我對回覆的新做法（1022）

最近我發覺我這 blog 的人流多了，同時 online 的人也多了，從早期的「小貓三兩隻」到如今經常見到有「5 至 6人 online」，visits 及 pages 也多了。

對於這情況，我想了一會，結論是「我沒有喜歡、我也沒有不喜歡」。

可是，最近開始連寫回應的人也多了，內容亦開始由「回應我的內容」變成「你對 xxx 點睇」以及「我應唔應該趁低位將 xxx 換了 xxx」之類問題。過去幾天，我回答了一些，之後，我有些後悔了。

當又再有新的一些「我又買了xxx，你點睇」之類問題傳來之時，我知道我一定要對這些源源不絕的留言，先有一個說法，再有一個做法。

對於這些「我買了xxx你點睇」的問題，我的綜合反應是：

（a）你買左xxx關我Q事咩，有咩好問

（b）你買得xxx一定有自己既理由啦，買都買左啦，仲有咩Q好問？

（c）我邊有咁多時間答你丫，你米阻住我炒股票、阻我發達啦！

（d）你攪錯左啦，我唔係財經演員，你「愛知」係你既事，但你問錯人啦（我有部份做錯既責任，因為我之前一直都有回覆呢 d 問題）。

（e）我寫 blog 係自己享受為主，回應留言唔係本意，有錯要快改，回頭是岸。

幾年前，我開始寫呢個 blog，目的係俾 d 我認識既人睇，而這批人既數目應該只有十個八個人，但我覺得已經足夠。

因此，呢個 blog 係純粹以「小圈子」心態出現，絕對無服務「街外人」既任何意願，而且炒股只是個人眼光，以及同「小圈子」內既知心友溝通及吹水，根本絕對沒有同「街外唔識既二打六」分享既需要。

因此，今日發展到咁旺場，我都非常意外，仲攪到有人當錯呢個 blog 係「陸叔、石Sir、Ben哥、沈大輸、青姐」之類既樂園，實在罪過罪過！

我亦唔係大行，我唔需要時時刻意去妖言惑眾，亦唔需要希望大眾跟我支魔笛，或者要死係我既魔掌下。

我為了可以繼續「做一個成功、籍籍無名並且快樂的投資者」，而且仲係保持住「好孤獨」既形式去做，我決定以後對留言的回覆採用以下的新做法：

（一）我只回覆我所認識的人（或者我所認識的人他/她們所認識的人），即是我開始寫呢個 blog之時的「小圈子」內既知心友、同志、股友、知心友既知心友、同志既同志、股友既股友…。

（二）對於我不認識的「街外人」及「二打六」，我以後一概不回覆了，除非寫入來的內容我有興趣吹水的。

（三）無名無姓、連藝名都懶得想一個的所有 Anonymous 人士，我一概不會回覆，以後你地亦都無謂寫啦，留 d 精神去炒股好過啦。

記住，由於要拒絕 spam 及 ads 關係，呢個 blog 唔係 real time 可以 post 既，因此所有入來既 mails 我都有生殺大權決定答唔答，以及 post 唔 post 既，因此我既決定就係 final 啦。

當然，我為左專心炒股，以後唔回應係我既個人取向，但呢個 blog 始終係 open 既，故此幾時都歡迎大家睇既！

不過，如果你唔識我，咁睇完就算啦，唔好再問長問短啦！好唔好？（多謝你合作啦，最多．．．）

但係如果你係我既「小圈子」內既知心友、同志、股友，咁就十二萬分歡迎你多多寫留言啦！

因為，「海內存知己，天涯若比鄰」也！

有左呢個 blog，世界仍舊是世界…對嗎？