炒濰柴、得水牛（1016）

濰柴動力（2338）應該算得上是一隻炒家愛股，因為它過去半年以來，一直上上落落了四次，每次波幅總有起碼 15% 以上。

如果做人安安穩穩、不作他想，只是專專心心的「炒濰柴」，縱使不是「信耶穌、得永生」，但肯定是「炒濰柴、得水牛」，賺到錢自力更生夠買自己的「水牛」、「母牛」，不用再倚靠梁錦松兩公婆的「小母牛」。

我好喜歡濰柴，因為：

（a）濰柴庄家心地善良，一般只會益你，不會害你（如果買濰柴你都輸錢，那肯定是你自己的問題，今次我一定會站在庄家方面說話的）。

（b）濰柴升的時候就升，濰柴跌的時候就跌，很少會「陰你」。

（c）濰柴會教埋你「應買時買、應沽時沽」，每次清清楚楚，很少拖泥帶水。那就是我的「JR操作系統」的 ABC，逢 RSI(9) 跌到 30 以下可以買入，逢 RSI(9) 升到 70 以上就可以沽出，次次買賣次次賺。

（d）濰柴產品是「十二五」國策相關產品，因此亦是「概念股」，可以天天講、日日講、間中講、不時講，總之想炒起濰柴之時就講它一講，吹它一吹，國策概念永遠通用。

濰柴如今買得未？

我覺得「可以買」，但又覺得「不可以買」。

係米有 d 頂我唔順呢？哎呀… 我既思考方法係咁「辯證」架啦！Dialectic 係好野呀，共產黨如今在「科學發展觀」的核子傘下都仍然天天講、日日講、間中講、不時講，總之想話「我啱你唔啱」之時就講它一講，實無死。

我覺得「可以買」，因為：

（a）濰柴由「天比高」開始跌落向下，跌到 48.80元似乎正正是上升前雙底的「頸線」。你知啦，做人既野身體上好多地方都應硬唔硬，但係最硬一定係條頸（你有眼見啦，你 d 老闆同 d 伙計個個都係鬼死咁「硬頸」既，意見同你唔同時，一定同你「撐到行」啦），所以「頸線」係好強既支持，濰柴好有可能跌到 48.80元後便反彈回升了。

（b）濰柴今日 k 線有 d 十字星格局，真係好似見底既款。

（c）濰柴今日已經係第二天跌穿「保力加底部」，因此如果唔係「保力加底部」向下移動，就係濰柴股價反彈啦。

但又覺得「不可以買」，因為：

（a）濰柴個庄家有 d 特別，一般走勢如何都完成由他控制，意思即係所謂「阻力位」、「支持位」於濰柴經常都係「無到」，因此上述 d 分析可以完全無用。

（b）更重要既係，濰柴每次「真正見底可以買入既時刻」，必然有「大成交量」出現才算真，過去半年的四次上落皆如是。古語有云：「股價要升，成交先行」。因此，即使今次濰柴已經出現八連跌、即使 RSI(9) 已經跌到 30.28、即使股價已經係第二天跌穿「保力加底部」，但濰柴一直都未有「大成交量」出現（泛指成交量高於 20 天平均成交量），故此我仍舊不安心、不心安，未敢輕舉妄動。

「唔買股票唔會輸，買就一定要贏」是我今時今日的炒作座右銘！