賦能進路 (231)

「賦能進路」一詞出自我非常欽佩的李天命老師，意指「理性為本、因題制宜」處理問題的方式及態度，用來面對今日的市況，以至面對人生，皆近矣！

十二月我個人看淡，奈何人盡皆知減息可多炒一轉，全城盡是尾班車，DL、EW、ML 及陸師太等皆長有長炒〔炒足三天〕、短炒短有〔炒三粒鐘〕，鑊氣炒風遍及 1088、694、728、1800、1398、347、323 不等，DL 更面露得戚地描述其代表作，怎樣 15 分鐘內鑊鏟一轉 3900 賺了個 5,000 多元！〔未知 PC 又有無加入炒作大軍？〕亦有人「金」「股」齊鳴，索性連金都炒埋，正所謂炒得唔好晒！本週各股友平均斬獲都應有 2 至 3 萬大元，誠可喜可賀也！

而我？好笨！我又無炒、我又無入市、我乜 Q 都無做、我對個市竟亳無反應！〔但我唔係「經已去左」，因為惠州兩天遊結果唔成團，得個桔！〕

咁我做乜？我只係 Keep 住我自已相信既愛情承諾，每日含情默默好專一咁凝望住 2828，好希望佢早日回到我温暖既懷抱，再續半生未了緣！結果？只能好失望地遙看 2828 跟左個儍佬市一去無蹤！終於，到今天苦盡甘來，2828 又落近 176.80 啦！假如返抵 170 元以下，那又再回到我的 Buying Zone 了！

「賦能進路」指以「因題制宜」既態度處理問題，個市儍儍地而我唔去短炒，是否有 D 憨居？我咁專一只係熱戀 2828，唔去親近理會通街既群鶯亂舞，又是否「理性為本」呢？

下次，總結一下 2007 年既「得」與「失」！