「打工受氣生活」既特色係你日日由朝忙到晚去服侍 D 朝令夕改、五時花六時變既老板，以及用左好多精神力量去管理 D 頂心頂肺既伙計！
你仆心仆命既結果係機構俾你既工作量只會愈來愈多〔記住人工係唔會多好多，早幾年入職既不幸者仲係同工不同酬〕、效率只會愈來愈低、身體只會愈來愈積勞成疾〔或者經已「成疾者」就不知不覺變左「成癌者」〕，而你既老板相反就愈來愈 High、愈來愈多鴻圖大計，愈來愈先天下之憂而憂，乜 Q 都話想「做大」「做強」「做阿一」！〔又唔多理 D伙計個個經己做到都好殘好盡〕，而頂心頂肺既伙計就依然故我，甚至連一向亦係同你咁盡心盡力、仆心仆命既伙計都頂唔順，開始對例行吹雞都無乜反應！
此情此景，相信係今天 NGO 幾普遍既「打工受氣生活」既寫照〔我希望我無美化左個真相，或者實況可能更加地獄都未定〕！
我份人本來好中意打工，天生又勤力，細路仔時花名都有得叫「細牛」，但如今既情景相信我都一定會頂唔順！況且我份人雖然心地善良無比、愛心爆膨、愛人如已、又温柔體貼、從不記仇、只懂以德報怨…〔下删三百字〕，但係講到 EQ 真係非常麻麻，「牛頸」「牛脾氣」「牛乜 Q」都有齊，因此早日唔再打工〔及受氣〕，對人對已對社會對歷史都唔算係錯事壞事！
活化成為「自主投資生活」後既我，其實表面身體上好似自由左，但精神思想上其實一樣係日日由朝忙到晚去工作！主要係我引退時其實唔係真係有好多錢〔或者好似風之后珊珊咁話養個細路都要五、六百萬〕，只係膽粗粗話唔撈就唔撈，其實自已又無 Pension 又無 P Fund 又無自住物業，只係心口得個「勇」字，所以「自主」後唔投資唔炒股票你話點過世？
「自主投資生活」只不過係美化左同自我催眠既形容詞，實情係我年年月月日日分分秒秒都要留意四週有乜投資既好機會，可以幫到我增加收入、或者增加資產，因為我經以無緣再做月尾既「打簿一族」，雖然我亦好好彩做到「少稅一族」〔始終炒股票亦要俾印花稅〕！
以下一 D 係我曾經探索過既「自主投資」方法，得唔得唔敢講，但係出入市時機始終係最關鍵，唔係知道方法就一定可以做到，但最低限度自已叫做有研究過，機會來時可以稔少 D 及馬上行動！
〔一〕股票買賣：我研究得最多、最有信心既方法，已經 Mark 定左目標股 (講左 N 次啦！ 2828、941、2628、2318、3968、005、etc.)，如今只係要研究點樣可以成事。我認為即使今年有可能俾美國佬拖累跌到 18,000 點，但中國 H 股既大泡泡會升多三幾年到 2011 年，宏調正面 D 咁睇係反而幫到大陸 A 股軟著陸及慢慢升；
〔二〕股票基金：同股票殊途同歸，只係將大任交予基金公司，但最重要一樣都係出入市時機，唔可以迷信某某市場可以長期只升不跌！2008 及 2009 年我都一樣係睇好 China！如果再買都係買「首域中國基金」或者「恆生 H-150 基金」(43223) 之類；
〔三〕ELI 或 ELN：牛皮上落時可做 30 日左右的短期 ELN，但宜短不宜長，只考慮上述目標股既 ELN，而且要樂於或者根本想買貨才考慮 ELN；
〔四〕買車位收租：由 30 萬到 50 萬左右有交易，可以有 5% 到 6% 回報，安全性高，永無租霸，如果欠租只有你鎖佢車，你惡過佢！優點係收入穩定，缺點係車位升值能力不高。最近睇過美孚八期既車位，因為有曼克頓山既需求，唔憂租，但車位已炒到近50 萬，可放租 2,500 蚊一個月，據說Wilson 管理得唔錯；
〔五〕人民幣存款：2008 年或者仲有 7% 到 8% 升值，永享一個月定期利息有 0.83% 可算全港最多，唔好處係每日出入上限得 2 萬銀，存款 20 萬就要日日存錢做足兩星期 (5-day work)。但香港既交行、招行等有 D 香港內地兩用戶口，應該可以直接存到入 D 大陸戶口收 3.3% 息，不過理論上有入無出轉唔番港紙。第日可能你要親自過關去深圳同紅白藍袋揹返香港！
〔六〕買唐樓落釘：好多 50 年以上既唐樓都係目標，區區都有，土瓜灣、深水埗、官塘、西環尾、筲箕灣等。大約年半前响 筲箕灣道 350 號康泰大廈睇中左個唐九樓既 480 呎兩房一廳單位，地下係投注站，但門口有閘，典型旺中帶靜，只售 58 萬〔1,200蚊呎〕！可惜當時無錢，而且一、二樓都有一樓一鳳〔但係好老字號個種，只做熟客，一定唔會擾民〕，因此結果無落搭！
年半前另一間我睇中左既係 600 呎第二街唐三樓，開賣 108 萬，我已經無講價立即交票落定，點知個自稱係 Catholic 既地產 C9 兩次都唔知點解唔肯收我張票，結果拖拖拉拉左一個星期攪到我買唔成，呢單野我激氣到而家，死得不明不白！個第二街兩房一廳既單位好正，裝修好好，真係進可攻退可守，600 呎既可自住、又可放租、又可等收購、甚至空置等升！
