如今滿街都係「健康」資訊，真假難分，不過根據 Common Sense （如果大家仲有既話），上述五種食品應該都算係「好野」卦！
我目前能夠「經常食」（即一星期起碼食三次或以上）既只有「燕麥」，可以話「食燕麥」已經不知不覺逐漸取代左「食飯」。「食燕麥」對減磅應該並無果效，但最大既好處係可以令你「路路暢通」！上班一族因為經常食無定時，兼且成日坐定定死打爛打電話，屁股坐到開花兼腸塞一 D 唔出奇，分分鐘生左條「癌大腸」都有之，「燕麥」既功效可以令你真係每次都「去得好安樂」，唔使再苦練各門各派既氣功啦！
至於其他四種食品，「蒜頭」苦苦地又咁鬼臭口，一般我都唔會笨到「自討苦吃」；「綠茶」雖然係茶，但唔係我杯茶（My Cup of Tea 係叫做普洱茶）；對於「紅酒」，我既態度更加係「擔屎唔偷食、擔酒唔偷飲」，因為我既 DNA 仲係好純潔無邪，並無污染到；而「果仁」就的確係我流口水既心頭好，但係我覺得貴（因為我只係食靚果仁），結果好少買，自然成日無得食！
但 Anyway，我只係食一味已經覺得「感覺良好」，如果食齊五味，豈不是可以長命 130 歲？（唔可以再講『長命百歲』啦，因為六叔一百歲都未死呀！）
此外，防止白髮有辦法，各位親愛的股友如果唔怕「核核突突」既手感，可以走去執番黃毓民條蕉、然後搵人家個頭來試試（最好只做半邊頭，科學化 D 做番個比較研究）！
如果效果好得，記得唔該要話我知呀！
No comments:
Post a Comment