Thursday, April 26, 2007

回顧及更新 (117)

回顧過去五個月共 116 個 Blog 既 Update 如下:

(1) 大眾金融 (626) 係隻業積平平,但一年升兩次左右既悶股。一月中由 6.70 高位回落 6.00 橫行左三個月,現價 5.92。可於 5.70 至 5.90 之間小注博升,目標價 6.70 (升 13.5 %);

(2) 彼德林治 (Peter Lynch) 認為,任何公司的合理本益比(市盈率, P/E),都會等於它的盈利成長率 (EPS growth),如果以盈利成長率除以市盈率,數值小於 1 那就不理想,如果是 1.5 的話還可以,你真正要找的是數值大於2的股票。以下股票 Lynch Ratio 是數值大於 2 的:
建滔 (148) – 32.15
江西銅 (358) – 18.75
太古B (87) – 12.68
中鋁 (2600) – 8.53
蒙牛 (2319) – 4.35
中海油 (883) – 4.1
安莉芳 (1388) – 3.22
永恩 (210) – 2.94
中石油 (857) – 2.82
上海置業 (1207) – 2.63
福記 (1175) – 2.32
國壽 (2628) – 2.12
渣打 (2888) – 1.72 (尚可)
交通銀行 (3328) – 1.71 (尚可)

(3) David Webb 去年聖誕推介既「每年一股」順龍 (361) 己歸於平淡,當日由 0.87 幾日間炒上 1.18 升 35.6%,如今又跌回 0.90! David Webb 仲 Hold 住 6.02% 即 1,820 萬股無放。有膽既可於 0.90 下入貨,我估聖誕前會再炒下一轉,到時自已執生於 1.15 左右沽貨鬆人;

(4) 去年 22/12 建議於 7.65 至 7.80 買入江西銅 (358),持有三個月,目標價 10.00 到 11.30,現已到價。近日並由高位 12.52 回落到今日收市 11.00,又傳首季純利倒跌 8%,技術走勢兩日出現十字星,有機會急跌。江西銅乃優質股,可續持有,但要明白金屬週期股特性會大上大落,如不願見位高勢危,可考慮先於現價套利,待回落至 9.50 左右再補回;

(5) 大跌市時一定兵荒馬亂,好易買錯,可考慮到時只買入 ETF,簡單直接:A50中國基金 (2823)、恆生H股ETF (2828) 或 招商局中國基金 (133),靜待暴風雨後回升;

(6) 杜氏理論 (Dow Theory) 用股息去判斷牛市到頂未或熊市到底未,其中一個方法就是看股市整體派息率 (Dividend Yield),當股市整體派息率跌到 3%,牛市將會終結,股市整體派息率升到8%,熊市即將完結。恆生指數 2007 年 1 月至 3 月的整體派息率己分別跌至 2.67%、2.73% 及 2.90%,而國企指數1月至3月的整體派息率己分別跌至 1.44%、 1.49% 及1.63%,有貨者應要打醒精神了!

(7) 各指數若果偏離 250 天平均線達 30% ,則暴風雨隨時出現!現時如下:

冷靜者勝、善忘者否 (116)

尋日因為貪心而引至做左今年最蠢既事,過早買入永恩 (210),貪字變貧,今日深切反省,得出以下幾點結論:

(1) 市場先生今日所講「與其磨爛蓆, 不如退而結網」既竟然正正係我所想 (Click to View),因此從今開始,以後會減少寫 Blog 既次數 〔況且寫 Blog 至今達 116 個,都只係自言自語、自得其樂、自食其果、自生自滅,也從未見各股友有乜回應或分享,未知 PC 是否同意,係時候幫呢個 Blog 寫番個墓誌銘呢?〕;

(2) 「冷靜者勝、善忘者否」。為此,我將過去既 115 個 Blog 印左 Hard Copy 出來做身邊既備忘錄,善忘令我貪心,善忘令我犯錯,備忘錄可助我尋回冷靜,做出正確既判斷;

(3) 「慢比快好、靜較動佳」;

(4) 「我行我素,股市必須」!

