股票期權實驗 (208)

講講呢幾日〔特別係今日期指結算〕用真金白銀做既「股票期權實驗」！十月埋單賺左 21,745 元！

感覺同買股票真係好唔同！買股票我係做「投資的我」，係好有品味果種；但買賣期權〔仲唔係用作對冲〕基本上就係炒賣單邊市，無論做 Call 或 Put都一樣係等同莊家對賭，係做緊「投機的我」，係好無品味果種賭徒，同投注站含住口萬寶路 D 麻X佬一樣咁口臭及樣衰！

But anyway，唔講形象住，先講今次期權既實驗及成績！

股票期權個市好特別，大部份時間係靜幽幽咁，得自已一個人同莊家玩！有 D 股票期權靜到無價位、無買賣！為左保障我地 D 小股民有價有市有買賣，聯交所規定 D 註冊莊家一定要回應市場問價及必須於 20 秒內報價，報價並要「足足」維持20 秒，並必須要有不少於 5 手合約！因此我成日按制問價，之後剎時個報價又消失，總之買賣要快， 5 到 10 秒好落完盤！

觀察一段日子後，只得 2628、2318 及 388 等較強勢及有成交，可以值得買賣！

Oct-22 及 Oct-23 我初步嘗試入市。Oct-29 又忍唔住以 0.50 Short-Put 多 10 手 (5,000 股) 平安(@105)，期權金收左 $2,500。

今日 Oct-30 結算日，開市期指低開 224 點，都驚驚地或會接貨，但 11:00 am 後見期指抽上，形勢對我有利。我突然仲發現國壽現貨做緊 51.85，但 Last Day國壽股票期權(@52.5) 仲有成交，我於是胆粗粗以 0.86 再 Short-put 多10 手 (10,000 股)，即收期權金 0.86 x 10.000 = $8,600，接貨價即是 52.5 – 0.86 = 51.64！

之後今日國壽由 11:00 am 到收市都高於 51.64，收市 51.95，高過接貨價 51.64，結果今日成功博到幾小時內賺到 $8,600 期權金！

In fact，下午 3:00 pm 後莊家已不再為國壽股票期權(@52.5)報價，我便知 99% 十月我應該可以穩收期權金了！

這次股票期權實驗，我個人最大得著不單止是幾天內賺了 $21,745，而是體驗了一次真實的期權操作，由最初憨居居電腦報價畫面都不識看，點樣落單買賣期權都不識按制，到現在看見莊家報價開始有 D反應，又開始識得計算何謂抵買及何謂「本少利大」，甚至自已開始感覺到有 D 叫 Strategy 既野在腦海飄浮，都算係一 D 進步！

例如：如果十一月國壽股票期權 (@60.00)，期權金 = $8.88，Short-put 十手 (10,000 股)，即收期權金 8.88 x 10,000股= $88,800，打和價即是 60.0 – 8.88 = 51.12，如果個市在現水平上落，Nov-29 期權結算日有機會不用接貨。這操作只需按金 85,000 放在股票行即可！最差情况亦只是於 Nov-29 要以 60 元買入10,000 股國壽而矣！〔但連已收左期權金 8.88 計，真正買入價只是 51.12，比今日國壽既收市價 51.95 仲要平〕！

所謂「風險無限」就係指接貨後股票可以狂跌到「零」，但你同我都知國壽係乜東東，係好料，跌到「零」既所謂「風險無限」基本亦係「零」！

輸死人果 D 係叫窩輪 (Warrant)，窩輪一到期仲價外就會變廢紙，價值亦係「零」！

但國壽認沽期權最多係以合約價買入優質股國壽！所以唔好想都唔想就俾「風險無限」四個字嚇親！投資涉及風險，但亦要 Case by Case 咁去了解！

下個月一出手就有可能賺到 $88,800 期權金喎！做唔做好呢？

我仲考慮中！原因？我仲要 Sort Out 一 D 我仲未學識既期權知識！

賺錢千祈唔好急，唔好話 $88,800 啦，就算 20 萬、30萬〔倍大做 20 手、30 手即可〕都千祈唔好急！要研究清楚都未遲，個個月都係期權結算日，急乜呢？ 巴菲特 Principle #1 = 投資一定先要保本！

