建行與移動（1035）

今日又打左一場好激烈既籃球賽，我打得愈來愈好，狀態已經逐漸返來，手感亦慢慢出現，不過「仍舊輸波」。

但我明白，籃球賽係講「團隊精神」既，而「團隊精神」在今天社會被視作最偉大既東西；無「團隊精神」，你份工都唔使做啦，基本可以「炒」啦，Right？除非一樣，你份私家工係做「炒股」既（像我一樣），那就可以「個人主義」凌駕「團隊精神」啦。

講籃球賽係引子，打完波打牙較講股票至係主題。

我問法巴位師兄「咁既市況點攪好」，佢話「炒上落啦」；另一位後生師兄贈多句「有個 friend 最近賺唔少，淨係睇住個保力加炒就得啦。」我心諗：「英雄所見….喎！」

我隨口問「有咩心水？」法巴師兄話「中移動（941）唔錯喎… 70蚊邊，有4厘幾息，怕咩喎！Downside 最差都唔使驚啦。」後生師兄話「但係中移動既 APRU 值跌得好勁喎...！」法巴師兄話「第日中移動升番既時候你睇仲有無人講呢的說話...」

法巴師兄即係法巴師兄，好明白「大行講野」即係「你講野呀…？」

一講中移動，令我馬上想起建行（939），因為我覺得最近建行既 Downside 最差都好似已經唔多使驚。

法巴師兄都有相同睇法，佢話「咩野加存款準備金、咩野加息、咩野 xxxx 億壞賬、咩野地方債有咩好驚，如果有事你估政府一定會救咩野行業？美國點做有眼見啦。」聽落，法巴師兄唔使去 Church 講道理，都好似有的道理。

我既想法係：「有錢、今次不妨買的 d 建行收下息，兼且博升。」

我既「想法」係基於以下幾點既「進一步想法」想出來既：

（一）建行係好股，fundamental唔使花精神研究，2010末期息人民幣 21.22仙（0.252港元），16/6/2011除淨，即是15號或之前買入有息收。

（二）近一個月建行回落，本周五（3/6/2011）收市 7.06元，已經係保力加通道既底部，開始好有吸引力；而且保力加通道亦已經收窄左，意味住可能在之後有「較大波幅」出現（是升是跌就難講啦）。

（三）本周五成交量由20天平均的1.91億股大增至4.25億股，如此這般，總有東西跟尾既。

不過，7.06元係唔係「最佳買入點呢？」

我會答「係」及「唔係」既兩頭蛇答覆。

「係」既原因 because 7.06元已經係保力加通道既底部，好大機會短線反彈「食雞糊」啦。「食雞糊」because 保力加通道既頂部才 7.30元，一買一賣得 +3.40% 丁丁。

「唔係」既原因 because 建行既 rsi(9) 都仲在 36.9，我相信要跌穿 7元才見 30 以下，符合我既操作系統。

此外，喜歡睇平均線既人可以用 250天線既 6.85元做入貨位，咁就贏面更大。

總結，如果用貼門口既對聯表達，上聯係：「建行與移動」，下聯係：「財息可兼收」。不過橫批係；「仆街唔奇」！

何以見得？

因為我記得一年前話中交建（1800）係好料又係呢位法巴師兄，結果我一買入就「仆左街」啦…唉！你話法巴師兄既野信唔信好…？【不過，當時我係未發明我既 JR操作系統既。】