！ 跌到就好趁手啦！

今日以 8.17 沽清手上 4,000 股江西銅 (358)，微賺 $1,400 (+4.48%)；以 19.84 沽清手上 6,000 福記 (1175)，微賺 $2,980 (+2.53%)。

決心再次集中 Cash 火力，以面對大幅度上落的市況。

面對大波幅市況

過去個幾月，面對股市時，發覺自已總係有D唔多老黎同好憨居既感覺。稔左好耐，更年期唔應該咁播，究竟有乜唔妥呢？ 今日腦袋靈光一閃，彈左個答案出來：「原來自已仲未好適應面對大波幅既市況！」

今日個市，無錯係升，但係好多隻股都係以較大波幅咁彈上插落，好似手中既福記(1175)、江西銅(358)、華潤置地(1109)等都係，一日上落5%-6%閒閒地，又無乜理由同方向。我感覺而家面對股市似乎隨波逐流，易過堅持已見。例如大家樂(341)，初步目標14.66，但在大波幅市況中，它不是逐級而上，而是急彈上14.50然後幾日又插回13.50。面對這個大波幅市況，我有以下既睇法：

(1) 為穩陣計，各股友現時無謂入市。除左140蚊左右買買匯豐(5)博得過外，留錢在袋中等跌市好過。一等可能要等一兩個月至有機會，因此未來一兩個月可以連我呢個講股Blog都唔使睇，一心一意等大跌市，咁係上策〔我都打算咁做〕；

(2) 如果各股友錢在袋中又身痕，可以考慮買D 股票掛勾票據(ELN)收下「息」，或者抽下新股過日辰，應該幾安全同穩陣，咁係中策 ( 對抽新股既睇法，今日的我否定左昨日的我，不過我只係話各股友可以考慮抽，我自已則仍然唔會去抽新股 )；

(3) 至於Keep住個組合，照顧住五、六隻彈上插落既股票，雖然有高D回報既可能，但亦有高D蝕本既可能，對於各位穩陣既股友，咁係下策。

因此，我都要調節一下自已，點去在2007年適應面對大波幅既市況。

今日以 8.12 沽出 4,000股江西銅(358)，提高Cash 比例，即係多番D子彈。Cash Is King！ 有Cash 至有得傾！

銀行經理貼士

「峽裡誰知有人事，世中遙望空雲山，不疑靈境難聞見，塵心未盡思鄉縣。」小弟雖則歸隱山林多時，對前塵世事心如止水，「扁舟從此逝，江海寄餘生」。但凡緣已盡，股緣未了，而要知股事，不可不八卦收風。今日趁好春光，到中環市中心既旺地，坐定定同一位相識多年既銀行經理 CK 打打牙較，虛心聆聽高人指點，睇睇佢講既係堅料定流料！

除左例行收到銀行既精美大利是封及換到今年非常搶手既直版新鈔票外，同CK既一番談心既言談之間，仲收到以下既獨家貼士，可以同各位親愛既股友分享分享。各位股友收到料後，就即管分析過濾後，作個人既投資參考，但為存私隱，大家就無謂去估CK係乜野銀行既經理，亦無謂再將CK講既野四處唱，以免可能無意中影響左人家既仕途，善有善報，阿彌陀佛，阿門。

(1) CK 話2007年第一季股市未玩完，仲係上落市，國企會在9,500至11,500點之間，無大跌。如果有調整500點既日子，仲係入市既好機會；

(2) CK既銀行設計既股票掛勾票據 (Equity Linked Note – ELN)非常成功，係同業之冠。2006年記錄係10次做ELN，10次Call返，D客完全無因為股市下跌而要被迫接貨，因此深受D又保守又安全又穩建既投資者歡迎！如果拿住20萬或50萬或100萬而又想好低風險咁一年收到 10% 息 〔其實係認沽期權金〕，呢個係幾好既選擇！因此CK 話好受D師奶歡迎。
「點解師奶？」我唔多明。
CK話：「師奶至係真正既又保守又安全又穩建既投資者，男人唔係！」
「唉……！」

(3) 內地A股尚有可為。A50指數 (2823) 最多再跌 10%，跌到100蚊樓下可以考慮入貨；

(4) ELN股票掛勾多數係優質股，如匯豐(5)、國壽(2628)、港交所(388)、中交建(1800)等，但最近就無做平安(2318)。我既猜測係平安未見底，可能真係要見30蚊至係合理價；

(5) 國壽(2628) 既合理價係內地A股IPO既上市價，即係18蚊左右，可以考慮入貨；

(6) 中資銀行股平靜下來後，各基金公認建行(939)最好，紛紛納入基金十大持有股之一，長線持有者可考慮建行。

另外，ML申請IPO武夷藥業(1889)以招股價 1.80 得2,500股，上市以 2.33 沽出，賺 $1,325 (+29.4%)，恭喜恭喜！ 由此可見，只要有錢賺，散戶心不死，IPO不死！今年我一定要買港交所(388)了！

2007年 – IPO

舊年新股上市 (IPO)，人人賺到見牙唔見眼，但 07 一到，就時移勢易。各股友今年又有無去抽新股呢？

2007年三隻新股上市，怕且各股友連佢地乜名都叫唔出，報紙D專家又都突然失憶，唔多提IPO。三隻新股，兩勝一負，美維控股(3313)靠住唐英年家族個「躲」，倖保不失升 +2.67%；武夷藥業(1889)仍有 +18.3% 升幅，可說不錯；台一國際(1808)就變潛水艇，未知何日見家鄉。

似乎2006年IPO必勝之氣勢，經己一去不復還。

但無論如何，2007年仍有好多國內股份排隊上市，當中有唔少係龍頭猛料，點做好？

我認為2007年IPO好難返回2006年逢抽必賺咁癲，而且質素參差，2007年抽IPO風險變得較高，因此我唔主張各股友再去博呢D Easy Money﹝即使你上次IPO賺到笑哈哈我都係咁話﹞。

我認為2007年必勝之道係買港交所(388)，佢係唯一升市跌市都有利既股份，只要有成交就會有得賺。而2007年，平均每日都有500億成交，如果能夠全年保持大市咁暢旺，2007年港交所就豬籠入水，應該好穩陣，無衰！至於2008，仲有奧運頂住，無有怕。可以旺足兩年！

如果入市個價位入得好﹝我強調呢點係非常非常重要﹞，我估計兩年左右﹝到2008年尾﹞可以有 60% 到 100% 既收成。但必須要在 $70 下買入，太高入貨無乜水位。如果兩年升 60% 即係 $112，100% 係 $140，兩年咁長，好有機會做到。近期港交所最高都曾經炒到 93.50，過百蚊係輕而易舉既事。

各位冰雪聰明、天資敏銳既股友當然一聽就明解，最難最難既地方就係要在70蚊樓下買入！無錯，必須要有耐性，等！在未來一、兩個月等跌市既良機一出現就買入。唔使再稔，一早稔定，一見港交所跌到70蚊樓下就買入！甚至用 e-Banking 晨早 Set 定買入價，必無走雞！

在二、三月份，我既大方向應該係陸續在有利可圖既情況下減持﹝甚至沽清﹞Blog上組合，鎖定約12% 至 15% 既可能利潤。如果由 29/11/2006開倉到 31/3/2007四個月計，做到 15% 利潤我係非常滿意啦。

假若二、三月套現成功，如港交所個價位跌到70蚊樓下，我唔排除將絕大部份組合既資金投放入港交所。因為，師父教落，認定優質股後，不用多心，一鳥在手，勝過百鳥在林。要賺60%到100%係要咁做至係。百鳥在手只會眼花撩亂，手忙腳亂，最後仲發覺百鳥中竟然有D惹左 H5N1！慘唔慘！

我認為投資係藝術，要憑直覺；亦係科學，因此要部署。成功七成係來自部署，兩成係來自直覺，最後一成係緣份，即係話：你既生辰八字同隻股票夾唔夾！

國內消費股

尋日北上深圳消費，親身去現場感受一下國內龐大消費群既真實面貌。沿華強北路電子世界漫步，遠近迎面，人頭湧湧，店鋪內外，生意滔滔。商鋪安裝大啦叭，希望以強勁音樂吸引路人；LG 專櫃則聘用大批短裙長 Boot 姐兒，打算以青春及甜笑攔路推銷手機。