(5) 人必須趁在世時多去遊山玩水;

(6) 不能從股市賺太多,否則死後好易出現小甜甜之類既爭產案!

(7) 「秦時明月漢時關,萬里長征人未還!」

Tuesday, April 24, 2007

永恩國際 (115)

「恆指國指兩無波,成交淡靜不見多;玉女穿梭高探馬,轉身擺蓮虎歸山。」

本應係牛皮既一日,但永恩國際 (210) 異常狂趺 - 27.9%,由尋日 9.35 收市價趺到今日 6.74 收市價,趺左 2.61,市值一下就消失左 43 億

永恩國際唔係雞股狗股,係非常正常股,主要於中國從事鞋類產品製造及分銷之業務,出口市場主要為美國。剛公布截至去年底止年度業績,錄得純利2.92億元,按年增長15%,每股盈利17.8仙,末期息維持2.5仙。期內營業額30.93億元,升18%。過去五年年年賺錢又增長,EPS 係 1.73仙 (02)、5.51仙 (03)、11.33仙 (04)、15.72仙 (05),剛公佈係17.8仙 (06)。

19/1/07 花旗調高永恩國際06-08年盈利預測3-6%,目標價調高至9.5港元;
7/2/07 道亨證券重申「買入」評級, 6個月目標價9.8港元;
16/4/07摩通維持永恩「增持」評級,目標價調高至12元;
17/4/07麥格理證券首次給予永恩""跑贏大市""評級,目標為10.97港元。

財務比率亦合理,邊際利潤率 9.71% 算 OK 啦,資產回報 17.75%,股東權益回報 34.21%,流動比率 169.91%,市盈率就高 D 有 42.88,但內地消費股高 P/E 係可接受,而且過去四年既 EPS Growth 平均有 94%, 即是話 P/E to Growth Ratio (PEG) 都只不過係 0.47,低於 1 即係好野,表示股票有高盈利增長,係可以 Support 到高 P/E 既!

跌到咁急咁猛,平均日成交都只不過係 3.46 百萬股,今日係 6.87 千萬股,係 20 倍成交量。唯一理由係過去 52 週由 4.025 炒上 9.80,有大戶賺夠大大手沽貨套現。不過無需一日內插得咁急咁猛丫!

我認為永恩會好快反彈,因為跌得太過份!但各位股友千祈米去博反彈,因為 6.74 低處未算低,除非跌到 4 蚊,就不妨一博。

我今日 7.25 買左 10,000 股博反彈,收市經已被綁!

Thursday, April 19, 2007

腦震盪 (114)

今日趺 477 點,成交接近 630 億,好濕碎,恆指其實仲接近在 20,300 點,我認為起碼跌多 2,000 點到 18,300 點,先至算調整! 我長期 Monitor 住既 50 隻股票,隻隻仲係算貴,可以勉強買得落手既都無三隻,匯豐 (5) 勉強算係其中之一,但以今日 143.20 買入,如果唔係好似沙地阿拉伯富商 Maan Al-Sanea 睇咁長線,又無需而家入貨。風大雨大,Hold 住 Cash 睇定 D,只有錯過,實無過錯!

我認為而家最好做下腦震盪, 題目係:跌到 18,300 點,你會買乜?我先拋磚引玉:

(A) 恆指跌到18,300 點或以下時〔但仍是牛市第三期〕,可以考慮:
買匯豐 (5); 或買思捷 (330);或買利豐 (494)。

(B) 國指跌到8,000 點或以下時〔但仍是牛市第三期〕,可以考慮:
買平安 (2318); 或買招行 (3968);或買入 2 隻內地消費股,例如蒙牛 (2319)、百盛 (3368)、恆安 (1044)、 福記 (1175); 或買 A50 指數 ETF (2823)。

(C) 恆指跌到18,300 點或以下 AND國指跌到8,000 點或以下時〔牛市第三期玩完〕:
全線沽貨,Hold Cash,可以考慮:買跑馬地或太古城或中上環 500 呎物業收租; 或買地鋪收租;或炒賣豪宅例如加洲豪園、錦綉花園。但需要先等足一至兩年,等恆指跌定〔可能到 12,000 點〕,樓市死氣沉沉,人人愁眉苦臉之時,才好出擊!

