準備換馬

1月11日，星期四。市續跌。股民開始要習慣原來個市真係會跌既，特別有平安(2318)同國壽(2628)兩個人辦不斷向下插。有大行道富開始預期整固數月，又話發覺07年首兩日內200億資金急流走。有咁既口術出街，我開始覺得個市好玩！

夫，股市者，上上落落也！莫謂回調何日看，如今有落終始見！

跌市對我既BLOG上組合無大影響，在大家樂(341)領軍下，微升至賺 34,160 (7.36%)。但我有新的想法了，我打算沽清各股換馬。理由？

(1) 我無耐性！弱勢股組合需要較多時間去升，目前組合升左7.36%，如想升到15%-20%，可能要到三月底。但我又覺得場內其他強勢組合的潛力可能更大，趁調整入貨是良機。例如國內地產股、及國內消費股。

(2) 組合內大家樂已升穿所有平均線，而首都機場已在 6.30橫行，組合短期內可能暫時無力再去。

(3) 國企成份股跌市中牛熊共舞，由最佳的中海集運 (2866)升4.39% 到最差的大唐發電(991)跌6.43%都在一天，造就了選擇性的入市良機。跌市中入到平貨賺個5%-7%反彈，非常和味，風險比升市中高價追貨低得多，我好中意呢種 Operation。心目中想買華潤置地(1109)。

睇多一兩日，見步行步。