情人節做乜好？ (265)

情人節做乜好？我真係唔識答你！甲話：「我返緊工，唔得閑稔 D 咁既野！」乙話：「情人節？我無左 Feel 好耐啦！」丙話：「我等緊收花！」丁話：「情人？乜野黎架？」亞戊話：「D 花千幾銀一札，買麵粉好過！我整緊餅！ D 年糕仲未食完！」我話：「唉！情人節 --- 我無使錢好耐啦！」

但係大市咁跌法，橫店身家都係縮緊水，不如趁情人節做做善事啦！一方面可以幫幫 D 有急切需要既人，另一方面亦可以幫我 D 情人積積福！我仲係相信福有攸歸、善有善報架！〔唔好笑啦！〕股市投資我未有善報，只係時辰未到！

打開我既「可持續發展」既捐款名單，終於決定捐款俾「中國雪災」同「小扁擔勵學行動」，前者救急扶危爭分奪秒，後者係中大校友自發既中國貧窮農村助學工作，參與者全義務無償付出，出錢出力，善款 100% 到位，唔會有貪污及中飽私囊既野！奈何我最近比較水緊，只可以捐少少了！不過古語有云：「莫謂善小而不為」，我相信捐款多少，積福果效都可以一樣咁大！

我打算能力所及既話，每月都會捐少少既！舊年 11 月捐左樂施會、12 月捐左奧比斯同中國農村助養、1 月捐左宣明會助養、而家 2 月捐左中國雪災同小扁擔勵學。我覺得用「可持續捐款」既方式去幫我 D 情人積積福，祝願大家身体健康、財源廣進、萬事順境，係唔係比用千幾銀特別於情人節買一札紅玫瑰既「積福果效」更加「可持續」同「更加大」呢？

話時話，而家社聯仲推出左個 WiseGiving 既捐款網站，方便 D 善長仁翁唔止炒股投資要 Intelligent，捐款 Giving 亦要 Wise 咁話！

願你同你既情人在情人節都行行善、積積福，幫幫 D 有急切需要既人！古語雖然有云：「天若有情天亦老」，我但願天下有情人於行善積福之後，都能青春常註、永遠美麗及永遠無老〔唔係無腦〕！