腦震盪即係腦震盪,唔好問有無可能!問就表示你唔識玩腦震盪!

今日剛由中山温泉玩完返來,$ 299 全包宴坐船來回兩天一夜五星級温泉酒店食足四餐,淡季東瀛遊抵到爛。導遊講左好多古仔,而家好無記性,印象較深刻係以下兩則,分享分享:

〔一〕 石歧有乜好玩?
「石歧好好玩,十二點鐘有炮打!」
〔二〕 中山著名水果多,最正係邊 D ?
「柑」「蕉」「桔」「李」「蘿柚」!

Tuesday, April 17, 2007

有錢人買股票 (113)

我地自已股市中賺唔到錢,就成日賴大戶炒作。有錢人買股票同我地 D 窮鬼買股票有乜分別? 有!最大分別係有錢人見到平價就買,而且大大手咁買;我地 D 窮鬼見到平價就驚,唔敢買,又唔用膽,又唔用腦,又要怪人。

例子:我於2007年3月1日 〔Blog 84〕就分享話,135 蚊以下可以買匯豐長期持有啦,未知各位股友有邊位當時敢做呢?〔當時 133 蚊以下都可以買到匯豐啦〕。

實情:全球富豪排名榜第九十七位的沙地阿拉伯富商 Maan Al-Sanea 透露,自美國發生次級按揭風波,令匯豐控股股價受壓後,Maan Al-Sanea 便從2月中開始吸納匯豐控股,共斥 514.8 億元購入 3.1% 匯豐控股成第二大股東〔2月中時匯豐股價仲係 140 蚊〕。
Click to View: 耀才網按【5】找匯豐控股,再按 17/4 相關新聞;或看 AAStock News

而家匯豐股價係 143.4,咁你認為算平定算貴呢?

入貨機會 (112)

每日注視股價上落,好易會被吸引去做買賣;每日睇財經報,好易會相信左 D財經演員同講股佬﹝婆﹞既分析〔除非你好似我咁,天生本質就係一個硬頸及牛脾氣既人,咁就易 D 經常「堅持已見」及「擇善固執」及「死不認錯」〕,否則在眾聲喧嘩既股海中,要做到有獨立思考既投資行為,係好困難及非常孤獨既事。呢幾日升市,我故意兩日唔睇財經報,避開所有 D 教你發達既貼士,等個腦自已可以 Work 下。



從過去三年恆指50 週平均線圖所見,當恆指趺回50 週平均線時,就是入貨良機;當恆指偏離50 週平均線約 30% 時,就是沾貨時刻!這個波幅,足夠令你財富於一買一賣中升 50% 到 100%,而這種機會係每年起碼一次。自 2004 年中確認牛市後,恆指趺回50 週平均線先後於 04 年 11 月、05 年 10 月、 06 年 6 月出現,換言之,每年只需要於當時買入一次,便可安心等待財富升值。這種是 Sure Win 及安全投資方法,亦可套用於個股中使用。今日既50 週平均線係 18,308,接近我經常講既 18,000 點入貨論點。



國企大同小異,出現趺回50 週平均線次數仲多,分別於04 年 11 月、05 年 5 月、10 月、 及06 年 6 月出現。

致富機會其實年年有,欠缺既係我地既視野、判斷及耐性。所以話,財不入急門,真係有道理既!