股神報夢 (207)

我和同學兩人坐在華仁 Form 2 的班房中，突然有位穿西裝的老人家來了，我抬頭一看，馬上認得他就是股神巴菲特！

我開心到不得了，立即走前拉著他老人家温暖的手！巴菲特和藹可親，看著我們只慈祥地微笑不語。我見到偶像，拿出相機嚷著要影相留念，巴菲特微笑答允。

「站好！」我和同學兩人立刻擺好個靚絕既姿勢！

「咦！怎會相機忽然變了拿在巴菲特手中？不是我和他合照嗎？點解他變了攝影師？」

巴菲特遲遲仍不按制，我醒目，知道背窗是大背光。連忙向左轉九十度，巴菲特微笑點點頭，露出一絲嘉許目光。我心中有些少自鳴得意：「我都識影相架！側光最靚！」但其實巳經忘記要跟他影相留念！

大家跟住坐下座談股票。我求教巴菲特：「而家香港個市咁瘋狂，究竟前景如何？」巴菲特只慈祥地以微笑作答。

我拉著他的手，心領神會的再問：「我明啦！現在是資金市，連港匯都被流入既資金抽高，區區既 30,000 點未完既，個市一定仍會向上升既！係唔係呀？」巴菲特微笑點頭！

有了股神的確認，我大喜若狂！得到了答案：「牛市未完，可繼續買！」

知道了這個天大的絕好消息，我要第一時間馬上知會各位親愛的股友，機不可失呀！快 D 早作部署啦！

下兩月之期權金 (206)

以今日收市價計，比較 11 及 12 月期權金，仍以 388、2628、2318 及 941 最平均。

以 10 萬按金可買 50 萬貨計，11 月期權金可有 20,000 到 22,000 元左右， 12 月期權金可有 37,000 到 42,000 元左右。

潛心修練 (205)

我開始發覺 D 股票期權好鬼吸引，似乎突然發現左一個亞里巴巴既寶藏，只要輕按幾下Keyboard 制，就連「芝麻開門」都免叫，D 「高息」就滾滾而來！犀利啦！

十月初學，牛刀小試，只係戶口放低 10 萬按金，順利既話 Oct-30 就可以收入 $10,234！買賣仲連 Stamp Duty 都免付！基夲上真係小本大利，如果每個月密密咁當食三番，唔好大貪，目標大約每個月收 5 萬左右，一年都有 60 萬進帳啦！唔好忘記，這些只是投資正股之外的額外收益，你話係米幾和味呢！唉…！資本主義既食人社會！

不過世事有無咁著數呀？

我開始有 D 驚！於是呢幾日趁三聯書局八五折，一口氣掃清全場七、八本直接或間接講「股票期權」既香港書！我發覺呢家野只可以睇香港書，因為大陸連「股指期貨」都未出台！炒期指期權呢家野，香港既高手多得很，結果發達及結果 P.K. 既亦一樣多得很！

此外，我亦一口氣報晒十一月份大福証券同輝立証券舉辦既五個免費或收費既初級、中級股票期權班，一於惡補速成！

我幾有信心股票期權呢條路可以行得通！點解？因為「少人識」囉！「少人識」既野就多數可以賺到錢既！

舉一個例，高盛、大摩幫 D 甲乙丙公司上市，年年盆滿砵滿！老實講，幫一間公司上市其實係一件好鬼易做既野，流水作業，果 D 招股書都係你抄我、我抄你，其實聯交所網內都有 Sample Document 可以免費 Download， 照抄照改可也！呢…但係「少人識」既野就可以賺到錢架啦！而且人家高盛、大摩既品牌本身亦有些少價既。

十一月，等我學識晒股票期權既發達祕奧，以及相關既風險管理心法，就會同各位親愛既股友分享分享，公諸同好！一於有飯齊齊吃、有錢齊齊揾！

但願大家都可以無風無險地早日一齊達到財務自主的目標，與家人友好一齊享受人生、或再次追尋終生未竟之大志及夢想！努力！加油！「乾爸爹」！仲要記得身體健康，才可以有命去享福呀！

