曾淵滄錯在那裡呢？用他自己說法：「這隻股票我買賣 3 次，但犯過 3 次錯誤！」講出來都好羞家，堂堂大學教授但投資水平竟然同各位親愛的股友（以及我）差不多，因此我們以後都不宜妄自菲薄呀！
曾淵滄的 3次錯誤簡而言之分別是：
（一）2006年年底錦江上市第一天，曾淵滄見好短時間內錦江股價節節上升，於是飛身入市，但股價竟然好快就見頂回落。當溫總說港股直通車暫停後，曾淵滄大舉售股，結果錦江由賺變虧！曾淵滄亦變「虧佬」！
（二）到了 2008年初，錦江股價突然再回升，傳媒報道說是炒奧運概念，曾淵滄覺得有些道理，再度追入，點知道奧運對中國的旅遊業一點幫助也沒有，結果又一次虧本賣掉！
（三）奧運後，曾淵滄希望奧運後酒店生意好轉，加上錦江股價低迷，於是買入，帳面總算有錢賺了。但豬流感一來，吃過兩次虧的曾淵滄就趕快賣掉錦江，擔心豬流感影響旅遊業，點知道一賣之後，錦江股價就越升越高，結果最終只係賺到「一個桔」！
各位親愛的股友，曾淵滄衰呢三鑊，係咪都熟口熟面呢？（大家或者試過都未定）！
無錯，呢三鑊「鑊」「鑊」有名堂：一曰見高追入，衰「貪心」；二曰亂信貼士，衰「無腦」；三曰驚青怕死，衰「恐懼」！今鋪教授肯親自落場示範，現身說法，我輩散戶獲益良多了！
又聰明又醒目又慧詰又蘭心既親愛股友這時候自然馬上會追住問：「咁曾淵滄既三宗罪係咪可以避免先？」個「先」字仲要提高八度聲線，再斜起眼好「寸」咁「啤」我一「啤」！
對於親愛股友又善意又求知又求真既「义撚廚」，我自會細心耐心好心關心咁解說既！
我反覆思量，認為「曾淵滄既三宗罪係可以避免既！」答案就係：「長線炒作套路」！
吖！真係聰鬼明唧！我一話頭、您就醒尾，知道我係想用曾淵滄單嘢來再次「依佬士吹」尋日所講既「長線炒作套路」之絕世武功！
如果從「長線炒作套路」出招，第一鑊、第二鑊之情況根本不會出現。因為「最佳買入點」從沒出現過！
而錦江 2006 年年底上市後，股價節節下跌，直跌到 2008 年 11 月才開始出現「V 型反彈」，到了這一刻，錦江才開始算有值得留意的價值。
「V 型反彈」後，錦江於今年 1 月中出現了一個「突破頸線」的「最佳買入點」，但翌日即馬上回落，股價節節下跌，證明那是一個假的、錯誤的「最佳買入點」。
但當日如果「突破頸線」的第一天沒有馬上買入，那就沒有中伏；但如果「突破頸線」的第一天就馬上買入，按照「長線炒作套路」的規則，三天內亦應該沽出了，因此該次「走勢阱」產生的損失仍然有限。
之後，錦江再由 1 月橫行了三個月直到 4 月，形成了一個多底的大箱體「底部圖形」，並於4 月初又「突破頸線」出現「最佳買入點」！按照「長線炒作套路」的規則，應該「買入」，當時價位大約 1.20！
今次的「最佳買入點」是真的了！
之後三個多月錦江股價節節上升，「五天平均線」再沒下破「上升趨勢下軌」，直到昨日收市價 2.38 （升幅有 +98%），最高位曾見 2.66 （升幅有 +122%）！
故事講完！
各位親愛的股友，您話呢套「長線炒作套路」功夫係咪值得學吖？仲有，您見我既分析，係咪其實無乜難度，其實人人都懂得分析，人人都可以找出心目中隻股票既「最佳買入點」！
無錯！我都如此認為！
呢套「長線炒作套路」功夫最最最最最最最重要既地方就係「死等」+「耐心」+「紀律」！而呢三樣素質，我相信我地所有人那已經具備了！
正所謂：「萬事俱備，只欠東風！」發達指日可待！
No comments:
Post a Comment