除左核心組合及 Blog 上組合既 1888 外,我已沽清手上股票,增持現金,靜待下一次恆指趺回50 週平均線時既入貨機會,我相信一定要配合以下一些既事件出現,條件才較成熟: (a) 大陸 A 股爆破;或 (b) 加息;或 (c) 美國次按風波擴大;(d) 資金流走。

股災指標 (111)

陸羽仁篇文 (Click to View),講解個市炒返上 20,758 點既理由,你可信可不信,但一定要睇睇!

錢可通本書「我如何在股票市場賺到第一個 1,000 萬」提到股災既原因,一定由於炒過龍〔當然係大戶人為架啦〕。一個有力既指標係當指數偏離 250 天平均線約莫 30% 左右,就係可能爆煲之時!呢個 30% 係觀察過往多次股災所總結出來,唔係錢可通自已靠車既。



恆指偏離 250 天平均線 30% 即係 23,500 點左右,仲有 2,700 點可升;但而家三個指數中,有兩個〔國指及紅籌指數〕經已係 23% 及 22%,其實再升三、五十點就經已 30%。如此這般,個市〔特別係呢幾日升得最靚既國企及紅籌〕隨時有權爆煲!

今日成交高達 643 億,你話 D 大戶在入貨定出貨呢?

傳統智慧話,升市加大成交,可以追貨!買入!你估D 大戶想你追貨買入,定係想你出貨呢?

Saturday, April 14, 2007

牛市第三期? (110)

PC 問,做乜咁耐唔寫 Blog? 我苦笑:「最近唔知寫乜!」近來個市在人人唔睇好之下急速反彈,經己企回 20,341 點,正係可升可跌,危機重重。我仍然認為,個市要跌返去 18,000 點至好入貨,我要 Sure Win,唔想博大細。但呢種市好合冒險家,大膽者可盲炒窩輪仙股〔我當然唔主張〕,中膽者可喪炒國企業積,細膽者可小炒優質波幅股,無膽者可去炒蝦擦蟹但唔入市,反而逐步沽貨增持現金。

你係乜 Size 膽呢?你估我又係乜 Size 膽呢?尋日沽出於 777 跌市日以 208 蚊買入既 300 股渣打 (2888) ,成交 229.80,獲利 6,540 ( +10.48%)。

ES 既一席話令我深思左好耐,佢所講既野基本上離唔開 Buffettology,知識上我完全明白,但從一個經歷左七次香港股災既人口中聽番,滋味曉是不同!自從 2003 年 8,331 點升市以來,升到今日20,341 點,經己四年,升幅係 144% 〔另一種叫法叫做升左 2.44 倍〕,即平均每年升 36% 。好多人都認為而家係牛市第三期既尾聲,幾年一次既股災好快又到〔前五次倒數係 2000、1997、1994、1990、1987〕,前五次股災平均都係三、四年一次,2003 年升到而家都四年啦,仲唔跌?就係因為 A 股喪炒港股就唔會跌? 係米無天理呀!

其實股市只要炒過龍、升過龍,唔使乜野理由,就終會一跌,假如未跌,只係時辰未到。Benjamin Graham、 Warren Buffett 及 Andre Kostolany 都係咁講! 唔少江湖中人都計算緊幾時跌、點樣跌,石鏡泉日日數浪,曹仁超危言四出,張公道評彈走勢,但因為佢地都知自己既預言可準可不準,個市依然日日可升可跌,因此我估一般讀者見到 D 文章都唔會認真睇。

我一向都藐視杜氏理論及數浪派,對許泝光既四度空間理論更避之則吉。但聽左 ES 既一席話,我忽然對牛市第三期好有興趣,因為我好想在熊市第一期既股災中能夠成功大執平貨,然後於下次牛市第三期沽清,呢 D 至係真正既大茶飯,要用三、五、七年至做一 Round,唔係日日想炒 Day-Trade 執三幾千。

但係 A 股爆破之日,是否港股股災之時? 真係唔知! 但係 PC 就話今年四、五、六月機會就到啦!