投資札記〔二〕 (204)

今日再 Short Put 左四手平安 (2,000 股) @$105／Premium = 1.46，袋袋平安 $2,920。假如 Oct 30 前跌唔到接貨價，扣除每次交易既 $100+ 使費，十月尾實收足足有 $10,234！

由 Oct 22 開始買第一手股票期權，到 Oct 30 只共七個交易天，收入已可以過萬，都幾和味，衍生工具真係一條財路！

而家我做 Short Put，本質己經變左係本小利大既炒作賺錢方式，絕對唔係 Blog 200 所講既對沖「保險」功能，因為我根本從無買入過上述既正股，所以毋須 Long Put 等量既股票期權做防禦下跌既「保險」。

分析下炒股票期權既利害：

好處：
(1) 本小利大：我 Short Put 左接近 70 萬既股票，保証金只需 9 萬零，Margin 有 7 ~ 8 倍多，而且 D 錢只係放在股票行戶口作帳面記數，毋須真正動用；

(2) 選擇多：有即月、下月、再下月、下季、再下季既月份選擇，又有 47 隻股票期權選擇，只考慮有意以較低價買入之優質股票，易於部署；

(3) 自主性強：莊家只做報價，但不能像 Warrant 般完全操控結果，因此股票期權比較公平；

(4) 每個月近月尾才入市，雖然期權金比較低，但可睇定 D 月尾大戶動向，做好定做淡，而且好快到期，賺硬 D 期權金！

(5) 效率高：每月結算一次，個個月可以有得賺！

害處：
(1) 愈玩愈大：由於 Margin 操作，好易愈玩愈大，例如我今日只係 Short Put左區區四手平安 (2,000 股)， 保証金大約只需 2 萬，如果戶口一旦放有 20 萬做保証金，今日就隨手可以 Short Put 夠 40 手平安 (20,000 股)，只要四日內平安唔跌穿 103.54，就即時有 $29,200 袋袋平安！真係好過返工架！甚至你可以 Short Put 夠 400 手平安 (200,000 股) 四日內即收 $292,000！

呢…呢…呢，貪念一起，唔覺唔覺就會失去左風險管理既智慧，唔記得左 40 手平安一旦接貨係要成 210萬！而 400 手平安 (200,000 股)就更加......唉！

(2) 任何其他害處，講多無謂，都一定係同 (1) 既貪念有關！

投資札記 (203)

今日再以 2.14 價 Short Put 兩手港交所 (388)，1,000 股收期權金 2,140，接貨價 240 元，即打和價 237.86。現時 2628、2318 及 388 等要跌 6.21% 到 8.67% 我才會接貨，今日升 1,003 點，對我有利。十月底大戶如不做淡，我穩收 7,725 元。

大福 Derek LEUNG 睇好華富國際 (952)，估計在林少楊打理之下，股價有機三年翻幾翻。另外六福亦現金流強勁，2007 年看高一線。

某銀行大亨話大市可以旺到 2010 年，神華 (1088) 可見 100 元！

亞里巴巴話以 P/E 超 100 倍 IPO 仲唔貴，仲話當年錯過 Google 者，今日唔好再錯過亞里巴巴。我用 Google 就用左幾年及好滿意，但亞里巴巴就一次都無用過！你呢？

智慧型選股 (202)

今晚在大福証券上了一課免費的「智慧型選股」堂，聽大福 Derek LEUNG 介紹他們這套工具，如何能在 1,200 多隻港股中，篩選出近期異動股，短炒發財！

這套 Database 月費要 120 元，但現在只要在大福証券開個戶口〔又是免費啦〕，便可於 11 月內免費使用「智慧型選股」一個月！

香港真好！仍有免費午餐！大福主管黄紹開是有心人，所以大福今天有聲有色，大辦免費財經教育，造福股界 C9 肓毛，宅心仁厚，他日一定善有善報！

股票期權 (201)

