圖片來源：http://big5.cri.cn/gate/big5/gb.cri.cn/19384/2011/04/01/1042s3205788_18.htm
好快又到四月一日了。
四月一日是愚人節，張國榮的離開令人感慨，真想只是愚人節的愚人玩笑。
四月一日這個日子是香港絕大多數公司的財政年度，新的開始又要有新的計劃，去年用不完的錢要拚命用光，但口中又要說不夠錢用，否則好易給人家 cut budget 影響生存。這種弄虛做假的財政手段，所有上班的人都掩著良心做了一輩子，大家都做得很熟手了，因為大家都覺得跟「良心」沒關係。
四月一日又是長假期，要拿盡福利的人於是請假兩三天便有七八天的空閑，管他工作上什麼緊急不緊急，因為全世界的事都比不上老子放大假那麼緊急。
四月一日又要交 funding proposal，因為好多社團交接後，新官上任三把火，新主席希望快快拿個頭彩，最好有些新 project 可以威威，給你一些撥款，就可以在啟動禮上給媒體拍照發光發熱。
四月一日又是好多愚人上街爭取權益的日子，因為最好批鬥政府的時候是財政年初，政府有錢在手那麼掩口費自然批得比較鬆手，政治利益不是為名為利，大家真的那麼純情麼。
四月一日是個昏天黑地、狂風暴雨的日子，我可以做甚麼呢？
四月一日，我整天望著天空，看著它光亮，看著它照耀，看著它昏黃，看著它黑暗；然後華燈初上，萬家燈火，在風聲，在雨聲，在貨櫃碼頭工人罷工的喧鬧聲中，我深深地呼吸香港天空中的空氣，直入丹田。
剎那間，我感覺香港真可愛，我在這個地方度過了我的一生，從出生到死亡，但我覺得無悔此生。
世界上固然仍舊有很多佳山佳水之地，例如加拿大、英國、澳洲、紐西蘭、瑞士等，我也都曾到過，我也都曾住過。
但如果明天就要離開，從香港出發，應該是最自然吧。
其他地方，始終是「異鄉」吧。
四月一日，我就在寧靜與思量中，伴著窗外偶爾的雨驟風狂，悠悠度過。
四月一日，其實不是愚人日子；四月一日，其實是智者的日子！
2 comments:
你好, 係閱讀有關狄恒神父既新聞因而亂打亂撞閱讀你既blog...
我一直都有一個迷思解不開, 如果可以既歡迎你提供意見。
我今年已經29歲, 自22歲畢業後, 我已經斷斷續續做過5份工, Big4、投行IBD、藍籌上市公司同MNC analyst都做過, 但每份工都做唔長, 離職原因唔係因為工作表現欠佳或被炒, 相反, 每份工作都好好彩遇到好上司, 同同事相處都好融洽, 但本質上我係好怕同人打交道, 我覺得番工就好似role playing, 我好唔習慣帶住一個假面具去同其他人作出工作上既互動,依種壓力迫到我透唔到氣, 所以每次我都主動請辭, 待去完長途旅行後再搵工。
好好彩無家庭負擔, 而且透過畢業頭一兩年有紀律既儲蓄同投資, 幸運地累積左一筆唔多唔少既財富。
我自問唔係一個好aggressive既人, 但我真係好怕同人溝通, 我發覺自己承受壓力同逆境既能力好弱(由細到大基本上無咩遇到逆境), 但我心底明白依種工作心態對我將來發展好有負面影響。
師兄, 其實我應該點樣調整好自己既心態? 謝謝!
第一：你既然想請教我，但係連姓名都無寫一個，表示你係一個好無基本禮貌既人。你以為世界上人人都願意免費教精你咩？唔好當左世界上所有人好似你亞媽！
第二：你今年都已經29歲人，畢左業7年斷斷續續做過5份工，如果我係老細，最討厭見到你呢種人申請我公司搵工。基本上你係一個無人生目標、唔知自己五年或者十年之後想點既人，呢種人做野一定無承擔、無責任感、同埋唔可靠！
第三：咁大個人明知做工需要長大成人，學習待人處世，唔可以成日做「裙腳仔」依賴亞媽，但自己總唔肯去學習面對逆境，咩事都話「壓力好大」自己主動請辭逃避，咩野都話「好怕同人溝通」，你究竟怕咩野呢？基本上你係一個恐怕面對失敗、兼且無咩上進心既人！
第四：你講到自己「同同事相處都好融洽」，好似好掂，其實你係「帶住一個假面具去同其他人作出工作上既互動」，你呢種人係叫做「自相矛盾」、「表裏不一」既人，最大既敵人就係你自己從來做人都「言行不一」，講一套做一套！你點會可以係一個開心既人？你既「相處都好融洽」既同事點會係你既真正朋友？
第五：你擔心咩野「將來發展好有負面影響」呢，你不如擔心一下你目前「對自已既所有缺點都視而不見」，仲完全無d想自我改善既意向仲好啦！基本上你亦係一個無咩自知之明既人！
你唔好以為我好得閑，寫咁長既野去鬧一個三九唔識七既人。我見你尊稱我一聲「師兄」，我假設你係華仁仔自己人，我至塞錢入你袋。否則我啋你都傻！
我見到既野已經講清楚，你係一個無基本禮貌、無承擔、無責任感、唔可靠、凡事逃避、依賴亞媽、唔肯長大成人、恐怕失敗、無上進心、表裏不一、講一套做一套、加埋無咩自知之明既人！
只要你肯認真面對上述真正既自己，認真改變自己，你仍然會係一個十分出色既人！
當然，你仲有一個優點，仲係「相信自己有能力改善」，因此你係有成功既希望既！
Impossible is Nothing！
祝你好運！
Post a Comment