其實第二街近正街經已有個大地盤收購左，我睇中個邊亦係一個完完整整既唐樓範圍，全無新樓在內，完全符合收購既條件，真係失之交臂！而家加埋宣佈左地鐵港島西線，今日我估起碼值 200 萬〔3,300蚊呎〕。呢單野我估計賺少左起碼 100 萬！一個機會失左，可能十年都遇唔得返！好慘！呢件係我過去兩年「自主投資生活」中既最大憾事之一〔仲有之二、之三架〕！
〔七〕買樓化裝轉售：响北角英皇道有 D 好舊既 30 ~ 40年大厦，e.g. 新都城、僑冠、五洲、南方、麗宮〔唔係麗花皇宮〕、璇宮、及春秧街、錦屏街一帶，物色 D 有咁殘得咁殘既單位以低價買入，放 15 ~ 20 萬入去裝修化裝到靚靚，然後叫高 40 ~ 50 萬轉售圖利。呢個炒賣方法風險唔少，年半前個樓市好靜就或者有得做，今天恐怕好難可以低價買到好殘既單位，因為好殘既單位今日都好貴！
〔八〕買唐樓間套房出租：馬頭圍道、北帝街、大南街、基隆街、北河街等地方仲有好多 D 大約 600 ~ 900 呎既唐樓，賣大約 80 ~ 120 萬，可以間成 4 ~ 6 間套 100 ~ 150 呎套房，每間租 1,500 ~ 2,000 蚊，全部租出每月有 6,000 ~ 10,000 蚊收，約有 9 ~ 10 厘回報。但要放本裝修，亦一定借唔到 Mortgage，仲要唔介意定期同 D 新移民或者一樓一鳳租客收租。
〔九〕炒低水區既樓：市區樓價起碼已經 6,000 ~ 8,000蚊呎，但係 D 次一級既區〔泛指地鐵站後仲要再轉一程車既區，但當然唔係指中西半山、跑馬地、北半山等〕，e.g. 青山公路沿岸之碧堤、麗城、海韻、麗都、豪景、浪翠園等，呢 D 屋苑 97 前都曾經威過上到 5,000 蚊呎，而家已經開始升番到 2,500 ~ 2,800 蚊呎，但因為市區樓一定升先，而次一級既區就後 D 至升，因此可能仲有 D水位，例如睇可以升返上 3,500 蚊呎左右〔即係 97 既七成〕。呢個方法風險唔少，因為可能升完，或者只得 10% 水位！
〔十〕買舖收租：紅磡家維村附近、土瓜灣近環安街、庇利街、元朗或屯門既一 D 內街仲會有 D 大約 200 萬既細舖位〔150 ~ 400 呎〕出售，舖位收租可能大約只得 3 ~4 厘回報，收租甚低！但舖位安全性高，永無租霸，如果欠租你就鎖佢閘攪到佢無生意做，你惡過佢！優點係收入穩定，而且博佢長遠升值能力甚高。例如 2015 年後紅磡、土瓜灣等均可受惠於地鐵既沙中線！只要夠長命又有運到，你買既舖位既將來可以好似 Time Square 既羅素街地舖咁正都有機架！
上述既野就係過去兩年我一路 Explore 一路想做既投資方法，總結來說都只係「股票」同「地產」兩大類別。由於兩者都係有週期性既投資工具，要大大咁賺一筆必須要「低買高賣」，一旦錯過左低位既機會而去高追，相信會死得好慘！
各位親愛既股友，如果你而家住緊既愛巢係响九七前後入市買既話，你一定好明白我講緊乜野！過去十年，我相信你都只係為左間樓打工，動彈不得，中間仲試過「負資產」幾年！好彩而家苦盡甘來，樓價起碼上返去九七前後既七成，而家間樓係「正資產」，Net Worth 起碼有 100 ~ 200 萬啦，加上手上積蓄的 100 ~ 200 萬 Cash、股票、基金等，同埋尚未 Realize 但一定有既 P Fund〔起碼 50 ~ 100 萬啦〕，如今可以說真正有資格去考慮加大投資或進行退休工程了！
試想想，假若九七前後懂得沽樓套現的人，過去十年，我相信他們一定活得很輕鬆！而且當其他人動彈不得「負資產」時，他們可以擇平而買，再大賺一筆！
因此，過去兩年我總結到既投資心得就係：「股票」同「地產」都係有週期性既投資工具！都係必須要「低買高賣」！
响「股票」投資既「好機會」可以好多，但係要寧願錯過、唔好急進，因為「股票」既「好機會」往往會一下子變成陷阱害人！
反之，响「地產」投資既好機會唔係好多，一有真正好機會就必須把握，唔好錯過！錯過左可以一世遇唔番！我筲箕灣道康泰大廈同第二街唐三樓兩個單位就係好例子！
再細心分析，所謂「一世遇唔番」係誇張左少少既講法，主要係想指出「低位」一去無艇搭，回頭已是百年新！
總結再總結，如果以「1 代表低位」及「10代表高位」，我認為今天「地產」已經在「7」既偏高水平，而「股票」經過連場大跌後已經在「3」既偏低水平！
因此，總結再總結再總結，2008 年應該沽「地產」套現買入「股票」，靜待另一週期到來及「股票」上升獲利！
No comments:
Post a Comment