橫街內，十歲小童在耍雜技，口含一塊十吋長木條，把啤頭樽拋上拋下翻跟斗；一列列露天食檔，坐滿以百計食客恣意狂擦。街道外，人流之多，多過旺角；店鋪內，數碼產品之齊，齊過豐澤 Broadway。

舉目遠眺，巨型廣告向你講解亞甲化裝品點正；低頭近望，宣傳單張向你細訴亞乙 Notebook 點勁！而 MP3、手機、Games、手袋、高跟鞋、西裝、領帶、名牌A貨等等，不斷向君招手，任君選擇。塞滿馬路的，滿城盡是私家車，而再非大巴小巴；行人路上擺滿小販地攤，由高科技的「電子狗」到亞媽至愛的「閉目穿針器」產品也有。沿途總不斷有人近身低聲向你兜售「電腦？」或「買票？」。極目人車爭路，耳畔樂韻飄飄，好一個繁榮都市的嘉年華盛況！

而這，只不過是一個平平凡凡的深圳星期六！

我等港燦北上，如不消費，豈有此理？SK 及 PC 乃識貨之人，大步衝進上海名牌專店 Louies Berry 搜購，SK先下一城，購入標價 $585 的淺色有型西裝外套，PC 不甘後人，亦搶購同系列深色有型西裝外套，我孤漏寡聞，一生中只識 Giordano 及 Baleno，但 PC 買乜我買乜，怕且無衰。點知一穿上身，SK 笑曰：「嘩！乜咁似兩兄弟！制服呀？」真吹脹！結果埋單三折都有找。跟住去 All-you-can-eat 既羊肉火鍋，食到肚脹腸又肥都只係每位 $38，單單個印度式既香蕉煎薄餅經已值回票價啦。FU 仲跟住去羅湖商業城做 Shirt 衫。

股聖 Peter Lynch 挑選高增長優質股的一個重要參考，就係逛街同行公司。有次佢老婆 Caroline 發現左有隻唔出名既蕾格絲牌絲襪好鬼好著，Peter Lynch 於是就買入蕾格絲既股票，結果幾年後賺左好多個開。而家，明白點解要北上深圳消費既重要性啦！在生活接觸中尋找靈感，其實係大師級既人 D 投資策略黎架！

國內龐大消費群的潛力真的驚人！今時今日，港燦北上的消費已無甚可觀，國內大都市亦再非一窮二白的年代，解放出來的內需，肯定才是未來的商機所在。2007年所以我睇好國內消費股。

紅猴股評係我中意睇既一個Blog，年初有篇文章提到11隻國內消費股(Click to View)，各股友可以留意。我稍作研究後，挑出其中六隻作為考慮對象，主要睇 Fundamental、EPS 增長率、Profit Margin 等，分別係恆安國際(1044)、福記食品(1175)、百盛商業(3368)、永恩國際(210)、宜進利(304)及李寧(2331)。蒙牛乳業(2319)及超大現代(682)亦在我觀察名單內，奈何股價一直高企，未係入市時機。

買國內消費股，觀察名單可以多D，但真正入市要集中，有信心果隻才買入及持有。點解？因為國內消費股好易受某些因素或政策影響，好易大上大落，因此信心及持有好緊要，唔係好似大藍籌可以亂咁買，最多買貴左放埋一邊長線收息。

我買入左隻福記食品經已係大上大落既人辦，信心少 D 經已「止蝕」左，但我既 Approach 係唔喜歡用「止蝕」，因為「止蝕」只係表示做錯左野，買錯股，蝕 10% 然後保住個本繼續玩，但作為價值投資者，應該確信買入既係優質股，遇到大跌既話，應該決定既係「靜觀其變」或「加注」拉低成本，而唔係「止蝕」。不過知易行難，我仍然係邊學邊做，摸住石頭過河。

2007年 – Week 5

2007年 – Week 5，組合帳面盈利率 +10.49%，盈利 +$48,720。

本週恆指大上大落，一D都唔好玩，如果貪念一起，入市炒賣，隨時左一巴右一巴，打到仆街。好彩以靜制動，一切結果如常。長期持有需要心靜，心動就易盲動，盲動就易做錯。股市升升降降，好似日日有無數賺Easy Money 既機會，但弔詭既係當你想賺Easy Money既時候，結果你會蝕本；但當你唔緊唔緊既時候，結果你會賺錢。

福記食品(1175)提早贖回2000萬元未償還可換股債券，藉以降低負債比率，涉及總贖回金額連利息約2155萬元，贖回日期2月8日。涉及債券2010年10月14日到期，換股價$10.125，換股期於1月30日結束。照計福記有錢提早贖回債券係好事，不過由於換股價只係10.125，而市價就19.90，可換股債券持有者即換即沽可以賺成一個開，唔怪得福記無辜辜連跌五日，由 19.90 跌到落 16.14，好似垃圾咁無人要，如今終於急彈回 18.60，當時如果醒D又夠膽加注，肯定有肉食。

2006年12月5日摩根士丹利發表證券報告, 首予福記食品「增持」評級, 目標價24港元。該行估計, 其07財年每股盈利為0.71人民幣。2006年12月6日道亨證券指福記食品現以市場預測其08財年的市盈率16.9倍交投, 估值被大幅低估, 因內地消費市場具龐大增長潛力, 故予其「買入」評級, 目標價25.5港元。

創科實業(669)漸入佳境，一浪高於一浪，DW早前表示經已入貨，恭喜荷包進帳不少！初步阻力應在 12.50，短線者可以先食糊，以防大市月中下跌受拖累。長線就有大行唱好，信不信由你。2007年1月26日 匯豐證券表示，將創科實業目標價由$12.2大幅調高至 $17.6，評級則為「增持」，以反映預計其收購Hoover可獲正面貢獻。同時，該行也調高創科07年盈利預測14.9%至14.34億元。

江西銅(358)的確軟弱無力，我打算在微利下沽出，不是不信它在2007終有一升之日，但更加相信它最先會在大市月中下跌時受拖累，因此，最佳的進攻就是防守，先沽出以保不失，比較等運到賺錢更重要。

整個組合防守性不錯，繼續持有。

太陽出來了

今日同PC去南丫島行山，輕柔的海風及和暖的陽光，迎向我們。大自然的美麗及奧妙，要用心，特別是無欲無求的平常心，才可以感覺到。想像著，某一天的下午，躺在軟綿綿沙灘席上，讓微熱的陽光灑滿背，不用上班、不必用腦、不需因工作而要和討厭的人接觸、讓殭硬的肩膀肌肉鬆弛、讓拉緊的神經放下、讓甜美的笑容回到臉上、讓高貴優雅的氣質再次從自信的眼神中散發！

太陽出來了，人生可是多麼可愛、多麼美麗！那生存才有意義，生命才有價值，生活才有目的，生死才有從容。

股市終於回歸Fundamental，恆指升324點，國指跌60點。PC做完高風險炒仙股動作，仍未細說「成交量」炒股必勝法，今日不知受了甚麼刺激，又或有高人指點，搖身一變成為一個超級保守投資法的倡議者。據佢所講，2007投資，最穩建莫過於：(1) 亞媽係女人【即係買匯豐(005)收息】；(2) 亞爸係男人【即係買中電(002)收息】；(3) 買煤氣(003)因為國內生意前景好 【但收購百江燃氣(1083)可參看陸羽仁幾篇精彩分析】；(4) 國企H股多數玩唔過，少數可考慮既有平安(2318)、國壽(2628)、上海電氣(2727)、中交建(1800)等，但入市價要低。如此這般，三年到五年可翻一翻，你試唔試？

我就話，不如等股災才入市，必有起碼 50% 斬獲，Sure Win！例如 911、64、H5N1、etc. 幾年總有一次，一次好過幾年。

等

熱錢流走 + 調控政策 + 位高勢危 + 大摩吹淡 + 期指結算 = ？
明日如果只跌 300 點，算好彩！
等！
有貨要等，無貨亦要等。
有貨要等歸本，無貨要等執平貨！
買優質股 + 耐性 + 持有 = ？
我既組合中最受打擊係「中」字頭地產股。創科(669)仍一支獨秀，無令我失望。福記(1175)較為慘情，屬於「再坐一會」類別。
如今市況已沒有專家，任你唱升唱跌都得。
「等」是最好之策略！最好放放大假去遊山玩水！
人生，唔係淨係股票既！

