回顧第一炒 (268)

回顧 7 Jan 2008 「零八第一炒 (242)」所言，當時我希望於零八年的一、二月，在 26,000 ~ 29,500 的水平作一些短炒 〔3 ~ 12 日的 in & out trading〕，謀取約 10% 的利潤。如今到了二月底回顧，證明是徹底失敗之作！

失敗原因起碼包括了：

(1) 當時我預料大市會在 26,000 ~ 29,500 的水平上落，結果大市一瀉千里，證明我完全估錯！估錯自然買錯，買錯自然失敗 〔失敗自然是將來的成功之母〕！

(2) 我要「作一些短炒」，即是講明要「主觀」先行，自以為在 3 ~ 12 日內就可以得手成事，無視大市走勢往往可以出人意表的反覆，正正中了「財不入急門」之毒咒；

(3) 我以為自已好炒得〔好似林鄭月娥咁好打得〕，結果下場亦好似林鄭月娥咁要走出來澄清「佢唔係真係好打得」〔只係 Bow Tie 曾 亂嗡靠害〕！ 我亦要走出來澄清「我唔係真係好炒得」〔只係自已思覺輕微失調左一陣靠害〕！

呢個用血汗錢編寫出來既故事教訓我地：(1) 唔好估；(2) 唔好炒；(3) 要知自已真係唔係好得！

個故事當然仍未收科，我依 24 Jan 2008 的 「紀律第一 (256)」 所言要作救亡，「趁今次回升重整 Stock 及 Cash 比例」以及「嚴格保持起碼 30% Cash 作操作上的平衡點」。

趁二月中反彈，我以 5.27 及 5.38 沽清工商銀行 (1398)，微蝕 1%；於 140 元先沽出 1,000 股 H-ETF (2828) 減磅〔若跌至 125 元則補回〕；以 15.12 沽清「首域新興市場領先基金」；以 7.4283 沽出部份「宏利中華威力基金」等套現。

經重整後，目前 Cash 回復到 30% 的水平！後市假若再跌至 21,000 水平或以下，跌市尾段出現「恐慌性沽售」的入市良機，會考慮再行入市，拉低平均成本。