想在股災中牟利,要先操 Fit 心理,做定 Simulation,否則到時慌失失,最後唔知執吉定執骨! 錢可通本書【熊市股票大突圍】好有參考作用,但要改變觀念,又要接受牟利既沽貨工具〔如認沽期權〕,先要消化一下再算。如果用牛市第三期觀念重新表達我第一段講既說話,可能要改作以下咁講:

(A) 個市如果跌返落去 18,000 點,而又未跌穿 250天移動平均線,其他指標 〔參考:梁小鷹談技術分析 E投資精英匯集 第一講 怎樣找尋最佳入市機會 〕 又都配合,咁表示仍然只係牛市第三期既調整,咁就可以考慮入貨,個牛市仲會繼續升,可能升到 23,000 或 25,000 都未定;及

(B) 個市如果跌返落去 18,000 點,而又跌穿左 250天移動平均線,其他指標又都表示牛市第三期玩完,正式進入熊市第一期既股災,咁就有咁快得咁快沽清所有既貨〔如果在跌落去18,000 點途中你仲未清貨〕,個跌市仲會繼續跌,千祈千祈千祈米貪平溝貨,熊市股價低處未算低,香港過往七次股災跌幅係由 30% 到 95%,而熊市一般會維持一、兩年〔你自已睇睇恆指歷史圖表就知 : 按走勢圖〕。

2007 年唔知會開邊一瓣?

今日去元朗行街,俾我響間不知名叫長春藤既書局執到本我恨左兩年都唔捨得買既超級好書,就係中譯本 Benjamin Gramham 既 The Intelligent Investor!呢本書點勁? 簡單一句,你就明曬!巴菲特話佢之所以成為股神,就係因為睇過呢本書!That’s It! 中譯本三聯、商務、樂文等都賣 $169,英文 Paperback 起碼 $210,我響大會堂圖書館借過,但係只睇到一半又被人 Call 左去 Reserve,激死! 如今買到,心情似中左六合彩!幾銀? $ 17….!

法住學會又 Call 我去上堂,今期講論語、孟子、易經、儒學等,我好想去上堂,但如今念書真係會唔覺意上堂吊魚,醜死鬼!又怕無精神睇股票書,影響我既「事業」!不過,我都係始終中意國學,中國人一生中學一次四書五經,怕且都好合情合理掛!

星期日又去跑 10 Km 馬拉松,怕且又係半跑半行。趁好春光留倩影,人生跑得須去跑!願望是有生之年可以跑一次全馬 42 Km,不過,人生就係永恆既無奈,幾多過往既願望如今還不就是無奈吧!幾個月前在海怡碰到 VC 跑步,好 Fit 喎! 未知 VC 又有無跑 10 Km 馬拉松呢?

我既組合受 1888 所累,終於跑輸大市表現,惟有等!

Thursday, April 05, 2007

股壇前輩 (109)

尋日同 PC、 ES 及 BL 去赤柱岸邊 Bar 飲酒食飯吹水,兩杯紅酒生力落肚,大家講起投資之道。江湖中奇人異士真係唔少,原來 ES 係股壇老前輩,曾經親身見證 73 年由 1,700 點插到 180 點既股災,其後三十年間既牛市股災,一一身歷其境,並且對研究股市操作極有心得,又博覽羣書,有機會同咁既高人吹水,杯生力簡直飲落清香。見盡股海奸詐兇險、波譎奇詭既 ES,從來以巴菲特價值投資為尊,今時今日主張返樸歸真,亦用巴菲特既「有限入場論」〔即一世人買股好似打孔巴士票,只能有十次入場機會,每次買乜要非常非常審慎〕來形容佢現今既投資態度。長話短說,ES 既股票投資理念包括以下:

(1) 一買股入場, Time Frame 起碼要睇五年或者十年,才看收成。佢認為我經常講既每年 15% 及複式累積觀念於操作上唔妥,因為股市唔係每年平均咁線性升 10%,而係熊市衰五年然後牛市升三年,每年一定要爭取到 10% 回報,限制左個思想及操作方法,係好危險既事;

(2) 分析過去 50 年股市升降大約以 8 年為一週期,Smart Money 於牛市第一期悄悄入貨,於禾雀亂飛既牛市第三期清貨,在 Greed 及 Fear 既相反情緒下操作;

(3) 如果 Buy 既時候唔非常審慎,咁 Buy & Hold 只會令你成為市場中 85% 手持蟹貨「長線投資者俱樂部」既尊貴 VIP 會員;

(4) 99% 長期炒期指同窩輪既散戶係輸家,千祈米稔期指同窩輪;

(5) 如果你識得睇一間上市公司份年報既綜合現金流量表 (Consolidated Cash Flow Statement),呢個係照妖鏡,間公司既古惑盡在此中尋〔例如一間宣布賺錢但唔派息既公司,年尾既現金流仲少過年頭,你就要稔下佢賺既錢究竟去左邊,或者究竟係米督數作大盈利,根本 No Cash〕;

(6) Edwin Lefevre 本 “Reminiscences of a Stock Operator” 係股市第一奇書,要睇!〔大陸華安基金譯名《股票作手回憶錄》,定價 42 元〕;

(7) 95% 報紙講既消息、大行推介、TV 評論係 Bull Shit,係想引你去死既陷阱,你愈少睇愈好。歷史証明股市贏家係果 5% 能夠 Stay Away From Market 同媒介日日 Bull Shit 既人,輸家係果 95% 日日金睛火眼睇「曾Sir 廿八Show」同上網不斷睇「市場資訊」既人。巴菲特從來只靠直接睇年報、Visit 及觀察公司運作及 Management 質素;

(8) 但所有上市公司年報既數據都係 Historical,要 Project 將來,未必準;

(9) ES 心目中Management 質素較好既公司例子有利豐 (494) 及思捷 (330) 等。

除股票外,ES 反而認為可考慮買大陸樓,主要係廣州或上海,理由如下:

(1) 內地房產將來終會規範化,二手市場終會健康發展,趁早入市可著先機;

(2) 內地廣州或上海住屋有實質需求,今時廣州樓 $800/呎仍算平,十年後有升值兩倍以上空間,而今時廣州人均收入達 $3,000,十年內購買力終會追上樓價。只可考慮廣州或上海,因有百年文化及教育根基支持可持續發展,深圳係移民城市,工廠一旦北移到其他內地省份,深圳好易玩完,而家深圳因為過度投資,商廈己經 40% 空置,將來好快商品房都會出現,單靠港人投資既市場玩唔過;

(3) 人民幣升值及自由兌換,勢頭不會故,十年後好保守咁睇都會一對二港紙。

所以,如果今日買一個 100萬既廣州或上海既商品房,十年後升值兩倍,加上人民幣升值一倍,合共變左 600 萬,到時二手樓市場成熟,一定賣得出,更可自由兌換返港紙!

你有無可以投資十年既 100萬呢?磚頭可信性似乎比股票高 D,各位股友考慮下啦!

五日長假,行山跑步去也!

Wednesday, April 04, 2007

2007 --- Week 14 (108)



持久戰開始 (107)

今日往銀行取出永久組合既匯豐及宏利實貨,走去中央証券過戶處轉名,實行學習趙富翁世曾將 D 股票當作收藏品丟埋一便,唔緊唔緊,幾年後執番出黎,經已發左!既然趙富翁得米,跟住佢條水咁做怕無衰掛。而且,恆指升回 20,207,成交 506 億,表面向好,但我認為,持久戰開始了!