微調組合

上午市升，但中資地產及消費股跌。我估大戶雖然陸續在高位派貨，但未完成，趁機微調組合，買入多些落後股，沽出一些弱勢但獲利股。

江西銅(358)回升，於 8.16 沽出 3,000股套微利 1,020 大元(+4.35%)。此股太弱，升就慢跌就快，保留8,000股等運到已足夠。

福記(1175)一直被大行每日控制在19.50到19.90之間買賣，今日野村、花旗、大摩、金英齊發力沽跌穿19.00，我趁機於19.20 增持 3,000 股。現時6,000 股平均買入價拉低到 19.35。

其他各股，以靜制動。

PC 以0.051買入的仙股國中控股(202)已於 0.059 沽出，獲利 15.7%。未知PC幾時可以分享觀察「股價」及「成交量」 之必賺買賣之道？

三月翻炒

股市最好玩﹝或者最得人驚﹞就係你估佢升，佢就跌；你估佢跌，佢就升。但係估錯得多，就變左學問；學問多左，就更加敢亂估；亂估中得多，就開始會亂車！

大戶派貨，越沽越高，你信唔信？而家恆指創新高，我地可以點做？你仲有無股票呢？你又驚唔驚跌市呢？你仲有Cash嗎？

陸羽仁篇「大戶出貨」(Click to View)值得睇睇。

在股市面對〔冬姑〕成日講既「可升可跌」機制，要考慮那兩手準備呢？

如果市升、唔停升、喪升，好似要升至22,000到24,000點至肯停，一於買匯豐(005)、宏利(945)、中移動(941)、港交所(388)。賺硬！而其他中資股唔好恨，因為會中「大戶派貨」陰招。

如果市跌、唔停跌、喪跌，好似要跌返18,000到16,000點至肯停，一於再買五行三保，因為三月只要一公佈業績，全世界都見泡沬，根本五行三保無足夠盈利支持股價，估計馬上再慘跌，而且會跌過龍。一於翻炒平安(2318)、國壽(2628)、財險(2328)、交行(3328)、建行(939)等。賺硬！2007年尾或 2008年初，可能翻一翻。

最緊要(1)你有 Cash、 (2)你敢買、(3)你有耐性長期持有、同埋…(4)你連我車既野都敢信！ 阿門！

Cash 至可以買「食送」

1月22日，週一。恆指20,772創新高，國指10,053，成交604億。這台戲仍熱鬧，但其實己沒有劇本，報章每天只是盡責地給貼士，滿足滿街盲毛股神。但聰明的你，會不會用你的血汗錢博取去賺這些高風險利潤呢？

上星期無緣無故，後腰坐骨神經突然一下子殭硬刺痛，整個人馬上動彈不得，一世人第一次感受到腰股劇痛漫延全身那種無助，一舉手、一投足皆身不由己，坐下了就別指望能再站起來。不要說下樓梯，就是想放一個有性格的響屁也「痛不欲生」！一星期過去，還好不了，可能下半生都要和腰痛做朋友了，因此我現在最能明白有腰痛的朋友的內心感受。我的馬拉松未知仍能否進行呢？

既然今天升市，獎勵自已一下，用 $15,000 買套新電腦做自已的禮物。人生如夢，如果你仍持有股票，一覺醒來，財富又多了、又或者少了，似乎和你有關，又似乎和你無關，如夢幻泡影，如露亦如電。試想想如你在 145元買入匯豐，看著它跌落139元時的那種無奈無助，又看著它無緣無故升回145元，那種上落跌宕感受，只有自知。所以我要買套 Core 2 Duo E6600用用，否則一旦突然魂歸天國，仍未用過 Bill Gate 的 64 Bit 產品，人家己經出到 Core 2 Quad了，我那人生肯定有憾。畢竟，人生實在太多無緣無故！

今週3隻新股IPO，又可以 Test The Water，睇睇D盲毛股神係米仲敢入市，但今日就炒上新高，令人有D做勢既感覺。而家只可以用太極心法：以靜制動、後發先至！

大市升，組合帳面升；中國好，我既荷包好！

如果D大鱷真係一口氣有力炒上新高，例如 21,000或 22,000點，那就提供一個讓我全線沽貨離場既絕世良機！

畢竟，Cash 至可以買「食送」o架！

2007年 – Week 3

2007年 – Week 3
總成績帳面賺 $45,460 (+9.79%)，Equity (82%):Cash(18%)。

投資技巧

我最近突然發覺，原來我開始寫左呢個Blog之後，我既投資技巧竟然進步了！何以見得？我覺得起碼有以下幾點：

(1) 講股唔敢亂咁車：因為有各位股友既監視，變左講每隻股既時候，起碼先睇左D Fundamental、Technical、預期EPS及 P/E至開口，咁「選股」方面錯既機會就自然少D啦！而「出入市」方面既Timing亦好左，買到平貨贏面自然大左。至於所謂「目標價」方面係屬於「妖言惑眾」既領域，錯左自然係可以原諒同理解既！

(2) 減少左老人痴呆：大家都知啦，老人痴呆既特徵係「無記性」，而股民既特徵又正正係「無記性」，仲係「好無記性」果種！例如：呢頭輸左至話以後再唔做錯，果頭又入市再錯多次，一般唔係衰貪心就係衰怕死。我寫左Blog後，記性突然好左，唔會隨隨便便因為「無記性」而在股海中犯D好 Stupid既重覆錯誤！

(3) 貼士準左好多：我而家「選股」D跌市防守力，自己都算幾滿意。我既投資宗旨係股神巴菲特個兩條法則：『第一，投資必定要保本及要贏；第二，永遠記住第一！』直到目前，我既Blog上組合都好好，今日仲可以5隻股全部正數添〔連爛鬼江西銅(358)都可以返到家鄉〕！

(4) 頭寸調動醒左：以往買賣好易買多左或者買少左，一係令到組合中既股份比例偏頗，一係令到Cash同 Equity既比例偏離 50:50 太多。而家有個Blog日日咁講股，自然連頭寸調動都醒左，唔會拾下拾下亂咁買！

(5) 出入市彈性左：以往買賣唔係「開曬」就係「收曬」，好少好似而家用多左「分段買賣法」或者「金字塔式買賣法」，視乎市況再去按當時情形調動。例如隻首都機場(694)，足足前後用左一個月至沽清，但平均沽出價係賺多左既。其實，基金大戶從來都係「增持」或「減持」，邊有散戶咁下下全部買入或全部沽清。唔好只係猛話大戶錢多，要虛心學下人地D買賣技巧，自己先至會進步架！

(6) 做到低買高賣：低買高賣，講就易做就難！基於種種因素，散戶最興在高位摸頂，然後又在低位止蝕！呢方面唔使我多講，因為家家都有本難唸既血淚史！我最近能夠做到低買高賣，因為己經發明左一套方法，幫自己客觀D做入市沽貨既工具！ It works！

行業升降機

1月18日，星期四。國企指數只係升少少25點，但煤、銅、鋼、泥、鋁、油、金等都一擁而上，好似有得執，全線上升。那邊箱，五行、三保、內地房產，伊人獨憔悴，我見尤憐！形勢發展愈來愈明顯是玩 Rotational Buy，玩行業性升降機，自己執生上落了。難道這就是2007的主流？

組合變化不大，只是華潤置地(1109)被人乘勢插到落8.20，叫做打破底價了。

大家樂(341)最近古古怪怪，今日得果47萬成交量但被人舞上舞落，一於暫時好少理。

江西銅(358)長年被大行唱衰，但今日突然勁升5.8%到7.84，收復所有失地。而且一夜之間，高盛跳出來唱好，目標價11.20，潛在升幅有47%！ (Click to View) 嘩！我仲唔發達？唉！不過「大行靠得住，豬?會上樹」啦！

福記(1175)罷似碧海凝青光，動也不動。創科(669)蓄勢待發。

我會以後一週才 Update 一次組合，以免患上 Hyper-Active 的股票炒賣症候群。因為，我發覺在一月份不知不覺經己多次買責，並且多次賺取小利，但我總認為減少買賣次數，增加耐性，成績可以更好。

