2007年總結〔一〕 (237)

大市由十一月近 32,000 點跌到今日既 27,029 點，足足跌左有 5,000 幾點，相信唔少年初既股神，今日經己扮蟹坐艇。我要響咁既市况下做 2007 年既總結，成績表都唔慌靚得去邊！即管睇睇！

整體成績：
全年總回報 +5.13%；
目前帳面盈虧 –3.80%；

分項比重：
MPF +45.62%；
基金 +40.97%；
股票 +3.79%；
期權 –6.10%。
由於 MPF 要 65 歲至用得，真正成績主要係來自基金！

成績表出左，有乜得著、反思、教訓、啟示、指引、之類之類呢？

〔1〕2007 年成功全年總回報以「+」收場，成功「保本」！

〔2〕2007 年係大升市，年頭 20,000 點升到年尾 32,000 點，指數足足升左 60%，賺唔到錢係好難既事，但咁難既事又都俾我做到！全年總回報只得可憐的 +5.13%；

〔3〕分析「賺唔到錢」既主要原因係因為做唔到「賺到錢」既操作，而「賺到錢」既操作其實只有兩招：

(a) Buy & Hold：年頭到年尾乜都唔做，即係泰山崩於前而色不變 ，就可食盡整體升幅；

(b) 波幅操作：低買高賣，食盡上落，2007 年內計有三起三落〔三月匯豐次按盈警低位後回升 5,000 點、八一七大奇蹟日後大升 10,000 點、十一月中調整後 3,500 點大反彈〕，不過第二招知易行難，唔係高手就只會後知後覺。

而我「賺唔到錢」就係因為兩招都無用過！面對八一七跌市，只係識驚，只係想災後救亡，結果唔湯唔水咁以「離場」回應市况，唔夠視野，唔夠 Proactive，結果雖然「保本」，但就錯失了百年一遇的八一七大奇蹟日後大升 10,000 點的利潤了！

〔4〕話說回來，次按咁樣衰法亦係百年一遇的事，股災永遠無先例可援，次次故仔唔同，由中英談判、到停市四日、六四屠城、中東戰爭、金融風暴、科網爆破、九一一、以至今次次按信貸危機，千變萬化，只有邊學邊做！今次以「+」收場，即使賺得比預期少，但無所謂啦！錢係賺唔哂既！

〔5〕分析「分項比重」可見，成績明顯係「基金比股票好」，「股票又比期權好」！如要賦能進路，2008 年應該再次重基金輕股票，重新啟動「JP 大龍鳳基金組合」，而期權最好不再沾手！期權，學識就夠，發達靠佢，只會倒米！

〔6〕吸收了上述經驗，而啟動「JP 大龍鳳基金組合」亦需時，故現在以 H-股 ETF (2828) 作為基金核心之替代品，其實正正是 2007 年總結出來的一個新方向，希望能於 2008 年甚至以後都有收成！但最關鍵仍是要做到 Buy & Hold！

〔7〕2008 年是更需耐性的一年，但亦是充滿亮麗希冀的一年！

〔8〕2007 年的三起三落，最大收獲是可令個人增強面對逆境的能力，加快成熟投資的心態，更有助步向財務自主之路！

〔9〕戰勝自我，不斷學習，就是投資成功之道！

〔10〕必須銘記，每一分投資賺取回來的收益，在解决個人基本温飽後，就要大方地用來捐助有需要的人！這些財富如不用來扶貧，也是穿不過針眼的！2007 年尾就捐了點錢給奧比斯、樂施毅行者、中國農村孤兒助養等等。2008 年要賺多D、捐多D！