路過太原街昔日我博殺江湖既土發舊址,如今蛛網塵封,招牌糢糊,門口被攤檔霸佔,破落殘爛,不勝唏噓!憶起名句:「鳳凰臺上鳳凰游,鳳去樓空江自流!」人去樓空,彷似眼前。去歲經長沙湘江,憶及毛主席《沁園春 長沙》名句:「獨立寒秋,湘江北去,橘子洲頭。看萬山紅遍,層林盡染;漫江碧透,百舸爭流。鷹擊長空,魚翔淺底,萬類霜天競自由。」何等氣魄!何等英雄!但眼前明明污煙障氣,滿天迷塵,百尺難視,遑論漫江碧透矣!概感道如人生,桃花依舊,人面相映,道可道,非常道。眼前萬物,彷似照見五蘊皆空,但我仍信,色即是空,而空不是色,人生可一切有為法,如夢幻泡影,如露亦如電,唯思與憶難盡滅也!然文人雅士,千古風流,百聞不盡一見,倒真令李杜啞然,韓柳擲筆,夢幻如泡矣!可憐!可悲!

話雖如此,股市又是另一景象,日日報價皆真,財富升降有序,萬勿以夢幻泡影視之,否則天下蒼生塗炭,迨矣!

恆指明升,但暗藏處處殺機,A 股爆破之日愈近,羣鶯亂舞、禾雀亂飛愈甚,君不見今日百股齊升之壯觀乎!可有失之交臂之嘆?希臘三大悲劇作家之一 Euripides 曾言「上帝要誰滅亡,必先使其瘋狂。」持盈保泰 Hold Cash,藏實股於保險箱,多離場遊埠,少看大利是,堅持打其持久戰術,相信是 2007 年股海求生術之 Rules of The Game 耳!

Tuesday, April 03, 2007

北竇洞拉 (106)

北竇洞拉,莫展失妹,夜團人亦腩..」〔播放〕。80 年代最流行既係以上幾句話,世界好似秋官名曲「輪流轉」,如今港人發財,除左北望神州,仲要西向「莫展失妹」,先至大有「錢」途。由此可見,當年人見人憎既留港越南難民,搖身一變做左香港上市公司既搖錢樹概念。上市公司只要沾上越南二字,馬上升到「巴巴聲」,陸氏企業 (366) 就係一個例子。

今次郵輪短泊下龍灣,我上岸走了一趟,真正叫做踏足越南。越南導遊一路操流利廣東話及普通話介紹,係意料之外既驚喜。導遊原來曾經出差廣州三年、臺灣兩年,難怪講話咁勁。再了解下,導遊自爆原來佢仲係當年北越共產黨既游擊隊,如今放下殺人既機關鎗,拿起大聲公同布旗仔下海做導遊。我腦海不斷浮起 Killing Field 中滿地白骨、同埋許鞍華投奔怒海烈熖冲天既畫面,畢竟越共當年殺百萬平民既歷史實在無法抹去。

我凝目細望面前笑容可掬、但表現非常專業既導遊,心中對佢肅然起敬!因為今日佢可以放下身段同機關鎗,服侍我地呢班黎消費既港燦,就好似多年來內地窮鄉湧向深圳東莞既打工妹,又或者1978年十一屆三中全會後北上既首批港人,努力為個人為家鄉做開荒牛,要好多年後先至見成績。

對於有夢想同肯為夢想付出努力既人,我一向係非常尊敬既!

知識改變命運,努力創出未來,我係絕對相信既,做野唔得可睇 Steven Covey 、六頂思考帽、九型人格等等自我改善,失敗者只係自已唔堅持、唔改善、無主動性,無得怨人。越南導遊、打工妹、北上既首批港人,佢地一定會成功既!我祝福佢地!

我照照鏡,今日我努力投資,改變命運,達至財務自由既日子應該唔遠,我係一定會成功既!

