有位好「寸」既仁兄叫做【周顯】〔唔係周融〕，最近出左一本好「寸」既書叫做【從股票的價值到大破價值投資法】，由於佢既寫法好鬼「寸」，兼且文筆又唔差，我响三聯書局睇左十五分鐘後終於無將本書「洞督看」完就算，而係决定用足足 $68 買左返去睇！
本書好易睇，兩、三個鐘可以睇完，周顯自稱炒股天下無雙，認為價值投資法已不適合今天香港既股場，而佢既真理一言以弊之就係「炒股票就是炒資金流向」！其實周顯全書講既甚麽「股票價值」、「資金流向」、「街貨歸邊」、「大戶向下炒」、「概念股熱潮」等等前人都有講過〔陸羽仁就都有講唔少〕，並唔係乜野 659 〔即係話「新創建」呀！〕但係佢八八卦卦論盡其他人士果部份先至特別過引！而且佢係從「炒家」既角度去寫書，當中既「炒家」思考方法先至係呢本書既精要之處！
我睇完之後，係就係有些少既 Inspiration，但唔敢講周顯既「炒家」方法啱唔啱其他人，因為唔係個個人可以接受佢既炒法。而且佢講就天下無敵，炒股就都自爆經常中伏！但點都好，周顯佢夠膽咁「寸」，我估佢從炒股方面大大話話點都有賺到三、五千萬卦！如果佢真係有咁既水準，我用 68 皮買佢本書睇睇學下野，我認為咁都算係「價值投資法」之一卦！
No comments:
Post a Comment