多得美股一跌，萬眾期待的港股今早裂口向下，恆指跌 1,127 點低開 28,337，國指跌 1,078 點低開 18,644。

我今早結果做了一生人第一次的股票期權交易！股票期權，亦即是日日光顧銀行買「高息存款」 ELI 或 ELN 的 C9 的那些結構性產品是也！

我其實同 C9 一樣，貪「高息」，所以結果做十月份的 Short Put，即沽出「認沽股票期權」，可以即時收取「高息」〔期權金〕，但要在十月底合約到期前隨時以指定價位接貨。

我 Short Put 了兩手 (2,000 股) 中國人壽 (2628)，於 48 元指定價位接貨的期權金是 1.15，我即袋取「高息」 2,300 元。另外，我又 Short Put 了三手 (1,500 股) 中國平安 (2318)，於 100 元指定價位接貨的期權金是 2.19，我又即袋取「高息」 3,285 元。兩單交易我共賺取了 5,585 元「高息」！此外，兩手 (2,000 股) 中國人壽及三手 (1,500 股) 中國平安的交易基本保証金只需要 33,504 元便可入場，如果真金白銀去買同等貨值就要 246,000 元！

換言之，股票期權交易是 Margin 買賣，用 33,504 元買賣 246,000 元的貨品，Margin 的槓干有 7.34 倍，刀仔鋸大樹！

結局會點？

(1) 直到十月尾〔仲只有七個交易天〕的任何交易時段，國壽都無跌低於 46.85 〔即 48.00 – 1.15 期權金成本 〕、而平安無跌低於 97.81 〔即 100.00 – 2.19 期權金成本 〕，對方就不會行使合約，即是我不用接貨，那就袋袋平安 5,585 元了！

(2) 國壽或平安跌破上述價位，就算跌到亞媽都唔認得，我都要以 48 元買入兩手國壽及以 100 元買入三手平安交收，這就是我要承擔的最大風險 〔即是要真金白銀用 246,000 元接貨，唔可以賴貓；如果無實力，就要於市場補倉買貨交收，即蝕差價〕。

風險評估：今早國指跌 1,078 點時，國壽最低亦有 48.80，而平安亦有 103.00。如果本月期指結算唔係做淡，被大戶狂插多 2,000 至 3,000 點，那就不用接貨。即使接貨，我認為除非大市跌回 25,000 / 15,000 水平，否則以 46.85 元買國壽及以 97.81 元買平安的水平，最終多數會財息兼收呢！好多 C9 買 ELI 都試過啦！

回報率： ( 5,585 / 33,504 ) = 16.7%！但只係計 9 日既交易！如果 Annualized 佢計 365 日，年利率係：( 16.7% / 9 x 365 ) = 676%…！真係「高息」吧！

同樣風險，又有槓干刀仔鋸大樹，仲乜仲要去光顧銀行買「高息」 ELI 呢！

〔注：以上演出經專人訓練，純屬高風險動作，電腦顯示屏前的觀眾或小朋友，切勿模仿，違者責任自負！〕

風險與保險 (200)

股市是雙面人，既是「投資」，又是「特定的賭局」！

如果你和我買了這麽多年股票〔又輸過這麽多錢、或贏過些少錢〕，腦袋仍能保持著 Simple and Naïve 的境界去相信股市只是個純潔的「投資地」，下了注長期持有就會贏；又相信瑞銀說三道四的所謂「研究報告」維持神華 (1088)「買入」評級及一夜間將目標價由 35.15 元大幅調高至 101 元，更相信瑞銀手中不是持有大批神華托高派貨，又相信瑞銀的所謂「研究報告」沒有干擾市場及利益衝突。那恭喜你啦！你真是一個股市中的「開心快活人」，能夠做到「輸等於贏」的最高境界！

但我不能！我既選擇了在股市中安身立命，便必須要在這「特定的賭局」中生存下去！入了賭場，如何去賭，如何賭贏，不可能完全靠運氣了，一定要靠更深入地了解賭場莊家的企圖、「特定賭局」的遊戲規則、落注贏面的機會率、何種賭具〔百家樂、大細…〕對散戶較有利等。因此，最近對股市中的「風險」與「保險」作了一些思考。

