當一個人十八廿二之時，瞓醒左可以一個蜈蚣彈起身，跟手仲做五十下 Sit up 而面不改容〔我以前就係咁架呢〕；人到左中年就開始呢度酸果度痛，瞓覺轉身有時 D 關節都又響又痛；如果有長期背痛者，可能就更加要伏住瞓先至得天光；再老 D 落床無手杖或十字腳架〔唔係十字幫吊頸上果 D 十字架〕就好易會仆街；又再老一 D 就無人扶都唔使止意落到床呢！
如果又再老一 D，你估又會點呢？
估唔到呢？因為你仲後生，你無老呀！
答案就係如果張床唔係 Adjusted High Low Hospital Bed，你都唔使止意仲有得落地啦！
護理安老院每日要出汗出力既起居照顧員 (PCW) 就都深深知道，要照顧一個體弱臥床既老人家起床、轉床〔例如要去沖涼〕，即使出動兩個普通 Size 既 PCW 加埋吊臂車都要九牛二虎之力，因為弱到好似一注菜既老人家其實都好鬼重，PCW 好易扭傷變埋工傷！但如果護理安老院有張 可以電動調高床背既醫院床 俾體弱臥床既老人家，咁升高床背老人家就可以先「坐」起身，再上吊臂車運輸帶就易好多啦！真係功德無量！
但係好可惜，咁鬼功德無量既醫院床，好多護理安老院竟然都係無既〔或者好少〕！而弱到好似一注菜既老人家就反而愈來愈多！
政府話原因係由於「可以電動調高床背既醫院床」唔係 Subvented Item！你老人院去自已執生啦！
三月，我斥資捐左一張醫院床俾東華三院既一間老人院，捐款足足要五位數字〔政府唔肯 Subvent 既 Item 梗係有番咁上下〕，都有 D 肉赤架！但係想到從今之後起碼有一個弱到好似一注菜既老人家都可以「坐」起身、或者沖到涼，而又唔會有咁多 PCW 扭傷工傷，我個心就覺得好愉快！好愉快！好愉快！
錢，都係揾來用既！係米？ 點知何年何月何日床上果一注菜唔會係我呢？
註：「一注菜」純屬形容詞，絕無貶意！而且我本人好中意食「一注菜」〔包括住家菜、非住家菜、京菜、滬菜、粵菜、日本菜、韓國菜……〕！
No comments:
Post a Comment