PC的國中控股(202)倒轉槍頭急回 8.33% 到 0.055收市，真係來得急時去也急！未知PC的仙股遊戲下一步點樣發展呢？

回應 DW關於創科(669)：

你問點解06年1月創科(669)由18蚊急跌到13蚊，老實講我真係唔識答。但知唔知對聽朝股價又有乜關係呢？你敢唔敢買創科，係睇隻股將來賺唔賺錢，唔係隻股係米曾經仆過街〔雖然仆過街或者可以買到平貨，但電訊盈科(8)你敢唔敢買丫？〕我反而認為創科既然由02年初2蚊升至06年1月18蚊，跌係正常既事，因為我估正常既強勁盈利增長，都唔多可能Support四年內股價升左9倍，而且基金都應該食飽飽、換換位、趙完鬆啦！

聯交所資料顯示，澳洲聯邦銀行於11月17日，以每股$12，減持創科實業5,000萬股，其持股量已由10.46%減至7.05%。你言下之意，好似話$12咁低都沽創科，係米表示低處未算低？但你有稔過澳洲聯邦銀行係幾錢買入呢？$12對佢係賺定蝕呢？而且佢沽左5,000萬股後仲係成手貨 (7.05%)。其實好多大行動作，我地唔理得咁多，而市場反應亦只係好短期，唔值得作為入市既考慮。

市場中永遠有人看好，有人看淡，有人對著幹。12蚊有人接貨即是同時亦有大戶睇好，大戶動向只可參考，不可作準。況且我們見到的只是他們大手沽貨或買貨記錄的表面，但大戶背後整體部署往往無從得知，例如沽空、對沖、期指等等，因此股價下跌你會虧本但人家賺錢。而且一隻基金股可以有多個大行持倉，他們在不同價位入貨、沽貨，因此口徑也不會一致，我認為回歸基本分析才是正道，才是做決定的信心所在。

我敢買創科係因為睇好佢經過一年調整、盈利終會否極泰來，而在10蚊樓下入市係因為有值博率〔即係在10蚊下向上升既Probability大過向下跌既Probability〕。如果只係跟風大行，恐怕我好快就會葬身股海、同大家Bye-Bye、唔可以繼續寫呢個咁有意義既Blog架啦！。

至於Rotation Buy，我特別睇好中國消費品內需股同中國房地產股，在我1月8日既Blog「2007年旺邊行？」己有提及，請參閱！至於駿威(203)在2.50之下我才會考慮，雖然駿威的Profit Margin, P/E, Yield等數據不錯，但其實EPS於05年己下降，今年叫做渡過難關，但我認為駿威的Toyota在中國銷路一定不及國產的平價車，因此Auto Industry我會Prefer 長城汔車(2333)或東風(489)等，但而家都處於高位，亦唔係入貨既時機。

投機天賦大考驗 (分析)

(1) 股市令你想到邊種遊戲？
(a) 國際象棋 (0分)
(b) 橋牌 (3分)
(c) 賭波 (1分)
(d) 賭輪盤 (0分)
(e) 賽馬 (2分)
投機者﹝包括投資者﹞必須適應隨時改變的情勢，推論並下決定，就像打橋牌的人要根據拿到的牌來遊戲。股市情?可能對投資者有利或不利，就像分得的牌好壞不一樣。一個好的投資者就像好的打牌人一樣，會巧炒地擺脫逆境，牌好時贏得多，牌差時輸得少。

(2) 決定買進或沽出既關鍵係：
(a) 對股票既分析 (1分)
(b) 對市場既分析 (3分)
對所有證券有關鍵性影響的是股市的發展趨勢。最好的股票在整個股市下跌的時候也漲不起來﹝或上漲困難﹞。相反，整個行情看漲時，差的股票也會上漲，有時甚至比好的股票漲得更多。

(3) 買股票時重要既係：
(a) 選擇種類 (1分)
(b) 時機 (3分)
如果在錯誤的時機買賣，即使買賣對了股票你也會輸錢；如果在適當的時機買賣，那?就算買賣錯了股票你也會賺錢。

(4) 我幾時會拋售股票？
(a) 小有利潤時就賣出 (0分)
(b) 獲得大利時才賣出 (0分)
(c) 不計得失 (3分)
人們決定是否應該出售某種股票與﹝過去的﹞買進價根本沒有關係，而是取決於未來的發展，人們必須作出完全客觀的判斷。

(5) 我會在幾時買進股票？
(a) 漲價時 (0分)
(b) 跌價時 (0分)
(c) 其他原因 (3分)
個別股票的漲落並不代表未來，買入股票需要有其他的原因。

(6) 我會將低價沽出過既股票用高價買回來嗎？
(a) 會 (3分)
(b) 唔會 (0分)
你的判斷必須是客觀的，與過去的買賣沒有關係。

(7) 恆生指數﹝或者同埋國企指數﹞在小成交額下攀升時，咁對市場係：
(a) 有利 (0分)
(b) 不利 (3分)
當行情下跌且成交額小時，買入的股票更保險，因為這些買主比只在行情上升時買股票的人，一定擁有更強的資本實力。相反，當行情上升成交額變小時，你可以得出結論，股票會從資本實力強的手中轉交到資本實力弱的手中，這會對市場不利。

(8) 市場行情雖然有好消息但無立刻上漲時，我會利用呢個機會：
(a) 買入 (0分)
(b) 沽出 (3分)
趕緊拋出所有存貨，股市行情不漲是有道理的。

(9) 買股票D人既思維過程好似邊種人？
(a) 工程師 (0分)
(b) 商人 (1分)
(c) 律師 (2分)
(d) 企業管理者 (0分)
(e) 醫生 (3分)
(f) 政治家 (1分)
像投資者一樣，醫生需要首先作出診斷，再由這個診斷產生進一步的思考。醫生和投資者在作出最後決定之前要先觀察事態，如果事後發現自己的決定朝著錯誤的方向發展，必須立刻改正。工程師或企業管理者的思維過程正好相反，是純數學的，他們決對不允許跟著感覺走。

(10) 股票會在經濟衰退時升值嗎？
(a) 會 (3分)
(b) 唔會 (0分)
會：﹝美國為例﹞70年代未的股市發展就是一個例子，儘管失業率上升，股市還是修正過來了。也許正是出於這個原因，當時政府雖然貢獻不多，但還是加了點油。

(11) 各大行都一致推介既股票，我會：
(a) 買入 (0分)
(b) 審查研究 (1分)
(c) 沽出 (1分)
(d) 不買 (3分)
小心 ---- 這些大行要拋出某種股票！

(12)對於投資多年、有經驗、但無乜成績既股民既意見，我認為：
(a) 好重要 (2分)
(b) 唔係幾重要 (0分)
(c) 根本唔重要 (0分)
成績並不是衡量專家智慧和專業知識的尺度，他能夠很精準地判斷股市的發展趨勢和某種股票的機會。但自已的投資表現不濟，通常是因為猶豫不決、前怕狼後怕虎、緊張或沒耐心，而且不夠堅信自己的觀點。

(13)股市暴跌後，所有既微兆都預示有新既轉機，我會購買邊D股票？
(a) 股價穩定不變既 (3分)
(b) 跌得較少既 (0分)
(c) 跌得較多既 (0分)
(d) 暴跌既 (2分)
股價能穩定不變，肯定有我們不知道的原因。暴跌而瀕臨零價值的股票，你也可以購買。

(14)世界上最大既電腦生產商IBM狀告Control Data公司壟斷經營，咁對邊個有利？
(a) IBM (0分)
(b) Control Data (1分)
(c) 兩個都無 (0分)
大的壟斷公司控告一家小得多的公司，是對小公司的讚賞，對方肯定非常優秀。

你自己計計幾多分啦！ 〔最高 39 分〕

Andre Kostolany 既評論：

高於33分：高手！你已經係投資專家！
你己經在股市上經驗豐富，並瞭解股市的所有詭計和陷阱。不只如此，你對成敗也有細緻的分析，並得出正確結論。股市行情不按經濟發展變化時，你不會感到驚訝。

25分 ~ 33分：有前途既好手！
你能正確判斷事態和趨勢，但缺乏經驗。你也許己獲致很大成就，但尚未經歷足夠的失敗，才能在驚慌中不失去理智。在成為專家之前，還必須通過幾場考驗，體驗先敗的痛苦。

10分 ~ 24分：有潛力既新手！
你對事態的觀點還太過持平，在失望之餘仍不知道自己是被那一條欄杆絆倒的。股市新手還無法理解，雖然邏輯總是最終取勝，但股市有自己的邏輯，所以當事態不像你所想像的那樣時，不要指責交易所的投機商，而是要從中學習，也許不久勝利就會向你招手。

