增加現金比例 (467)

行開幾日旅行一下，估唔到又來左個「百年一遇」既上落市，據說大跌市個日好多亞媽唔見左仔，因為 D 「股民」「股仔」已經跌到連亞媽都唔認得啦！

唉，2008 年真勁秋，野野發生既事，無論地震又好、海嘯（金融）又好、雷曼債券又好、上星期個市又好，都話係「百年一遇」，結果唔使一百年，今年就全部「單眼佬睇老婆」：一眼睇哂！有云：「山中方七日，世上幾千年。」

又據說，今次熊市一浪低於一浪之餘，每次反彈都唔可以升穿條 20 天線，只要一到 20 天線反彈就會玩完，又再向下跌過。

今日條 20 天線在 14,594，早上大升 900 點時曾經最高 14,889，但就只能在 14,344 並且在 20 天線以下收市，走勢肉酸，出現「射擊之星」乃一到頂訊號。

我本是樂觀派，兼且一直相信到底不遠，可惜一直事與願違，而且愈跌愈深，竟然可以見到 10,676 既低位。

換言之，由 2003 年開始既五年大牛市（當時 8,332）已經大部份化為烏有！而今日收市既 14,344 點亦只係 2005 年初既水平（當時 14,267），即是話過去四年所有「股票長期持有者」都係要蝕錢、或者得個桔！

形勢如此發展，我只好信鏡、信每次反彈都唔可以升穿條 20 天線，信只要一到 20 天線反彈就會玩完，信又再向下跌過。

於是，我只好沽出一些仍然有錢賺的股票，增加現金比例，等待「又再向下跌過」時，又再買過。

上星期五沽出 941 @ 67.85
今日沽出 1398 @ 3.89
沽出 2828 @ 71.80

現時比例：現金 13% 、 股票 87%，於約 14,500 水平而言股票偏高了約 5%。