股市中有「風險」，簡單到人人都知。買入股票不但唔升，仲跌，就是輸錢既「風險」！但如何避免「風險」，為 D 股票買番個「保險」，就好鬼複雜！

Benjamin Graham 講 Margin of Safety，叫你買股票前稔清楚；Warren Buffett 講 Value Investment，叫你去買平貨；Phillip Fisher同 Peter Lynch 講成長股，林森池講千里馬，叫你去買未來年年賺大錢既高增長公司。但佢地都只係講買之前要稔清楚、思考清楚，但如果一旦已經成手貨，面對高處不勝寒既市况，一方面又唔想離場，驚沽得太早賺少左，另一方面又驚個市急跌變股災，走避不及沽得太遲輸身家，點好呢？

為 D 股票買番個「保險」既答案就係：期權！

期權有「指數期權」及「股票期權」，兩者「保險」功能一樣！近年銀行流行的結構性產品股票掛鉤票據（Equity-linked Instruments 簡稱 ELI），其實就是銀行向客戶沽出了一個股票認沽期權（Short Put），這就是銀行「特定的賭局」，客戶收取了所謂「高息」〔其實就是期權金〕，換來接貨的無限風險。如果學懂了期權，直接買賣，風險更細！

四叔炒股心法中，大家只關注升到 30,000 點，但他說的「買一手、沽一手」卻甚少報導，我估原因係 D 記者水平有限，唔多明佢老人家講乜！

我既領悟就係：在升市中要能夠安心長期持有股票，賺盡升幅，但又要防護性地為下跌買番個「保險」，就要「買一手正股時、同時可買入一手股票認沽期權」，減低「風險」！只有能夠平衡到風險與保險，升就賺盡、跌就蝕些少，那就夠膽、亦才可能在指數較高水平入貨〔如在 27,000 ~ 28,000 水平〕，這就解釋了為何大行炒股夠膽高追，因為大行都一定同時購入對冲及防護性工具，例如股票認沽期權、指數認沽期權、認沽權証等，為下跌買了保險。

我輩小股民，一直就缺乏使用期權這種風險管理工具的知識，在跌市中往往無法自保而都吃了大虧，大大減低了投資的成績！其實，對付跌市，除了及早離場避難外，懂得買入股票認沽期權更可令你我於大跌市中發達！即使大市方向錯了，最大損失只是有限的期權金！

為此，我正物色一個期權學習班，希望早日學懂期權實戰術！

除期權外，炒作恆指期貨、認購認沽權証等都是不公平或成本太高的「特定賭局」，我認為不宜參加！

坐看雲起 (199)

股市繼續跌，As Expected，是修行心靈、悟性、慧根的好時機！

今早決定沽出最後一隻「美林世界礦業基金」，亦以 33.20 沽出了月供計劃的招商銀行，其他碎股在跌市中沽不出去，算數！

現在手持 98% Cash 靜觀跌市，先看 3-Days 到 12-Days，As Planned！

今天開始，離開一下股市，去岸邊，坐看雲起！去行山，滿溪流水！

去聽張德蘭的《荷花香》：「心如明月…啊……留天上，……你可知情到深時…怕斷腸…！」

下午，去奧海城帝栢海灣會所和太極師兄打羽毛球！12月2日決定去參加 Unicef 的十公里馬拉松，找個理由逼自已去「燒脂」！

尤雅《往事只能回味》又漸漸飄近：「 時光一逝永不回，往事只能回味！憶童年時竹馬青梅，兩小無猜日夜相隨……！ 春風又吹紅了花蕊，你已經也添了新歲，你這樣變心像時光難倒回，我只有在夢裡想依偎….！」

股市變心，數天前烟花燦爛奪目的 Good Old Days，只有在夢裡想依偎了….！

頂天立地 (198)

沽貨秘笈第 17 招〔S17〕口訣：「頂天立地，賣出要急」今天最合用了！

〔S17〕指股價經過一段漲升後，如果某一天出現了長上影或長陰燭，同時放出了大成交量，這形態就叫做「頂天立地」，是典型的見頂特徵，後市一般要出現較大調整，如不及時賣出，就會將已經到手的利潤，原封不動的退回給庒家！