低於10分：外行生手！
你對股市的動態是完全錯誤的想像，思考太實際、太數學、太直接，太少讓自己跟著想像力走。金融投資其實不是科學，而是一種藝術，如果你缺乏股市藝術的天份，那?一些簡單的投資，例如債券或存摺會更適合你。

PC 必勝之道

1月17日，週三，恆指升、國指跌，587億成交。睇黎國指唔再跌到9,000或9,300，恆指唔會健康咁上23,000。三月業績公佈後可見真章。而家日日500幾億成交，指數就唔上唔落，你話大戶在收集、定係派貨？心照啦，醒定D好！

首都機場(694)回升4.5%到6.52，我於6.46全數沽出最後6,000股，先袋袋平安8,940大元(+30%)。此股強勢，但國企市況不就，終需一跌，現正營造雙頂之勢，我會等待它跌回5.00至5.50範圍再買，但最好等到三月06年業績出後睇定更佳。此股05年 EPS=0.24，現 P/E=28.5；而06年預期EPS=0.265，如P/E=20值5.30；如P/E=25值6.60；如P/E=30值7.90；因此在5.00至5.50範圍再買，07年勝算較高；如以現值 6.52追入，風險高水位低，除非盈利一下子大增或大行對P/E估值一齊出口術唱好，否則此股現時值唔值6.50到7.00，仍係見仁見智。無錯！我絕對同意首都機場一定係奧運得益股，但有能力賺幾多一定要睇業績公佈，唔係人炒我又炒，變左盲毛股神，咁點對得住我信奉既價值投資法既列祖列宗呢？

我睇好內地消費股，今日以19.50買入3,000股福記食品(1175) (Click to See)，收市19.86。福記為上海最大的本土送餐服務供應商，專注為各企業及普羅大眾提供綜合送餐方案及優質食品，包括送餐服務、中餐館及方便食品。憑藉對中央化加工豐富的知識及中餐館管理經驗，福記已迅速發展為一間超卓的食品及送餐服務連鎖經營商。此股過往幾年以驚人速度成長，預期平均EPS增長為51%！

各種基本因素數據非常靚靚：邊際利潤率 31.55%， 資產回報 13.67% ， 股東權益回報 17.39%，流動比率 187.21%， 長期負債/股東權益 4.13%， 債項/股東權益 15.37%。但高增長股無可避免的高P/E低息情況它也存在〔週息率 0.91%，股價/賬面值6.88 倍，市盈率 36.21 倍〕，但這些過去數據無損將來的盈利能力。

福記07年預期EPS=1.07，如P/E=20值21.40；如P/E=25值26.70；如P/E=30值32.10；如果以06年EPS為基礎的現時P/E己有36倍，可見上述估值完全合理，於07年升到32蚊絕非無可能！所以明白我點解買啦！

大陸地產股今日全線慘跌，原因是出了一個新聞：國稅局: 房地產項目預售滿3年須交土地增值稅 (Click to See)。我睇完覺得奇怪，國家稅務總局只係叫大家依時交稅，又唔係加稅，雖然影響Cash Flow，但斷斷唔係災難，除非D大陸地產股好雞，或者財務上身有屎，或者Marketing不知所謂，否則無可能已取得預售許可證滿3年但仍未銷售完畢，又或者已轉讓的房地產建築面積佔整個項目可售建築面積的比例在85%以上，仍然有交稅困難。因此，我認為今次又係借勢震倉，利用市場人心虛弱，打殘D散戶。因此，大陸地產股如果再跌下，應該又係選擇性既入市好機會。

PC尋日進行炒仙股遊戲，兼且在市場中真金白銀去驗證佢最新既投資買賣理論，真係好學兼勇氣可嘉。佢以0.051「大手」買入左200,000股國中控股 (202)，今日收0.06，賺 17.6%。據說，PC正在研究一種觀察「成交量」及「價格轉變」從而定出「買賣策略」之必勝之道，這方法宣稱猶勝於主張 Buy and Hold 之價值投資法！

希望PC早日修成正果，並與各股友分享，益街坊、種善因、得善果！阿彌陀佛！

今天講詞！

今天好倦，不講股票，講詞！

我想好好再次靜心品味一下她的詞！唐、宋、元三代，最傑出的一位女作家；與李太白、李後主並稱為詞家三李：李清照！

易安居士亡夫後之作品，尋無覓處，渾然深遠，蹊徑獨闢，戛然而止，讀之誠不盪氣迥腸乎！

聲聲慢

尋尋覓覓、冷冷清清，悽悽慘慘戚戚。
乍暖還寒時候，最難將息。

三盃兩盞淡酒，怎敵他晚來風急！
雁過也、正傷心，卻是舊時相識。

滿地黃花堆積，憔悴損、如今有誰堪摘？
守著窗兒，獨自怎生得黑！

梧桐更兼細雨，到黃昏、點點滴滴。
這次第，怎一個愁字了得！


武陵春

風住塵香花已盡，日晚倦梳頭；
物是人非事事休，欲語淚先流。

聞說雙溪春尚好，也擬泛輕舟；
只恐雙溪舴艋舟，載不動許多愁。

逐步沽貨

週一 (15/1) 股市全面回升，成交561億。我只認為是虛火，或許農曆年前後仍有幾星期的興旺，但我認為一個更具深度的調整必將出現。我等待！

我的防禦性組合開始見效，跌市中我安然無損，今日反彈馬上令我總成績首次超逾10%，總帳面利潤亦升至 47,250，可見保守策略在高位時會比進取策略安全一點，雖然短線會賺少了。

我選對了大家樂(341)，12.78買入後第八個交易天己升至14.56，距離第一個目標價14.66 (+15%)不遠。大家樂近況氣勢如虹，假若一舉升穿14.66，我會由它飛翔，靜待它向第二個目標價15.20進發，但那是52週高位。我不認為大家樂短線有力再上，也看不到任何理由它應該上升，更不相信它會無緣無故再創新高﹝雖然我好希望我看錯﹞，目前股價上升只是無謂炒作，或者是過份低跌後的過份反彈，我會在14.66到 15.20 之間將其沽清。

首都機場(694)既然仍然強勢站在6.23，我就且由得它。

創科(669)收市上到 10.58，意味著大戶收集得七七八八，開始炒上，我估計明天開始就陸續有大行推介唱好，股價並且逐漸堅挺。我會考慮沽出的第一個目標價是12.60，假若短期能一舉升穿12.60，我會由它飛翔，靜待它向第二個目標價15.30進發。期間視乎市況，我會在12.60到 15.30 之間任何價位將其沽清。我也保持在7,500股的水平，不加不減，因為Cash另有用途。

江西銅(358)也即將升抵 7.82的買入價。事實上，買入後應該忘記買入價，只需展望將來。我認為只要國際銅價稍為反彈，江西銅應該可以為我帶來可觀的利潤。

我相信8.22買入華潤置地(1109)也買對了，今天收8.49。內地房產股全面報升，我期待它能於短期內升到9.52至9.84之間，我再決定去留。

今天的我又全面否定昨天的我，耐性及紀律再次成為我朋友。

投機天賦大考驗

德國股神 Andre Kostolany在【金錢遊戲】一書中，開出了一張共38題既問卷，幫你分析一下自己到底係唔係股市投機者既材料。我只係抽出14題俾各股友玩玩﹝並且用符合香港國情既語言表達﹞。要知答案？你自己買左本書睇啦！

