2007年應如何投資真是一個需要仔細思考的問題，不單止要仔細思考，而且還要確保自己有紀律去切實執行，股票市場中勝利者的座位只會留給肯付出耐心和紀律的人。投資不止是2007年的事，而是一生的事，必須確保自己在這個大富翁遊戲中的籌碼只會愈來愈多，而非將籌碼丟入股海中餵飽D大鱷。
我相信在2007年股市波幅增大，2006年輕而易舉的短炒及抽新股坐一程順風車的情?難度將會加大。掉以輕心的入市短炒，特別是一些不知為何物但又會勁升的貓狗股，很易中招損手爛腳或不自願地變作長線投資者〔簡稱叫做蟹〕。如何控制貪念，不去恨賺那些三兩天可能有10%-20%盈利的炒作，而審慎地挑選一些行業龍頭及有盈利增長的優質股，長期持有一年賺它一個25% - 30%的回報，相信是自己今年最大的挑戰。
聰明既你一定會好客氣同禮貌咁問：「喂，老友，用一年時間去賺25% - 30%的回報，而不選擇用三兩天去做可能有10%-20%盈利的炒作，你係咪似乎有D審慎左D呀？」〔審慎今次既語意用法係表示「蠢」或者係「憨居」既同義詞〕。
但笨笨地既我當然有我既笨道理啦，你又即管聽聽睇通唔通：
(1) 短炒風險好鬼大架，話就話三兩天可能有10%-20%盈利，但結果十次可能只得兩次成功，而賺番黎既錢仲要去貼「不成功但成仁」果八次，實質落袋未必多。反之，長期持有行業龍頭的優質股，賺它25% - 30%的回報在2007年既市有好大機會。拉長計，贏面高好多；
(2) 我又想問問短炒你敢唔敢放副身家落去呢？聰明既你一定唔會啦！所以我都唔會！但長期持有行業龍頭的優質股我就敢！投入既銀碼大，回報才會大，否則俾你買一手1,000股既中國銀行(3988)，就算佢會飛升200%都係賺唔夠一萬銀，咁要幾多歲至可以夠錢退休呀？〔係呀，大家年紀都唔係18-22架啦！〕
(3) 最重要但好多只爭朝夕既短炒人往往唔記得既問題係：「投資究竟為左乜？」唔好答我話係「錢」呀，錯！因為如果咁諗就好易傾向左短炒，變左只見樹木不見森林。我既答案係「財富增值」！有乜分別？好大啦！如果長期地、持續地短炒，多數人發唔到達；但如果能長期地、持續地「財富增值」，最後多數人真係可以發達既！唔係我吹水，有數字為證！每年25% - 30%的回報率，好多人包括你我都有機會做到，即是話你既身家大約三年翻一翻！ (The Power of Compound Interest)。如果你由100萬開始，3年後變200萬，6年後變400萬，9年後變800萬，12年後變1,600萬，你仲使返工？
結論：所以如果你而家開始投資，五年左右己經可以有接近400萬，然後買匯豐收息加埋股價增長，每年最少都有8%啦 (我算4%股息及4%股價升幅，好保守計)，一年就有32萬收入，一個月成3萬銀，一般生活費應該足夠啦。所以話，如果任何人有100萬在手並且開始投資，順順利利既話，5年左右就可以退休啦！如果開步既第一桶金仲多既話，咁就連5年都唔使啦！
所以，其實你想享受一D唔使再返工既自由自在、回復真我既好日子，其實真係唔係咁難架！
「咁，點至有果100萬既第一桶金呢？」
「繼積返工o羅，老友！」
No comments:
Post a Comment