恭喜小吉吉（888）

首先恭喜小吉吉能在股市中不勞而獲，賺左幾千大元！而且為人類既近代史作出左偉大既貢獻！

點解咁講？我係有根有據，唔係老作！

首先，人類既近代史最偉大既貢獻就係「資本主義」既出現，而資本主義最核心既價值就係「不勞而獲」，即是不用「勞動」、而係用你既「資本」去賺錢養活自己，即係所謂「錢搵錢」是也！

所以小吉吉你既成功，表明亦證明現代文明既人類仍舊喜歡資本主義（即是可以有自由去「錢搵錢」、發揮自己既智慧及才能）多於共產主義或者社會主義既「大鑊飯」或者「平均主義」。因此，你個人炒股行為既成功，其實不單止係你個人既成功，仲係 Glorify 住整個「資本主義」運作既成功！你話係米意義重大！

就好似「賓察慘劇」中死唔去果對老夫婦，死唔去其實不單止係個人既好運，仲係 Glorify 住上主保佑佢地死裏逃生奇蹟既見證！你話係米意義一樣重大！【至於點解梁氏一家五口要三死一重傷，係米又係 Glorify 住上主要佢一家死剩一個完完整整既人來做見證，意義上係米又係一樣重大？基督徒自會心領神會，亦一定可以解釋得頭頭是道：死有死既理由，唔死又有唔死既理由！總之就好似打麻雀，無論當時係東風定西風，你當時又係坐緊南位定北位，都總有一個方式來 Glorify 住打麻雀既 Magic，即係無論情況如何，你都一定有方法可以食到糊！】

其次，由於你一邊「充滿罪惡感」，一邊又會用幾千銀去買個「愛風」玩；正正如此（又如果人人都好似你咁做），經濟就在人類既「罪惡感」中得以進步，Steven Jobs 既 Apple 品牌就會愈來愈好生意，社會亦在人類既「罪惡感」中得以改善，宗教更可以在人類既「罪惡感」中大收旺場，於是教堂其門如市，教友爭相十一捐獻，牧師肚滿腸肥，各區急急植堂上市抽水逢勃發展，教友善信數目急增，行善力量不停壯大，人人生活得更好！在宗教的大傘子下，人人「無懼死亡」、人人「笑對死亡」、人人「樂於死亡」，天堂入住率大增，所以你話你係米為人類既近代史作出左偉大既貢獻呢！（雖然你可能唔知、或者唔多為意「充滿罪惡感」既後果可以如斯偉大！）

最後，亦係「最偉大」既一點，就係你竟然對我話你炒股之所以成功，原來係「根據你（即係指我）的一些低買高賣的技巧和心得」及「按照參考你（即係指我）對股巿的心得」而有所成！嘩！嘩！嘩！真係多謝曬你既讚賞啦！

不過，我最開心既地方，就係呢 D我成日自己「講極都做唔到」既原則（例如低買高賣、etc.），而你竟然話「可以成功做到！」真係令我驚為天人，亦難以置信！而你亦話「唔係睇你講的號碼買既」，由此可見，你可能已經唔知點解成為左武林高手，唔單止識得「食魚」，仲識得去「捉魚」！甚至可以用「五餅二魚」令到一切「夠用」！

因此，我相信你個仔既保險費同玩具費，都係指日可待等收成啦（保險費可以炒「平安」或者「國壽」，玩具費可以炒「彩星」之類啦）！

至於做人做唔做「一隻貪心的小雞」，我其實覺得經常係身不由己既！

你呢種「我不得不承認…」既語氣我見好多啦，其實係「言若有憾、心實喜之」！賺左幾千大元，其實都幾開心嫁啦！一般最可惜既情況，總係「未必賣到最高位」，又或者「賣完之後仲升餐勁、但又唔敢再追入」，因此，唉！人生快樂之中亦總仍會有些不完美的憾事！我明既！

因為我試得多啦！But, tomorrow is another day…what’s a big deal？