(1) 股市令你想到邊種遊戲？
(a) 國際象棋
(b) 橋牌
(c) 賭波
(d) 賭輪盤
(e) 賽馬

(2) 決定買進或沽出既關鍵係：
(a) 對股票既分析
(b) 對市場既分析

(3) 買股票時重要既係：
(a) 選擇種類
(b) 時機

(4) 我幾時會拋售股票？
(a) 小有利潤時就賣出
(b) 獲得大利時才賣出
(c) 不計得失

(5) 我會在幾時買進股票？
(a) 漲價時
(b) 跌價時
(c) 其他原因

(6) 我會將低價沽出過既股票用高價買回來嗎？
(a) 會
(b) 唔會

(7) 恆生指數﹝或者同埋國企指數﹞在小成交額下攀升時，咁對市場係：
(a) 有利
(b) 不利

(8) 市場行情雖然有好消息但無立刻上漲時，我會利用呢個機會：
(a) 買入
(b) 沽出

(9) 買股票D人既思維過程好似邊種人？
(a) 工程師
(b) 商人
(c) 律師
(d) 企業管理者
(e) 醫生
(f) 政治家

(10) 股票會在經濟衰退時升值嗎？
(a) 會
(b) 唔會

(11) 各大行都一致推介既股票，我會：
(a) 買入
(b) 審查研究
(c) 沽出
(d) 不買

(12) 對於投資多年、有經驗、但無乜成績既股民既意見，我認為：
(a) 好重要
(b) 唔係幾重要
(c) 根本唔重要

(13) 股市暴跌後，所有既微兆都預示有新既轉機，我會購買邊D股票？
(a) 股價穩定不變既
(b) 跌得較少既
(c) 跌得較多既
(d) 暴跌既

(14) 世界上最大既電腦生產商IBM狀告Control Data公司壟斷經營，咁對邊個有利？
(a) IBM
(b) Control Data
(c) 兩個都無

散戶案例

今日上左個專業既雞精跑步班，由資格廿幾年既跑步教練親身教路，再即場操練左三公里跑步，合格完成，對黎緊既十公里馬拉松開始有D信心。師傅仲有金句，講得好有見地，我會一定緊記。

佢大大聲咁話：「你地呢班人一睇就知唔係跑步精英啦，係米？既然一定都唔會上台?獎，咁最主要既跑步目的就係跑完果十公里，同埋唔好途中暴斃，知無？」唉！我明架啦，師傅！

下午茶搵到退休老友PL講股吹水，PL係稀有動物，即係食Pension個隻，每個月兩皮幾，不知幾嘆！仲係有PhD銜頭既人。佢日日睇兩份發達報亞濟同亞信，我猜想佢都應該係D有智慧既人，於是虛心請教佢除左日食Pension 六百幾皮之外，富身家究竟點投資？點知一聽之下，嚇親！

(1) 佢話多年前己開始買韓國基金，10蚊買入，點知一個金融風暴，一直跌到3蚊，佢打死都唔賣，但又唔敢再買。等韓國人民個個捐金救國渡過難關，再經SARS一役震盪上上落落後，終於3蚊升6蚊，6蚊升9蚊，持有六年後當升至9.70望見家鄉時急急沽出，佢好慶幸只係小蝕3%成功離場。離場後一年，韓國基金欣欣向榮升到14蚊，不過佢只能哎嘆﹝或媽媽﹞幾聲了。

(2) PL日日睇兩份發達報亞濟同亞信，熟知世界動態同經濟行情。我問2006年國企股佢賺左幾多？佢話無。我大吃一驚，問「點解？」因為有統計顯示響2006年連唔識字既大猩猩都可以在股市賺錢，何況PhD？佢話佢唔信大陸所有既股票。「嘩！咁都得？」當然又問「點解？」佢話有D人話佢知大陸股買唔過。「邊D人呢？」追問下得知原來係當年紅籌熱潮時代曾經買過北京控股(392)、上海實業(363)、同中國移動(941)PK左果D朋友！

(3) PL買香港股票，唔知點解，總係高位入市，然後好快扮蟹。例如103蚊買恆生(11)、3蚊邊買莎莎(178)、20蚊樓上買地鐵(66)等，扮蟹後死等一兩年點都唔肯蝕賣、又唔敢再買。近月終於歸本，先後沽出莎莎同地鐵，仍然持有恆生，仲好似好有策略咁話：「恆生有息收，等第日佢既內地興業銀行IPO先至賣！」

(4) PL好認真咁話：「我中意買存款證，有3厘幾息，幾個月又到期，可以再買！Compound Interest 呀！」佢好似覺得呢個就係致富之道。Oh, My God！

我終於忍唔住問佢日日睇兩份報亞濟同亞信，究竟係睇乜東東？
佢話：「我睇大方向！」
我又想知：「咁你2006年既投資成績係幾多%呢？」
PL答：「我無理呢D架！」
OK！OK！我完全明曬！

一個擁有PhD既人既投資風格都只不過係咁，咁我地既成績都算係咁啦，算無失禮我地D散戶啦！

多做功課、少看升跌

人生中，無肉令人瘦，無竹令人俗；股海中，無做功課令人窮，無看升跌令人富。

多做功課乃少林心法，只會對，不會錯。對中國房地產的分折，曹仁超的大作：「中央企硬防樓市泡沫」有參考價值。看罷我有以下想法：


(1) 大陸樓由早年的爛尾時代逐漸發展成今日的商品房時代是健康的進步。如今香港地產商都一窩蜂北上，亦真金白銀買地，證明真係有生意做，有利可圖。即是話，大陸地產股應該係進入一個「信史時代」，股票變廢紙既機會率低左；

(2) 咁多年黎，果D地盤圍板就賣樓花既搵笨發展商，經過優勝劣敗及消費權益觀念提升後，應該己逐漸被淘汰。而家做大生意同可以在香港上市D中國房地產股應該手腳比較乾淨﹝當然，佢地買地或取得土地既方法乾唔乾淨，就仍有待國情既發展﹞；

(3) 國家建設部於1月10日發布既《九十平方米以下住宅設計要點》宣布全國必須嚴格執行九十平方米建築面積標準。中央對住宅樓面限制既態度突然強硬，相信係今年中央政府面對樓市泡沫危機下，欲大力阻止既訊號。短期對內地房產股一定有影響，但措施如能遏止住樓市泡沫既出現，對我地小股民反而有利；

(4) 過去一年，大陸地產股升幅唔少，如果因此而能短期回落，反而提供左一個入市既機會。大陸地產股升起上黎唔係人咁品，因此高追好易領野，反而耐心一D較低吸納，盈利值博率更佳；

(5) 而家需要做好功課，了解大陸地產股同香港地產商北上之間既Market Segmentation，地盤點分，前景幾好，心中有數，等合適價位時入市。
大陸地產股：688, 813, 1109, 272, 3383, 754, 3900, 2777
香港地產商：16, 101, 12, 83, 17
李家天下既股票(001)一定可以不理，因為永無益小股東，呢果係我既偏見。

(6) 大陸地產股整體行業既平均邊際利潤率有 21.2%，唔少過去幾年係高速增長中。要發掘 Peter Lynch 所講既明星成長股，大陸地產股係一個選擇，而且有往績可循。相比之下，五行三保剛上市不久，喪炒概念及將來可能﹝或者唔可能﹞出現既巨大盈利，其實低吸就可以，位高一定勢危。

多做功課、少看升跌，應該有益身心，啟智明慧。

歲晚收爐

仲有五個禮拜至過年，我己經覺得個市接近歲晚收爐既格局。上上落落，大勢應該沽低個市，間中反彈，又步步低收，先至符合股市既邏輯。大陸春節大過天，A股係時候Time-Out。

今日陸羽仁篇大作「賭不賭這一鋪？」(click to see) 深得我心，有益讀物，向各股友特別推介。

大家樂(341)勢如破竹咁升到14.12 (+4.13%)，唯有先觀望一下再算；但首都機場(694)開始回順至6.04 (-3.05%)，互相抵消。組合整體變化不大。

今日以8.22買入6,000股華潤置地(1109)，收市8.16。華潤置地以北京房地產為主，希望08奧運帶旺地產。惠理基金(Value Partner)持有6%。近日由高位9.84回落，短線可博反彈5%至8.60 (20天線) 甚至15%至 9.50 (保力加通道頂)；是否長期持有要視乎市況而定。

準備換馬

1月11日，星期四。市續跌。股民開始要習慣原來個市真係會跌既，特別有平安(2318)同國壽(2628)兩個人辦不斷向下插。有大行道富開始預期整固數月，又話發覺07年首兩日內200億資金急流走。有咁既口術出街，我開始覺得個市好玩！

夫，股市者，上上落落也！莫謂回調何日看，如今有落終始見！

跌市對我既BLOG上組合無大影響，在大家樂(341)領軍下，微升至賺 34,160 (7.36%)。但我有新的想法了，我打算沽清各股換馬。理由？

(1) 我無耐性！弱勢股組合需要較多時間去升，目前組合升左7.36%，如想升到15%-20%，可能要到三月底。但我又覺得場內其他強勢組合的潛力可能更大，趁調整入貨是良機。例如國內地產股、及國內消費股。