Monday, April 02, 2007

達致財務自由既兩個組合 (105)

對於真正嚴肅看待想以投資方式在若干年內〔唔再係日過日咁慣性繼續返工〕達致財務自由〔當然自然就有自已可以選擇生活方式既自由〕,同埋真正打算馬上開始行動去實現目標既人,陸羽仁本「股俠創富」一定要睇睇〔劉創楚部份就可以免看啦〕。我綜合左陸羽仁建議既增長組合,再結合参考宏利、匯富、首域各優秀基金既選股,加上我個人既分析同傾向性,我為自己準備左兩個可以達致財務自由既組合,耐心等待下一波跌市時,進行優化我既組合。

兩個組合,一個進取 D,以 25% 為一年目標;另一個穩建 D,以 12% 為一年目標。我暫時唔定實將會採用邊個,到時再按具體市況行動。但兩個組合既選股及操作,都必須符合以下既條件:
組合內股票數目最少要有 7 隻,最多限 10 隻;
  1. 組合內各股票比重原則相同,例如 10 隻股則各佔 10%,但可有 +/- 2% 作調節機制,即最多 12% 最少 8%
  2. 組合內股票必須符合挑選之基本要求,主要為 PEGProfit MarginEPSROAROEP/EP/BYieldLiquidity 等之綜合評估;
  3. 購入股票後,必須持有 1.5 年,最短禁售期直至 2008 年奧運會;
  4. 股票購入後不轉換、不買賣;
  5. 由於新組合要由現成組合轉型,因此不設購入限期,直到以合適價格購齊組合內所有股票;
  6. 有息收息,有股代息就收股。

進取組合 (25%)

中國平安 (2318)、交通銀行 (3328)、招商銀行 (3968)、中國海外 (688)、百盛商業 (3368)、恆安國際 (1044)、蒙牛 (2319)、思捷 (330)、偉易達 (303)後備:中國人壽 (2628)


穩建組合 (12%)

宏利 (945)、匯豐 (005)、渣打 (2888)、建設銀行 (939)、中石油 (857) 港交所 (388)、建滔 (148)、福記食品 (1175)、世茂房地 (813)

Sunday, April 01, 2007

幾則國家統計局參考 (104)

看看幾則國家統計局消息,然後睇下對我地有乜野啟示:

消费品销量调查显示:消费趋向名优 品牌引领市场

名优品牌在市场中具有较强的竞争能力,获得了六成以上的市场购买力。

在全国八十余种主要消费品中,销量前十位品牌的市场平均占有率达62.61%

蒙牛 (2319) 在冰淇淋、液态奶市场继续处于领先位置

在白酒市场,五粮液 (000858)、茅台 (600519) 占据了60%左右的市场销售额份额 〔代理好像是華潤 (291)〕

燕京 (000729) 在竞争激烈的啤酒市场中表现突出,拥有15%以上的市场购买力。

女内衣市场集中度为62.25%安莉芳 (1388) 在这一领域继续保持领先,占据了10%以上的市场份额

金利來 (533) 以接近15%的份额遥遥领先于领带市场

黄雅萍:我国贸易顺差创历史新高的因素分析

综上所述,我国的贸易顺差主要是由国际产业转移、国内经济政策调整、生产发展与消费需求相对不足的矛盾等长期性、结构性因素决定的,顺差将在相当高的水平上长期存在。短期内能够使顺差大幅度下降的经济因素是人民币升值的速度,由此推断,当人民币币值上升到一定高度后,我国顺差的增长趋势将出现拐点。

1- 2月份全国规模以上工业企业实现利润增长43.8%

1-2月份,全国规模以上工业企业(年主营业务收入500万元以上的企业,下同)实现利润2932亿元,比上年同期增长43.8%。工业经济效益综合指数186.51,比上年同期提高20.65点。

1月份全国居民消费价格同比上涨2.2% 农村上涨2.6%

1月份,居民消费价格总水平比去年同月上涨2.2%,其中城市上涨2.0%,农村上涨2.6%