遊戲人生 (495)

過去兩年，我已經將吳式太極既方拳、圓拳操得揮灑自如，亦同數十位師兄師姊成為了談天說地既朋友。

每朝早上七點鐘，音樂一響起 （請欣賞），「風中柳絲舒懶腰，幾點絮飛飄呀飄，誰能力抗勁風？爲何梁木折腰？柳絮卻可輕卸掉？」拳風虎虎一番之後，大家就聯群結隊去德興茶餐廳「食自己」，然後就東家長、西家短咁無所不談。

話題由娶新抱到金價、次按到奧巴馬、孫女返學到派位、關節痛到疴夜尿、鋁窗裝修到炒樓時機等等，大家每次都傾得興緻勃勃，好似總傾唔完。如果唔係股市要開，大家似乎仲想「水長流」、吹水停不了。

今朝，打拳時俾一陣冷風吹到我面青青後，我突然想：「人、點解會咁呢？」

「大家都唔細啦，有乜咁好傾？」

我細心望去：亨伯今年 88 歲、「Baby」今年 73 歲、「媽咪」今年 70 歲、陸師兄今年 64 歲、毛姑姑今年 60 歲、「肥佬」「智叔」「大師兄」「百強」等「四小龍」今年齊齊 56 歲、大玉小玉師姊今年都怕且 50 到尾啦，成班人似乎最「後生」果個係我（唉！又真係事實播、唔係曬命）！

我一直在諗答案。但望下諗下、諗下望下，竟然真係俾我諗到個理由：「佢地個個都咁開心！原因係呢 D 生活就係佢地既人生！」我再諗、又諗又總結：「人生就係遊戲、遊戲就係人生！」

我於是突然有所領悟：「佢地個個活得咁開心，有 D 仲咁長命都未死，就係因為佢地能夠「遊戲」人生！」

無錯，人生匆匆數十載，所餘無幾！如果俾你有 80 歲命，恐怕你都起碼已經走過左一半啦；如果一個唔好彩，上帝唔夠義工用，竟然要急 Call 你而令到你只係得 70 歲命，而家分分鐘你都已經去左七、八成啦！

我諗咁坦白講出來，人生真係好似好「灰」，但事實又真係如此！有 D 人日日要靠信「神」去支撑度日才有力量，但我反而更加欣賞我班太極師兄師姊既「人生態度」！

只有「遊戲」，才有「人生！」

人生，不在「遊戲」、而在「態度！」

我明啦！

「枕上詩書閒處好，門前風景雨來佳。」

「莫恨香消雪減，須信道掃跡難留。難言處，良宵淡月，疎影尚風流。」