(2) 組合內大家樂已升穿所有平均線，而首都機場已在 6.30橫行，組合短期內可能暫時無力再去。

(3) 國企成份股跌市中牛熊共舞，由最佳的中海集運 (2866)升4.39% 到最差的大唐發電(991)跌6.43%都在一天，造就了選擇性的入市良機。跌市中入到平貨賺個5%-7%反彈，非常和味，風險比升市中高價追貨低得多，我好中意呢種 Operation。心目中想買華潤置地(1109)。

睇多一兩日，見步行步。

保守定進取？

1月10日，週三，市續跌。恆指仍在19,568水平未補裂口位 (19,300)，國企指數9649開始補緊上升裂口 (9,600)。又一個640億的大成交。明天續跌機會較大。

跌市中我的落後組合發揮了防衛功能，保持不跌。仍然停留在微賺6.65%水平，繼續持有。大家樂(341)較強勢收13.42，創科(669)則仍被大行在窄幅中舞上舞落，收10.22，但其實己逐步企在10天線(10.18)及20天線(10.21)之上，假若升穿50天線(10.91)，有望重回12.50水平。繼續Wait n See！

行山。問道於PC，07年保守定進取？ PC屈指一算，提出了一個保守中有進取之組合，供各股友參考：

宣言及信念 (Mission & Vision)：乘著07/08內地經濟發展、世界資金湧華、以及北京奧運的勢頭，參與祖國資本市場建設的宏願
核心價值 (Core Value)：07/08為牛熊共舞之世代，以保守中有進取之策略回應是其時也
投資額﹝假設﹞：100萬﹝各人可按所需依比例調大調小﹞
總回報目標：增長60%﹝160萬﹞
總投資期：2007年1月至2008年9月﹝共21個月﹞

組合內容建議：共6隻股﹝3藍籌、3國企﹞
(A) 50%買3藍籌，回報目標：總增長20%
匯豐(5)： 140元以下買入
宏利(945)： 260元以下買入
港交所(388)： 70元以下買入
(B) 50%買3國企，回報目標：總增長100%
平安(2318)： 30元以下買入 OR 國壽(2628)： 20元以下買入
交通銀行(3328)： 7.00元以下買入
首都機場(694)： 6.00元以下買入

運作策略：A組具保守功能，提供穩定增長；B組有進取能力，提供總回報目標之收盈。總投資期內，無視市況波動。總投資期內遇有暴升而突然提早達標，馬上全線撤退，保存利潤，功成身退；總投資期內遇有暴跌，不設止蝕，長期持有。

對上述方案，各股友誰願一試？


回應 DW：

股市波幅、經濟週期，應該投資者預期之內。因此匯豐15%回報之言，應以5至10年平均回報率理解，打工之穩定出糧和股市回報之不穩定，當然不可相提並論。但由於長期而言，股市趨勢仍是向上的，因此可作Analogy的說法。實際操作當然不能一年好市食燕窩，一年跌市食腸粉。一般做法是撥備一筆足夠全家一年生活的Cash食用，其餘投資，股市波幅升跌都不理會；保守一點者可撥備一筆足夠全家三年生活的Cash備用。絕大部份股災不會長過三年，所以可安然渡過經濟逆境。

至於你提出將資本一分為二之法，我也覺得可行，但紀律是決定成敗之要素，其次不能要求每次以一年為一個買賣週期，要隨時有面向逆市的心態。可參考1月11日之另文：保守定進取？

至於創科(669)，我仍樂觀，因為股價衰到貼地，乜都反映左啦！係米！？

耐心等候入貨

今日國壽(2628) 國內A股以雙倍價超過40蚊上市，其他A股升勢遍地開花；香港則以五行三保領軍，跌勢頭昏眼花。此花不同彼花，A-H股聯動效應之神話正式破滅，理性及價值重新 Prevail！遙想當日搶上50大元的平安保險(2318)，今朝39蚊隨時都村長叫女---你愛…！

跟PC及SK吃過美味既魚柳午餐，下午三點半獨自入左灣仔間交通銀行巡視業務，我係交行(3328)既股東黎架！場中只見四部報價機被三十多個師奶及麻甩佬圍住，熱氣騰騰，各人運指如飛，大利是畫面隨著舞動生姿，對老花眼睇慢一D都走寶。

我專程想睇睇呢班街坊股神今日炒乜?。座中各股神有人炒煤輪 (7826, 7827…)、有人炒芯輪 (9678, 9690…)、有人炒壽輪(3493, 4884…)、有人炒銀輪 (3750, 6011..)，總而言之，乜輪都炒啦！我嘗試用高D層次既「同理心」去Feel下現場既感覺，的而且確係好High，同閉門個人獨炒係兩回事〔雖然我只係投資，而唔係炒股〕。

隔遠個肥師奶迫唔入股神堆，唯有隔遠大聲問人：「而家幾點呀？」
有個男人即刻應：「而家三點半。」
肥師奶再高八度大聲D問：「而家跌左幾多點呀？」
個男人知衰即刻大叫「梳利」，然後好清楚同好尊敬咁答：「而家跌左140點啦！」
股神堆中即刻人聲沸騰，有D哎唷連聲，有D眉飛色舞，最清楚同大聲個把女人聲係話：「?家鏟，果個大摩成日唱衰曬，應該拉去打把！」
我念念不忘果個咁有修養既男人，睇下佢係乜水？
「哦！原來係制服整齊既交行〈食蕉〉大哥！」
〈食蕉〉唔止可以捉打?銀行既鴛鴦大盜，仲可以同肥師奶股神做即場「人肉報價機」添！
我既交行能夠提供到咁優質同咁與時並進既服務，我睇好佢！ Ichi Ban！
3328，入貨！

講番我個Blog上組合，幾好播！升市我無賺死，跌市我又無蝕死。一如我所料，大家樂(341)收13.22同創科 (669)收10.40，都無兩日就齊齊反彈，爛銅股江西銅 (358)收7.58都轉身向上，首都機場(694)仍然炒A股上市同?運概念，企硬6.31水平。成果組合開始浮現逢勃既生氣。組合目前成績賺 30,370 (升6.54%)，繼續持有。

現時耐心等候入市機會，仍然保持跌市看法，等恆指跌到19,300及國企指數跌到9,600補回上升裂口再算。今日大成交627億，似乎向下跌的動力大D。

主動定被動策略？

仲稔緊，今年做 Passive Investor 定 Active Investor 好。

如果Passive Approach就集中買匯豐(005)同宏利(945)獨沽兩味長期持有，唔使睇市，日日遊山玩水兼吹水即可。2007年匯豐應在140到160蚊之間上落，宏利就在260到300蚊之間上落，波幅約15%。即是話賺15%，Almost Sure Win！投資100萬就賺15萬，每月賺12,500，等於或多過初出矛盧既大學生每月既人工。咁易既事，你稔唔稔稔佢？

Active Approach就日日研究各行業，低買高賣，成年炒炒賣賣，年尾結數論英雄，可能賺10%，可能賺30%，可能賺50%，可能賺70%，可能翻一翻，可能仆街！咁既事，你又稔唔稔稔佢？

我仲稔緊，可能結果係Mixed Approach。

唉！做人永遠係咁，多稔野，稔多野，稔野多，多多野稔，稔多餘野，有時係美德，有時亦係缺點！


回應 DW：

股市波幅、經濟週期，應該投資者預期之內。因此匯豐15%回報之言，應以5至10年平均回報率理解，打工之穩定出糧和股市回報之不穩定，當然不可相提並論。但由於長期而言，股市趨勢仍是向上的，因此可作Analogy的說法。實際操作當然不能一年好市食燕窩，一年跌市食腸粉。一般做法是撥備一筆足夠全家一年生活的Cash食用，其餘投資，股市波幅升跌都不理會；保守一點者可撥備一筆足夠全家三年生活的Cash備用。絕大部份股災不會長過三年，所以可安然渡過經濟逆境。

至於你提出將資本一分為二之法，我也覺得可行，但紀律是決定成敗之要素，其次不能要求每次以一年為一個買賣週期，要隨時有面向逆市的心態。可參考1月11日之另文：保守定進取？

