「市場錯價」點解會經常出現？通常既理由多數係由於：
(a) 市場買家和賣家既力量唔平衡；
(b) 市場資訊唔流通；
(c) 市場參與者無知識；或者
(d) 市場出現左儍人或者蠢人〔高買低賣〕！
而往往 (d) 既因素係最常見，升市或者跌市一出現就有好多儍人或者蠢人湧出來！當中或者亦有你同我既足跡！
要判斷何謂「合理價格」，我認為只能看一個準則，就係公司有無盈利增長！有「盈利增長」既公司就有「價值」，有「價值」既公司一出現偏低既「市場錯價」時，就要手起刀落去入市執平貨！睇睇匯豐：
匯豐公佈左 2007 年既業績，真相大白，在次按撥備後繼續有 17.3% 既「盈利增長」！過去五年平均亦有 20.5% 既盈利增長率！
匯豐過去一年，由 152 蚊跌到落去亞媽都唔認得既 104 蚊，相對於 2007 年盈利繼續增長既事實，證實左係「市場錯價」！
但係目前買得未呢？目前約 122 蚊，我認為唔使急住！
匯豐弱左咁耐，雖然係「市場錯價」，但係無咁快可以一飛冲天既，因為 (c) 既因素仲在，市場仲有好多無知識既參與者，唔識或者仲未夠膽去入市執平貨，要等到 D 大行及大鱷都陸續唱好，跟住仲掃高埋 D 股價去到 140 蚊以上，市場氣氛逐漸改變，班儍人或者蠢人至會入市高追，到時亦係各位智慧型投資者既親愛股友開始考慮獲利之時也！
匯豐既「合理市盈率」一般係在 12 至 18 之間〔如今市價 122 蚊及 P/E 9.6 直情係超平〕。先用 2007 年既 EPS (HK$ 12.714) 去推算，2008 年既「合理價格」範圍，應在 152 蚊到 228 蚊之間！再以中位 P/E 15 倍去推算，2008 年既「合理目標價格」應該係 190 蚊左右！
我認為唔使急住既意思係，可以等到匯豐大約在 110 蚊或以下買入，咁 2008 年除左可以收 5.8 % 既股息外，如果長期持有到 2008 年尾〔2009 年尾都無所謂啦〕，等升到 190 蚊時至施施然沽出〔或者先沽一半鎖定利潤，另一半博佢再升上 228 蚊至沽 〕，咁就可以在一年〔或者兩年〕有 73.4 % 既利潤！嘩…嘩…嘩…！仲想點呀，各位親愛既股友？
匯豐出現左「市場錯價」，可能係我 2008 年既另一次超勁既獲利良機！幫我反敗為勝！我真係要認真稔稔佢！
No comments:
Post a Comment