今天恆指、國指形態均完全符合，再加上 2,098 億的歷史驚天成交，簡直就是「頂天立地」的最佳教材！

明日點算好？我都係靠估，但有以下想法：

(1) 有貨者：
(a) 如有可觀利潤，可考慮沽出鎖定利潤；
(b) 如無利潤，但持優質股者，可放心再持有 3-Week 到 12-Week，期間當可脫身，甚至可於見到低位時〔如果又再睇好〕再增持亦未嘗不可；
(c) 如無利潤，但持雞股者，君子不吃眼前虧，10% 內止蝕認輸、保留實力；
(d) 如持雞股者又已輸突於 10% 者，事到如今，我真係無乜意見，你稔你啦！

(2) 無貨者而又有 Cash 者 ：
不必於未來兩日輕舉妄動，心急入貨，先靜觀其變，我估計「頂天立地」會反反覆覆下跌 3-Day 到 12-Day，可等 15/10 「十七大」人事定調政策出台後，於 17/10 到 24/10 期間才決定！
(a) 短線〔持有 3-12 Days〕、中線〔持有 3-12 Weeks〕、定長線〔持有 3-12 Months〕入市； (b) 些少 (20% 資金)、中度 (50% 資金)、定重倉 (80% 資金) 入貨。

買乜？ Blog 194 的工具皆可考慮！下一站我較喜愛 (a) 恆生的 H150 基金及 (b) ETF (2828)，貪其簡單，升就升，跌就跌，只有買貴，但無買錯！

我個人認為，先有一個短、中、長線的出入市的時間觀念，按步就班、靜待時機、控制資金、不疾不徐，抱「財不入急門」的平常心去「觀市」、「入市」、「持有」、「出市」、「獲利」，多耐性、戒急、用忍，勝不驕、敗不餒！

能夠有紀律地、科學化地、理性化地做好這個出入市的操作，那財富就自自然然會叩你門、入你袋、同你握握手做好朋友了！

我認為未來 3-12 Days 大家最好都去看戲、旅行、聽 Concert、睇 Show，或者拚命返工，總之無需要日日睇市，12 Days 後，結果一定比你日日睇市心掛掛更佳！

信不信由你！善哉！善哉！

尋夢 (197)

吃了藥吧，幾晚都不斷發夢，一夢接一夢，連綿不斷，浪瀾壯闊！

每個夢一個故事，每個故事一種情懷、故事與故事連綿緊扣，每個人物都是我生命的一部份，每個時空都高度濃縮集中。

夢裏我是主角、我是配角、我是旁觀者。

夢內每幕像電影聲光片羽，穿插如風、卻又細緻清晰，那遠景可觀見整幢大樓、層層列列；那特寫人物可見眉目傳情、語句輕柔。

夢，都是好！我像生命到了盡頭作最後的全景鳥瞰，又像浴火重生鳳凰般在生命最愉快的片段蹓躂，前後盡是荒野，又滿是人聲，我既不寂寞，又不欠缺，只感滿足快樂！我在笑、任由內心升上眉梢的歡樂在我四肢向外伸展！

熟悉的快樂，遠離了沉默，人世間的事物，如烟渺渺在眼前滑去逍逝。逝去母親每人的一封利是、那大樹穿庭破頂的新家、大禮堂中的親子嘉年華、泳池中的花式浮沉表演、操場旁小憇的温馨話語、連失去信用咭和身份證的徬徨，都覺是温馨、都是甜、都是好、都是美！

好多個夢，令我彷彷彿彿、迷迷糊糊，我好愛這種浮遊感覺，像頻死邊沿靈魂離體浮上半空俯視自已殘軀，等待白光引領到另一異世的温暖。夢是前生一世世的重温、還是今世一幕幕的重現，莊周夢蝶，我不能知。

我只懂細細品味夢中的甜、夢中的濃、夢中的淡！我只愛及望夢常來、夢多來，在夢中能與組成我生命的人同行同遊同覽明月，人生本是一場大夢，宵來夢醒，尋無覓處。能在美夢中酩酊不醒，幾時魂歸去，今夜月影濃，是尋夢者之所願也！

回覆 CW (196)

回覆 CW: http://jackypang2.blogspot.com/2007/09/2007-195.html#links