股市氣氛可以一夜之間無乜原因之下改變，今日就升左 1,400 點好似好 High，但其實有排都仲未上得返我最近 D 買入價。
今日於 $125.2 沽左 400 股匯豐 (005)，收市知道沽早左賺少左，算啦！等下次跌返 $110 再買返！到時買佢三、五、七萬股，一條數！
復活節去左新會幾日，今日既新會好鬼旺，好食好住，雖然一般人既人工得果 800 ~ 900 蚊一個月，但唔少人飲茶食飯一餐 200 ~ 300 蚊閑閑地，百貨公司、飲食舖、消費場、時裝店、影音店都人頭湧湧，內需品好興旺。
同 D 打算盤都打唔埋既「親戚」講開，新會城內中移動 (941) 同聯通係最 Popular，中電信就唔多得，從用家角度睇中移動係最好，「親戚」用中移動一個月都用三幾百蚊，消費唔少！中移動國內市場既潛力好大，未來兩三年正係收成期，最近業績公布仲 Confirm 左 2007 年既盈利唔係亂吹水，$115 樓下買既中移動真係唔好隨便放棄！一定要忍！忍到 2009 年尾，一定掂！$115 樓下既中移動應該愈跌愈買，無乜錯！
新會碧桂園第一期已入伙，100 平方既單位賣 40 幾萬，450 平方既七套房四大廳別墅賣 750 萬，據說仲好搶手！今時今日住既唔再係香港人，而係本地既高官及生意人！新會富起來了！D 「親戚」都話想買。大陸人想自住以改善居住質素既心，無懼於宏調加息加稅呢 D 行政手段！$6.00 以下既碧桂園 (2007) 似乎有返 D 投資價值，可以買少少！如果上返 14 蚊，接近三個開，幾好架！2009 年尾有機！
今時今日大陸既年輕一代好有上進心，「親戚」讀中一既仔，中英文都得，有好奇心，唔識既野馬上問點解，對住大人講野有紋有路，能夠清楚表達自已！反觀香港同行果三個由九歲到十八歲既大小朋友，差得遠！中英文都唔多得，又無好奇心，唔識既野奉旨唔會問點解，對住大人講野唔清唔楚，又無信心。好明顯大陸普遍既年輕一代，知識上同技術上都一定勝過香港仔香港妹，香港人既下一代既競爭力一定輸俾人！香港既下一代唯一優勝既只係仲有廉潔、公平同公德心，而呢 D 價值觀亦仍然足以暫時令香港人保持些少優勢！
新會好鬼旺既另一個 Indicator 係無乜乞兒，街邊小販就多過乜！老實講，做小販梗係好過做乞兒啦！我只在叱石山既黄大仙祠見到一個短手短腳傷殘女人在乞錢，我見佢乞兒砵內沒多少錢，便給了她五塊錢，她非常「好口」，又叫我「大老闆」，又祝我「發大財」，五塊錢既回報簡直係超值！我只好「承佢貴言」啦！今年「發大財」啦！反觀新會城內既茶樓酒館，如今生意太好，真係食餐 200 ~ 300 蚊既飯未必有一聲多謝架！
今次新會之行，加深左對深圳以外地方既認識！同時仲發現左，新會仲有好多果 D 只賣 10 萬蚊既 600 ~ 700 呎 15 年唐樓，一味夠平！
我計過，如果在新會買間 10 萬蚊既樓住，一個月既消費只係 2,000 蚊已足夠有餘，咁如果有 100 萬既話，已足夠退休買樓住及食足 38 年啦！我又計過，我多數唔會再有 38 年咁長命！所以一定夠有餘！
所以話，天無絕人之路，要過一個 Decent Life 既退休晚年，唔一定要移民加拿大紐西蘭。退休既生活費其實唔係想像中咁多，新會既居住環境其實都好正，西湖公園、玉湖公園都適合晨運跑步休息，空氣又清新！退休在新會，都並非一定係想像中咁唔 Decent 架！
「拋開既有觀念，探究新鮮事物，思考可行方案，積極嘗試未來」，呢 D 怕且係退休人士必須要有既新能力！否則，世界就太沉重啦！
No comments:
Post a Comment