2007 首日觀察

2007年1月2日眾望所歸開紅盤，恆指勁升345點，收20,310點，成交505億。

但請問你仍有貨嗎？請問你賺到錢嗎？ 如今市?，有貨者喜中又懼，怕得來不易之利潤一跌之下大減，無貨者則眼光光兼口水流流，但一般只能長嘆幾聲，暗道：「早知咁升法，我就……！」唉！老友，我明呀！「早知咁升法，我都就XXXX啦……！」唉！

不過唔使恨架！因為明天仍然機會無窮呢！毋須只爭朝夕。

讓我恭讀股神巴菲特福音第2章第9節來醒一醒吧：「巴菲特面對氣勢恢弘的牛市毫不動心，考慮的只是在市場近乎瘋狂之時將手中的股票賣出。而在市場一片低迷的熊市中則是他伺機出擊的時候，因為這個時機正是按上市公司內在價值買入股票的最隹時機。」明白無？

今日行山，微雨濕身，令頭腦更清醒D。我叫PC不如向各股友講講他對2007市況的策略，PC做人素來有好野唔會孤寒獨食，於是發表一下偉論 (信不信由你)：
1. 如今個市咁高，不宜太「勇」，耐心觀察等調整才入貨較佳；
2. 2007 仍是中資股天下，有時間研究者可挑選幾隻好股買入持有(號碼自己諗啦)，年尾應有斬獲；要返工服侍老板好忙又無時間者可乾脆買入A50中國基金 (2823)，可以唔使成日睇住個市，靜待收成；
3. 2007會炒番落後藍籌如匯豐(5), 宏利(945)等；
4. 買大陸地產股不如買香港地產股，始終管理層誠信較佳，如新鴻基(16)；
5. 2007及 2008是豐收年，美國總統大選 + 中國08?運，雙劍合璧，是百年一遇的賺餞機會，最少一年升50%，你賺唔到唔關人事。

我今日去左行山，當然無做任何買賣啦，升市就安心讓股票組合D財富增加把啦，毋須急急跳出來大聲喝停，然後好正義咁將會生金蛋的好股沽掉止賺，最後留下了滿手不升的落後股 (或者是垃圾股)。所以，今天的 Blog 上組合比上個交易日都升值 7,300，整體賺 9.37%。主要力度來自中國銀行 (3988) 升到 4.48 及首都機場 (694) 掃到 6.31 收市並創新高。DW仍有中國銀行在手，開心啦！

創科(669)今日收 10.12，比上日10.08只微升4仙，成交額微升到5.49千萬，但我見一早大摩就放個沽盤響10.12壓住唔俾升，然後見好多大行好似瑞銀、摩通、DBS等響10.08 同 10.10係咁Buy，成個密密收貨格局。我於是不甘後人，在 10.04掛出買盤3,500股，結果始終跌唔到呢個價，買唔到！大行入貨最叻係在窄位收貨，兼且有耐性慢慢吸。結果今日創科果然就只能在 10.12 收市。

創科大行收貨經己差不多，而今日經濟日報 Money Times開始何車有一整頁文章唱好叫人上車買創科，此情此景，令我好相信最多一兩個星期內創科就應該開車炒上，我估計初步目標價11.00 (即50及100天線)，如突破可望上返11月中高位 12.60，而何車的中線目標價更是13.50，以折合07年PE13倍計算。有機會適當價位我打算再買D。

今日個市好多隻股創新高，國壽(2628)、平安(2318)繼續去！氣勢如虹。A50中國基金(2823)升12.19% 到128.80，嚇死你！不過我開始見到有D股無力去，例如中海發展(1138)就回吐 5.2%到11.28，而仍被唱好的玖龍紙業(2689)亦跌 1.19% 到13.24。呢D唔係好兆頭。

尋日剛好睇到星島投資王篤手指話今日可炒中國財險 (2328)，都幾符合我既分析，好奇心下即管睇睇。上日收市3.99，今朝開市頭10分鐘只升左四格，仲定住左幾分鐘，基本上4.03當時可以任?。剎那間有D貪念，好想落場炒翻一獲，買入大約10萬股炒即日鮮，個勢真係博得過！但想起剛剛至話過戒短炒，唔想打爛自己個貞節牌坊，終於忍手無買，出去行山把啦！結果點？仲使講！2328今日掃到上4.47至肯停，足足升左12%，升市往往就係咁架！不過我無後悔，因為錢係賺唔曬既！

各位股友，今日小弟細佬為左堅持自已既一個原則，結果損失左本來可以Easily落袋既 44,000大元，你話值唔值呢？如果唔值既話，有乜野會比錢更有價值架？人生既價值係乜呢？又如果換左係你，你又會點做呢？ (上述呢題係2009年高中通識科既試題黎架！)

我現時 Equity 同 Cash 比例己經係57% 比43%，係時候小心D。個市位高勢危係人都知，但報紙佬同財經演員依然日日叫人入市，隻隻股都叫好，勤力過富珍總幹事叫人日日食雞，國壽話睇30蚊、恆指又話睇24,000點，個市直情好都你麻木，唔信唔信？又升！

我直覺係時候做D野，係乜？可以係減持啦，又可以係增持啦，懶學術D講，叫做「Re-Balancing」也！幾時做？唔知！陳方太教落：「見步行步！」

回應 DW：

紅發集團 (566) 股價 0.91，PE應該是 8.02倍而不是2.5倍，息率 8.79%。股價一浪低於一浪，現時好接近52W低位0.86。不過林森池話戒貪平野 (同高息)係有道理既。我認為紅發集團唔值得買因為：

(1) 玩具工業股競爭大，同類股偉易達 (303)正佢多多聲；

(2) 過去五年紅發盈利年年唔停咁跌，股價插水真係有理由架，而創科(669)就年年盈利上升，股價跌係因為大行賺夠趁壞消息洗倉；

(3) 紅發ROE, ROI, Profit Margin, 現金流等，樣樣都唔得，我完全睇唔到佢仲有乜吸引，連炒?運概念都無；

(4) 仲有，紅發D平均成交額實在太少，買左好難甩身。

DW股友…….千祈千祈千祈千祈…唔好貪平呀！

至於創科幾時升，就大家一齊 Wait n See 把啦，好嗎？