至於創科(669)，我仍樂觀，因為股價衰到貼地，乜都反映左啦！係米！？

2007 年旺邊行？

今朝全線下跌，恆指跌207點到20,004 (-1.02%)，國企指數跌286點到9,949 點(-2.79%)，仍然是國企股跌得比恆指股更勁，五行三保風光不再，低位入貨者盈利縮水，高價追貨者中招受困。但大家有無觀察到，而家指數升降幾百點好鬼容易，幕後黑手﹝如果有既話﹞支指棒揮好鬼靈。點解？我估市場一窩蜂既散戶仲好多，見股升就追，大戶將骨頭一拋，散戶們就好似D可愛既狗仔咁追追逐逐，個市變得好聽話，升降機按上落制咁易。

Philip A. Fisher 佢老人家講得無錯，股市狂熱扭曲目前的價格相對於實質價值的關係，金融圈對個股估值往往與事實不符﹝故意居多，好多擺明有利益衝突﹞，價格長期遠高於它的實質價值的股票總要爆破。歸根到底，一間公司既股價有獲利能力支持好緊要，偏離盈利太多一定無道理 (2318, 2628, 2328…)，大行點唱都應該唔好同佢一齊癲，適當時候離一離場，沖返個冷水涼！

其實，當你發覺市場內太多隻日日升既好股而自已唔夠錢全部都買，個市應該好快玩完﹝或者要叫 Time-Out﹞。因為，當 Cash Is King 變? Cash Is Shit 既時候，就好易會用 Cash買左D Shit 返黎。

而家個市既變化，令我對2007年既投資策略開始形成以下既初步想法：

(1) 花無百日紅，2006年下半年炒中資金融股炒到出曬界，五行三保相信仲要跌多20%到30%至可以再炒上，回調亦係一個大戶引散戶再次入場派貨既策略﹝仲記唔記得D大行入貨既水平？﹞。而家水平仲係無盈利支持既價位，2007年炒中資金融股係炒上落波幅，低買高賣，唔再係2006年炒坐火箭鬥快上車；

(2) 曹仁超講既 Rotation Buy (Click to See Article)我同意！大行聰明錢開始流向其他行業，股市走在經濟前面半年，半年後內地旺邊行？目前大陸GDP年年升，人有錢左解決衣食後，就係住行同消費。因此我估房地產、汔車、電訊同消費品既別既股份會較好，建材好似鋼同水泥都有利。即是話應該留意一下以下既股份：

1. 房地產 (688, 813, 1109, 3383, 3900, 2777, 272)
2. 汔車 (2333, 203, 489)
3. 電訊 (941, 728)
4. 消費品 (2319, 304)
5. 建材 (347, 323, 914)

(3) 落後既優質股，由於有實質盈利支持，2007年應有合理升幅 (10%-20%)：

1. 大藍籌 (5, 945)
2. 熱門增長股 (330, 494,303)
3. 二三線 (669, 341)

(4) 市場獨佔股： (388)

(5) 如整體市況回調至合理水平，可考慮反映市場的指數ETF：

1. 恆生指數 ETF (2833)
2. 恆生H股 ETF (2828)
3. A50中國基金 (2823)
4. 盈富基金 (2800)

暫時稔到咁多，待仔細研究一下個別股份於2007年既前景，再收窄範圍集中火力。集中係最大既挑戰，樣樣都買成績多數麻麻，要觀察多D時間再算。

Philip A Fisher開講

巴菲特 (Warren Buffett)成為股神之路，佢話其中30%既選股心法來自Philip A. Fisher，另外70%當然來自佢師父Benjamin Graham 既理念 Margin of Safety。巴菲特一睇完Philip A. Fisher本書 “Common Stocks and Uncommon Profits”就馬上上門請佢當面賜教，過完一輪招後，不禁大讚Fisher既理念令人折服，有助於一個人可以徹底了解股票呢一行，做個聰明既投資決定。

舊年我就睇左呢本書，但發覺到而家仲未變聰明！今朝惟有又再翻睇一次，希望對2007年既投資策略有所啟示。果然，真係有料到！佢老人家響1957年講既野〔1957年怕且你可能仲未出世添〕，真係今日仲係一模一樣發生響香港！本書咁長，你有興趣自己睇到夠〔大陸版叫「怎樣選擇成長股」賣19.80，抵到爛〕，但有幾點﹝其實好多點﹞值得同各股友分享！

(1) 「投資想賺大錢必須有耐性」呢句話，經己被我Quote左做本Blog既開場金句，作用係可以提升本Blog既品味，省靚本Blog既招牌，引發智慧既思考，同埋吸引及聚集一D高質素既投資者﹝好似各位咁﹞作分享交流；

(2) 股票市場本質上有欺騙投資人既特性，跟隨其他每個人當時在做的事去做，事後往往證明是錯的；

(3) 市場資訊泛濫，貼士滿天，無數小額投資人無意中吸收了各式各樣的想法和投資觀念，但多年下來，已證明代價太過昂貴！原因是他們從來沒有面對更根本性的觀念挑戰；

(4) 投資人五不原則：
1. 不買處於創業階段的公司，例如新產品、上市新股(IPO)等；
2. 不要忽略一些Over-the-counter的好股票，香港類似性質我估係創業板；
3. 不要因為喜歡某公司年報的格調就去買它﹝如果你買股票只睇報紙貼士而唔會研究公司年報，咁呢點可以不理啦﹞；
4. 不要以為一公司的P/E高，就表示未來盈餘成長己大致反映在價格上。未必，主要睇內在價值才能分析股票是便獲利能力宜還是貴；
5. 買賣時不要斤斤計較些少價位，否則可能失去很多時機。

(5) 一間公司的獲利能力好緊要，投資回報率(Return Of Equity)同銷售利潤率(Profit Margin)同樣要睇。但從投資安全性的觀點而言，後者更為重要。因為面對競爭時，一間公司能夠提升2%-3%的Profit Margin，就足以救命及淘汰對手；

(6) 股市內有流行，有狂熱，一如時裝。這些流行和狂熱可能幾年一次，扭曲目前的價格相對於實質價值的關係。2000年科技股和最近的「五行三保」是例子；

(7) 金融界在不同的時間，喜惡不斷變動，相同的事實卻有不一樣的解讀方式。所以大行經常一些唱好，一些唱淡。聰明的投資人想要入市，必須能夠獨立思考，在絕大部分人的意見偏向某一邊時，仍能確定何者是會持續下去的基本因素及趨勢，何者只是一時的狂熱；

(8) 導致股票價格短期急漲的原因，說穿了相當簡單！每次價格大幅波動，都是因為金融圈對那隻股票的評價發生變化。由於金融圈的評價往往與事實不符，一隻股票的價格可能長期遠高於或遠低於它的實質價值。這可能持續好幾年的時間，不過泡沫總會破掉，有時幾個月，有時則在很久之後；

(9) 幸運的投資人，不因為股價開始上漲而沽出，反而繼續持有，也就能相對於股市有關的風險中，獲得最大的報酬；

(10) 當每股盈利(EPS)穩定攀升，以及市盈率(P/E)同時急劇上揚，在兩者共同作用下，股價將大幅上漲。而導至股價上漲的因素中，P/E上升往往比EPS實際上升更重要！ (因為EPS係公司既實際盈利，而P/E或預期P/E只係D大行靠估，信口開河，如果P/E估高一、兩倍，目標價隨時可以估高幾蚊，引班散戶入局！

明白左呢點，你會更加「體諒」大摩、高盛、瑞信、美林等等大行點解日日講野反口覆舌，今日升市就話目標價5.80叫買入，第朝跌市就話目標價3.40落後大市叫沽出。無他，佢地拿住個預期EPS同埋預期P/E兩樣野，乘來乘去，幾多個組合高高低低都可以變出啦，如果唔係，點可以日日吹水但永遠無錯？只要稍稍調高或調低2007及2008既預期盈利(EPS)或預期市盈率(P/E)，就死都?返生啦！

各位股友，你話信睇報紙D大行貼士同目標價入貨，係咪好鬼牙煙先？咁，﹝細細聲問啦﹞你有無試過睇大行D報告同推介去買貨呢？

Philip A. Fisher本書真係好正，如果放左工仲有精神，睇佢既得益應該多過日日睇報紙既貼士分析。點都要自己先有返一套心法﹝少林也好、武當也好﹞，至可以唔使在股海中隨波逐流，人云亦云，成日俾D講野反口覆舌既大行推介老點！